Vaega:2

Fa’atalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Le Atua e, e fo’i atu lava i Lau Afio le vi’iga, o le fa’afetai ma le fa’amanu e le aunoa, Amene.”

O le ulugali’i o Paulo ma Eseta e to’alua le la fanau tama, o le tama ulumatua e igoa i a Petelo a’o le tama lona lua e igoa i a Samuelu. E nonofo i tafatafa o le mauga e igoa o le Mauga o Olo, ma o lea mauga fai mai le tala, o se mauga ua sili ona matagofie i le va’ai, ona o lo’o ola lauusiusi ai le vaomatua. O lalo ifo o le mauga lenei, ua fai ma nofoaga o le tele o aiga, ua aga’i atu e fa’aaiga le vaomatua, ona o suiga fou ua o’o i totonu o le a’ai.

O le isi la itu o le mauga lenei o lo’o nonofo ai Paulo ma lona to’alua o Eseta, ma le la fanau o Petelo ma Samuelu. E sefulu ‘eka o le fanua lenei, o lo’o umia e Paulo ma lana fanau, e ala i se fa’atonuga a matua o Paulo a’o le i maliliu. O le isi itu, o lo’o ta’oto ai le fanua tele lava ua fa’aioga o Alava’a. A’o fa’agasolo aso o le soifuaga, na molimauina pea e le lo’omatua ma le toeaina, le tele o le ‘ese’esega o Petelo ma Samuelu. O le masani a le toeaina ma le lo’omatua, e talatalanoa ma fetufa’ai pea i uiga o le la fanau, aua e na o le to’alua lava tama, e leai so la tuafafine.

O le fa’anoanoaga lea na o’o i le toeaina o Paulo ma le lo’omatua o Eseta. Ae sa taumafai pea mo le tele o tausaga ina ia maua sa la tama teine, peita’i, ua le manuia a la taumafaiga. Ua o la talia fo’i, ma o la fa’afetai pea i le Atua, ona e ui ina e leai se teine o le fanau, ae sa lagona lo la loto fa’afetai, ina ua o la maua le fa’amanuiga a le Atua, e ala lea i le foa’i i a i la’ua o le fanau tama, lea ua ola ai nei Petelo ma Samuelu.

A’o fa’agasolo pea le mafutaga a Paulo ma lona to’alua o Eseta, sa o la maitauina pea uiga ma aga a le la fanau tama o Petelo ma Samuelu i aso uma. Fai mai e sala lava Paulo ma Eseta i luma o le nu’u i masina uma, ona o uiga a le la tama la’ititi o Samuelu ona o se tama e ulavale, e fia malosi, e fa’alala lava lona lima i taimi uma, fai mai e le pala’ai i se tagata o le nu’u.

O totonu fo’i o A’oga, e o’o lava i ai uiga ia o Samuelu, na te le iloa faia’oga, ae o le mea ua tupu, e ulavale ma fa’amisamisa Samuelu, ae e atamai. Fai mai, e aveave sili lava Samuelu i mataupu o le A’oga i tausaga uma. O le mitamitaga lea i le toeaina o Paulo ma le lo’omatua o Eseta. E ui lava i lea itu, ae sa o la lagona pea le fa’anoanoa, ona o uiga o le la tama la’ititi o Samuelu.

E talatalanoa ai lava Paulo ma Eseta i aso uma, e moni lava o lo’o avea ma fa’afiafia loto i a i la’ua, ona o le atamai o Samuelu, ae ua le tutusa ai ma ona uiga fia malosi, uiga fia sili ma ona uiga ua pei na o ia lava ma le lalolagi uma mea uma.

Fai mai e uma tama o le nu’u ona fa’amisamisa i ai Samuelu, e o’o fo’i i matai o le nu’u, e sisi ai le fu’a a Samuelu i le va lea. Ae o le leaga o le mea, e sau ai tua ma aumatua e sefulu, o pusa’apa e limasefulu, o povi e sefulu ma ‘apa masi e tolusefulu. “Eseta, se ua ou le iloa le mea o le a fai i le tama lenei, ua ou lagona lava le le fiafia, afai o le aluga lea o le a alu ‘ai faiga a Samuelu, ou te le iloa se isi mea e fai i ai.”

“Paulo, ia e onosa’i, ona ua pau lava o uiga o lenei tama e fa’afiufiu mai lava i a ta’ua, ae a tonu lava e sau se aso ma se taimi, ona ia lagona ai lea o le leaga o lana amio lea e fai so’o mai. O lea, ua leai atu lava ni povi ma ni pua’a, o lo’o galue malosi ai Paulo e fafaga aua le tausiga o ta’ua. Ae ia e onosa’i ma e fa’apalepale Paulo, e sau se taimi ona ta va’ai ai lea i se suiga lelei o Samuelu.”

E faia pea…