Ads by Google Ads by Google

Fagogo: Lupe o le Filifili

Vaega: 16

 

Fa’afeailoa’i atu ma fa’atalofa atu i le mamalu o le atunu’u i lenei taeao fou, taeao toto’a, taeao  manuia i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Atua le Tama, ia E alofa, foma’i mai i a i matou le loto fa’amaualalo, le loto fa’amagalo, aua o mea ia ua E finagalo ia o matou faia, a’o matou ola ai i lenei lalolagi o faigata ma puapuaga, a i’u lenei aso i le manuia, o le vi’iga ma le fa’ane’etaga matou te fa’afo’i atu i Lau Afio, Amene.”

 

Ia manuia faiva ma tiute o le a feagai ai ma le atunu’u i lenei aso, ae alo maia, o le a toe fa’aauau atu la tatou tala. Na muta mai la tatou tala, ina ua malie le fa’alogologo a le toeaina o Paulo i le tautalaga a lona atali’i lea ua fai nei i lona tina. E ui lava ina lagona e le toeaina le faigata le tulaga ua o’o i ai, ae sa ia maua pea le onosa’i ma le fa’apalepale, ona o lea ua o’o i tulaga faigata lo latou aiga.

 

Ua sao le fale i lea taimi, ua na o le tilotilo ane nei o le toeaina o Paulo i lona to’alua, ae ua na o le punou o le lo’omatua ma lulu lona ulu i lea taimi. Na ona toe ea a’e lava i luga o le ulu o le lo’omatua, sau loa e le i toe fa’atali. “Paulo, o mea la ia na ou fai atu ai ia te oe, o mea ia, leaga oe e te fai mai lava o Petelo, o Petelo mea uma, ae e te fa’atuatuana’i lava i a Samuelu, o lea la ua tupu mai ai le fa’aletonu lea. Ou te ofo lava a’u Paulo, Petelo, pupula mai ou mata, o oe le isi lea e fai fai tala i a Samuelu, e te le faia se mea e te lua nonofo fealofani ai, ae na o mea leaga lava e te faia, e te le tautala mai fua, a’o lou loto e malo ua e iloa. O ane la ia ma lou tama e fai le lua aiga, o a’u o le a ou alu e au mai si a’u tama, ona ma o ai lea i lo’u aiga ma te nonofo ai, ae faitalia ai oulua.”

 

Na lafo ane lava fa’amatalaga a le lo’omatua ma tu sasa’e a’e lava i luga, ua le fa’atali. Na tu a’e nei le toeaina ma savali atu ua tau taofiofi mai le lo’omatua, “Eseta, se nofo i lalo, e leai se mea lelei o se aiga i lou oso i luga fa’apena, nofo i lalo se i fai se tatou tala i le mea ua tupu, ae le o lou oso i luga ae le fai le mea e filemu ai mea uma.”

 

E le i uma ane tala a si toeaina o Paulo, ae oso ane le lo’omatua, “O a mea e filemu ai, a, o a mea, o le isi a lea mea Paulo, e o’o lava i lou aiga, e fai mai lava latou o Petelo, o Petelo mea uma, ae le amanaia lava si a’u tama o Samuelu. Lou aiga, e fai o le matitiva, ae fia tagata, ma fia tele, Paulo, o la’u tala e fai atu i a te oe, i taimi uma, e, e le i lavea lava lo’u lima i se tagata o lou aiga, ua e fa’alogo mai, e va’ai lava i ai fafine o lou aiga, le au mea loto leaga, fai tatala, fia tetele ae pu pu.”

 

“Eseta, va’ai, o le a tele lava le mea talutalu lou le to’a, to’a mai, e te va’ai i mata o lau tama lea e nofo mai, ae so’ona talafo au fa’amatalaga fa’avalevale fa’apena, taofiofi, ae le o le fa’aalu o upu, e sau se taimi e te toe lagona ai, ae ua leai se aoga, to’a mai.”

 

Talofa, e fasia le gata, a’o pupula ona mata, o lea lava e nofo Petelo e leai ma se upu, ae ua le matu ona loimata i lea taimi, ua pei o uaga ua tafe to ifo mai le lagi.

 

E faia pea…