Vaega: 18

“Le Ali’i, matou te sula lou alofa ma lou agalelei mo i matou i lenei aso fa’apea ma aso uma o lo matou ola, matou te fa’afo’i atu pea le vi’iga ma le fa’afetai ae maise o le fa’amanu i Lau Afio, ona ua le tasi ae ua lasi lou alofa mo i matou. Fa’afetai i lou agalelei, fa’amalo i lou alofa mai i le tagata na E faia i Lou fa’atusa, matou te vi’ia pea Oe Tama e fa’avavau, fa’avavau lava, Amene.”

Na muta mai la tatou tala, ina ua taunu’u nei le sopo a le toeaina o Seve ma le tama o Samuelu i le nu’u, ae maise o le fale o le Faifeau. Ae i lea lava taimi, o lo’o fai ai le talatalanoaga a Paulo ma Eseta fa’apea ma le la tama o Petelo, i le mea e ao ona fai pe a aulia a taeao.

“Lo’u tina Eseta, afai o Samuelu o lau tama, ae fa’afefea la a’u, o ai la so’u tina, e fa’anoanoa lava lo’u loto tina, i lo’u fa’alogo atu i au tala ua tu’u lafoa’i mai. O tala e le lelei ai ni aiga, o tala e le maua ai se nonofo fealofani o ma’ua ma lo’u uso. E sili ia ona ou alu ‘ese atu pe afai o le faiga lea o oe, o le a ou alu e su’e se isi fafine e fai ma o’u tina, pe afai ua e le alofa i a te a’u.”

Pei e ‘ai e ni pi le lo’omatua i lea taimi, ua fememea’i nei ua le mafai ona toe fai mai se tala. A’o le taimi lea, ua na o le tilotilo ane o le toeaina o Paulo i si ona atali’i. Na toe fa’apea tala a Petelo, “Lo’u tina Eseta, va’ai oe le tina, ana i ai so’u loto ma so’u manatu i mea uma na ua e lafo mai, e le o’o lo tatou aiga i se tulaga lea ua i ai nei. Ana ou fa’aaogaina fo’i upu ma tala a tagata e fai mai i a te a’u e uiga i a Samuelu, ua leva lava ona o’o lo tatou aiga i nisi tulaga, ae va’ai oe le tina, e folo molemole lava, folo ma le onosa’i, folo ma le alofa, e le o se isi, o lo’u uso, o lo’u toto, ivi ma a’ano.” Ua tau le mafai ona tatala Petelo i lea taimi, ua pei o timuga ua afuto ifo mai le lagi ona loimata.

Na tilotilo ane nei i ai si ona tama, ua lagona fo’i e Paulo upu ua tautala ane ai lona atali’i i lea taimi, ua lagona le alofa, lagona le loto maualalo i lea taimi, aua o lea ua fa’alogo mai, ua avatu se fautuaga ma se tu’u alalo a le la tama. O le lo’omatua i lea taimi, na fea’a ona vae toe valusi mai le fala, a’o lea ua pei o se lupe ua olo i lea taimi. Ua meia le lo’omatua, aua o lea ua tautala sa’o lava Petelo i le mafua’aga o mea uma lea o lo’o tutupu i totonu o lo latou aiga.

Na i ai le manatu o le toeaina o Paulo, e sili pe a taofi atu ia lona atali’i, ona ua le mautonu lona mafaufau i le mea e ao ona fai i lea taimi. Peita’i, ua le toe fa’atali Petelo, ua alu fa’asasa’o lava, e moni ai le tala fo’i lea, a maua loa le avanoa fai loa, aua a toe fa’atali mo se isi taimi, ia ua leai.

Na matua’i liliu lelei Petelo i lona tina, ua lagona le tiga o lona loto, ona ua fa’alogo ona taliga ma ua va’ai ona mata i uiga ia o lona tina. E i ai lava taimi pe a fa’atasitasi le aiga o Paulo e saua ai lava i le fa’alogo a Petelo ia tala a tagata e uiga i lona tina. Ae sa ia onosa’i pea, se i ai se taimi ona talanoa lea i ai, peita’i, o lea ua fa’alogo ona taliga ma va’ai ona mata i uiga o lona tina, ua lagona ai lona fa’anoanoa.

“Eseta lo’u tina, e ofo lava lo’u loto, i lou mafai ona lafo nei fa’amatalaga fa’apea e uiga i a te a’u, a’o lea e pupula atu o ta mata, Eseta, na o le tina e le alofa e mafai ona lafo ia upu fa’apea, ona lagona ai lea o lo’u fa’anoanoa tele i a te oe le tina.” Ua tau le mafai e Petelo ona tautala i lea taimi, ae ua taumafai mai pea, se i tu’u atu sona manatu i lona tina, ina ia iloa ai e lona tina. E le fa’apito lana tausiga i so’o se mea o le aiga.

E faia pea…