Vaega: 42

Ua tausagi mai manulele I le taeao, ua oso a’e fo’I le la I lona nofoaga masani, ma ua o tatou iloa ai le alofa ma le agalelei o le Atua Soifua, e ala I Lana tausiga alofa mo I tatou I le po anapo, o lea ua o tatou toe alafa’I mai ai I le manuia I lenei aso fou. Fa’afo’I laia o le fa’amanu ma le fa’afeatai I le Atua, ona o Lana tausiga alofa e le mavae I aso uma o lo tatou ola.

Ae alo maia o le a toe fa’aauau atu la tatou tala mo lenei aso, ae ia manuia lou alo atu I faiva ma tiute o le a feagai ai. Na muta mai la tatou tala, ina ua toe alu nei le pasi e aga’I atu I Fagatogo, lea o lo’o I ai Paulo ma Eseta, o uiga malie o le lo’omatua o lea ua va’ai tino I ai tagata I lea aso. E le kea lava Eseta I se tagata, o ai lava e fai mai o le a ma le a, e pei o le selo I le lo’omatua.

E fai la e Eseta uiga nei, ae ma ai si toeaina o Paulo, ona o se toeaina e filemu, ae a toe manatu I ai le lo’omatua, e fa’apea ai ana tala, “Se Paulo, se o oe se, e te filemu mai e pei o se lupe ae e te fea’I e pei o le gata, tu’u la’ia, taumafai e tautala ma fa’amalamalama lou mafaufau I mea e tatau ona fai. “

Fai mai, a’o alu pea le pasi, e le i faitauina e le lo’omatua le aofa’iga o le tupe na tu’u ane e lona tuagane o Samuelu i a te ia. O lea ua matua’i fa’amafanafana lelei e le lo’omatua i le pito i lalo o lana ‘ato lea ua toe titi so’o atoa i filo, lea o lo’o su’i ai. O lea la ua alo ane nei e fai le fa’afiafiaga o le au pasese, ae alu atu ai i tua ma le fa’asalalauga le totogia a le lo’omatua. “Le mamalu o le pasese, afai lava ua i ai se tasi ua tau lagona sina mea pe fia tula’i, e mafai lava ona fa’atu le pasi, e malamalama lava le mataupu, o lea fo’i e silafia lelei lava e le susuga i le avepasi, e sa’o a’u Poni?”

Fai mai ua alu le tali e, a le pasese i lea taimi, ua leai se tasi na toe tautala. Ae ina ua o’o i le pito lava o le nu’u o Nu’uuli, na fa’alogoina ai loa le tatagi o le logo fo’i le e toso e le tagata, pe afai e mana’o e fa’atu le pasi.

Ua fetilotilofa’i solo nei le pasese, ma ua fa’atu loa e le avapasi e le i toe fa’atali i lea taimi. Ua iloa lelei lava e le avepase le mafua’aga ua toso ai le logo, ona ua fia lagi pese malie a lana pasese. Na toe manatua ai nei e le ave pasi o Poni aso a’o ave pasi i Samoa, fai mai e alu alu lava le pasi i luga o le mafa, ta’i lava ua vala’au atu le pasese. Se i fa’atu atu lava i luga o le mafa, ia ua iloa lelei lava e si toeaina o Poni le mafua’aga, ua fia lagi pese malie a le pasese i lea taimi. ia e fa’apena fo’i le mea na o’o i ai Tutuila nei i la aso.

Ia o lea la ua tu nei le pasi a le tama o Poni i le tuaoi o Nu’uuli ma le isi nu’u, na muamua lava i lalo le toeaina o Paulo, ona alu atu ai lea o le solo fa’aniutu. O le toeaina o le lo’omatua, o tama, o teine, ua tau su’e lava le mea e fa’atu ai le tagata latou, ua le popole pe toe kea ane lava i le isi lea e i ona talane. ia o na  vaitaimi e leai lava ni manatu fa’apea a mea la o le a ma le a, e  ma ma lava loto o tagata. A’o vaitaimi nei, e le toe fai atua lava se tala, ua alu fa’asolo atoa lava ua le iloa se tapasa.

E leai lava ni nei mea ua tutupu mai, ua u’u lava e le toeaina le lima o le tama’i teineititi ma o fa’asasao ai lava, o se uso o se tama o le teine, ua toe toto ai lava, talofa e, e moni ai la upu e fasi le gata a’o pupula ona mata. O ituaiga tagata nei ua sa’o ai le tala a le lo’omatua o Eseta, se i iloga e nonoa ni ma’a i ua ma fa’amagoto ifo i le moana sausau se fai ai le tausamiga a ‘ia feai.

Na va’ai atu nei le avepasi ua fai si umi o fai fa’amalosi tino a lana pasese, o lea na fa’ae’e ai loa le pu o le pasi, ma ua toe sau nei le solo i totonu, ma alu sa’o loa ma le pasi e le i toe fa’atali lava i se tagata. E fetaui lava le taunu’u atu o le pasi mai le itu i Sisifo, ae tu loa fo’i ma le pasi mai le itu i Sasa’e, lea o lo’o o mai ai Samuelu ma le uso o Paulo, le ali’i Faifeau o Sila.

E faia pea…