Vaega: 3

E i ai pea le fa’amoemoe maualuga, o lo’o aoina le masina i le soifua laulelei o le atunu’u i lenei taeao fou. E ao ai ona o tatou fa’apea ifo, “Le Atua e, fa’afetai i lou alofa ma lau tausiga faifai pea mo i matou i aso uma o lo matou ola, alofa ma fa’asino ala Lau Afio i a i matou i faiva ma tiute o le a feagai ai, a’o le vi’iga ma le fa’amanu matou te fa’afoi atu i a te Oe Tama e le aunoa, Amene.”

Ia manuia le alo faiva o le atunu’u I feau ma galuega o le a feagai ai I lenei aso, ae alo maia o le vaega lona tolu lenei o la tatou tala fa’asolo, Lupe o le Filifili, mo lenei aso. Na muta mai la tatou tala, ina ua fai le talatalanoaga a le toeaina o Paulo ma le lo’omatua o Eseta e tusa ai ma le la tama o Samuelu.

Ua avea uiga o Samuelu ma ala ua amata ai ona pisa tagata o le nu’u, ua fai fai tala fo’i i le toeaina o Paulo ma le lo’omatua o Eseta. Ae fai mai, e le mate ai le lamepa a le lo’omatua o Eseta i le va lea, e fai fo’i o le faifai tala o fafine o le nu’u, ae e le talia i ni vai e le lo’omatua o Eseta. E sili i le autaliga o le lo’omatua le manatu o ia o le nofo tane i totonu o le aiga, e le iloa e Eseta lea ituaiga fa’aupuga fa’apea o le nofo tane.

O le fa’alogo atu lava o Eseta o fai mai tala a fafine o le nu’u e uiga i lana tama o Samuelu, e le toe fa’atali le lo’omatua, “E a, tou te maua, tou te mafaia mea e fai e la’u tama o Samuelu a, tou te ‘ata’ata mai fua tou te loto leaga, tou te tautatala mai fua ae tou te tau fa’alata, o a lava tou tala e fai, e le o mafo’e ai lava o’u alofivae ua tou iloa, va’ai a se lo’omatua i o’u alu atu numinumi i’ina e.”

O lo’o taumafai pea Paulo ma Eseta e fai se auala e mafai ai ona suia uiga o le la tama o Samuelu, o le ala lea e alu alu ai le talanoaga a le lo’omatua ma le toeaina ua tau pa’i lima ma tau fetamo’ea’i solo ‘ulo ma falai i isi taimi.

Na tilotilo ane nei le toeaina o Paulo i si ona to’alua ua tele tausaga o mafuta pea, “Eseta, se ua so’o uma lava i a te oe le ta tama lea, e le so’o i a te a’u, le filemu, ae so’o uma lava i a te oe ma lou aiga, ola fa’amimisa, ola fa’amaualuluga ma ola fia tama mamafa, ae leai lava ni mea o i ai.”

Fa’alogo atu le lo’omatua o Eseta, ua tau sosolo a’e i luga Satani, “E a ea Paulo, va’ai oe, ‘aua e te tu’u a ‘ia mai i a te a’u, o lou toto ma lo’u toto, o lou a’ano ma lo’u a’ano, o lou ivi ma lo’u ivi, lea na fafau ma o lea fo’i ua ola ai le tama lea. ‘Aua la e te tu’u ‘ai mai i a te a’u le leaga, teuteu mai au fa’amatalaga i a te a’u, ae ‘aua le fa’asolo atoa mai fa’apena, va’ai e lelei fo’i o’u lima e le fa’apea lava e i ai se isi na lavea i lima nei.”

Ua ‘ata’ata le toeaina ma fa’apea ifo i lona loto, “Se i va’ai i ai, o lea lava e aliali mai lava uiga ia, a’o lea a ou fai atu, ua sau i luga ua pei o le ‘agi a se afa fulifao.”

Ai ua i ai le manatu o si toeaina o Paulo, e sili pe a tu’u, aua e va’ai atu e utia ai i le va lea. Na toe liliu nei e le toeaina le mataupu e talatalanoa ai ma si ona to’alua fa’apelepele o Eseta.  “Eseta, ia malie ia oe le lo’omatua, o le a fo’i sa’u tala ua lafo vale atu ua le tautamali’i i lou finagalo, ia lafoa’i ia, ae ta talatalanoa i se faiga e tatau ona fai e uiga i le ta tama o Samuelu.”

Ua to’a le loto o le lo’omatua i lea taimi, “Paulo, va’ai la’ia i mea lelei na, o mea na e tatau ona ta fetufa’ai ai, mo se lelei o le ta fanau ma le ta aiga, ae e te pa vale mai loa i isi mea, ona le lelei loa lea o le ta va, ae fa’afetai atu, ua suiga malie le ta mataupu. A o ala na o tama ane i tama’ita’i, lena tonu lava ua e sau ai, ae le o le fa’apa valea mai, e manogi leaga ai lea na fai e le Ali’i tatou te manava ai, o se ea ua silisili ona lelei, e fa’alelei ai lagona, o le loto ma le mafaufau, uma mea uma, TKO loa, amene.”

E faia pea…