Vaega: 23

Malo le soifua, taeao manuia i le alofa ma le agalelei o lo tatou Tama oi le lagi, e i ai pea le fa’amoemoe maualuga, o lo’o maua pea e le atunu’u le soifua laulelei, i lou alafa’i a’e i fanuga lelei o lenei aso fou. E ao ai ona o tatou fa’afo’i le vi’iga ma le fa’afeatai i lo latou Matai oi le lagi, ona o Lana tausiga alofa mo i tatou e le mavae. Ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le a feagai ai.

Na muta mai la tatou tala ina ua toe manatua e le tama o Petelo le mea na o’o ia i lo latou aiga, ina ua iloa le gaoiina o le latou ma’umaga e tuagane o Losalina. Na fa’asolo fa’asolo lava mafaufauga o Petelo, ua uma le tagi, ae ‘ata. “Se o lo’u tina se, e leai se isi e ola ai, a sau le tagata e fia ola, e vave lava ona uma i faiga a le lo’omatua lenei.”

Ae se i o tatou tulituliloaina po’o fea o le a o’o i ai la tatou tala mo lenei aso. Ua talatalanoa fa’asamasamanoa nei Paulo ma Eseta ma le la tama o Petelo i lea lava afiafi, ina ua tuana’i le mataupu faigata na feagai ma i latou. Na toe fa’apea ane nei le lo’omatua o Eseta, “E, e se e pei lava ua toe sau lo ta fia ‘ai, e i ai se mea e totoe Petelo, se i tali ifo ai lo’u manava.”

Ua ‘ata le toeaina o Paulo ma fa’apea ane, “Ia ua a la, va’ai o le fia fa’amisa ma le fia maualuga e mole a i lava le manava o le tagata.” Na pupula fa’asiasia ane nei i ai le lo’omatua, “Se Paulo, se tu’u au tala na, o lea fo’i ua lelei ifo mafaufau o tagata, ae o le a e toe fa’aosooso mai fo’i, se fai mai tala e fa’afiafia ai lo’u loto, ae le o tala e toe oso a’e ai fo’i le tiapolo.”

Fai mai, toetiti pu le alaga o si toeaina o Paulo i le i’ini a lona atali’i ma lulu ane i ai lona ulu. Ua ‘ata le toeaina ma fa’apea ane, “Ia Kelo, alu atu ia po’o i ai se mea o totoe e au mai ma lou tina.” Na tu a’e nei i luga Petelo ma savali atu i tua, ua ia manatu le fasi moa e tasi lea na ta’ele’ele i totonu o le ‘ulo, le na tu’u ma si ona uso o Samuelu, a’o lea la o le a toe fai ai le mea’ai a lona tina.

Na asu a’e nei e Petelo le fasi moa lea ma tu’u i totonu o le ipu, ua a’apa atu nei i le isi ipu, lea sa teu ai le fa’alifu talo ma Samuelu, ua toe avane nei mo lona tina. Ua si’i ane nei e Petelo le mea’ai ma lona tina, na fa’ate’ia le lo’omatua ina ua va’ai mai, o lea ua toe avatu le isi fasi moa i lana ipu. “Petelo, o fea na au mai ai le fasi moa lea, fa’apea lava a a’u ua uma le supo moa, a’o lea e totoe lava.”

Na tali Petelo, “O le fasi moa na tu’u ma Samuelu ma le fa’alifu lena na teu mo ia, ia a’o lea ua le sau, ia ua misi lava e ia le pasi moa e le toe alu.” Ua te’i le toeaina o Paulo, aua sa i ai lona manatu e le lava le moa na fai ai supo, a’o lea ua fa’atotoe e Petelo le fasi moa e tasi ma lona uso.

Ua toe manatua nei e le toeaina, e lua tau’au o le moa, lua vae ma le papatua, o lea na ‘ai e la’ua tauau e lua ma vae e lua o le moa, a’o lea e totoe le papatua o le moa, o lona uiga, na o le suavai na ‘ai e si ona atali’i o Petelo, a’o lea na teu le fasi moa lea ma si ona uso o Samuelu.

Ua tilotilo ane nei le toeaina i ai Petelo, ae ua ‘ata’ata le tama ma lue ane lona ulu i lona tama. Ua punou le toeaina, ua le tautala ma ‘ata ane i si ona atali’i e pele i lona loto. “Seta, ia alo loa i lau taumafataga, o lona uiga e leai se moa na ‘ai e Petelo, ae o le mea le na tu’u e Petelo ma Samuelu.”

Ua tu’u i lalo le fasi talo a le lo’omatua o Eseta, ae ua tilotilo ane nei i lana tama matua o Petelo, “Kelo, talofa e, i si a’u tama, e talofa e i a Kelo, fa’afetai i lou alofa i si ou uso, e ui lava ina fa’atiga loto ma fa’atiga mafaufau, ae ua ou iloa lava lou alofa i si ou uso, fa’afetai Kelo, fa’afetai mo lau tausiga o ma’ua, ua malie lo’u loto i mea uma.”

E faia pea…