Vaega: 43

Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga alofa mo i tatou lea o lo’o tatou maua ai pea le ola i aso ta’itasi. E ao ai ona o tatou fa’apea ifo, “Le Ali’i e, ia e alofa mo toto i o matou loto le filemu, le onosa’i ma le fa’apalepale, ina ia mafai ai ona matou tali atu i le tele o fa’afitauli o le soifuaga nei, a’o le vi’iga ma le fa’afetai matou te fa’afo’i atu i Lau Afio i lenei aso ma aso uma o lo matou ola, Amene.”

Na muta mai la tatou tala i le vaega tolusefulufa, ina ua taunu’u manuia le malaga a le toeaina o Paulo ma le lo’omatua o Eseta i le maketi i Fagatogo, ae feagai tonu fo’i ma le taunu’u ane o le pasi o lo’o o mai ai le Fa’afeagaiga o Sila ma le tama o Samuelu. Ua tu nei le pasi mai Amanave i le isi itu o le maketi, ua o mai nei i fafo le pasese, fai mai e le i minoi lava lima o le lo’omatua e avane se tupe mai i lana ‘ato e totogi ai o la pasese ma le toeaina.

O lea ua topetope le alu o lalo o le isu latou i isi fafine na o latou o mai fa’atasi, “ia fa’avavevave mai pe a uma a outou feau ma fa’atauga, aua a misi loa le pasi, ia ua fa’apupu’u solo i le maketi. O lea fo’i o le a ou i a Poni, o le tagata lava e tuai mai, ti’ai loa lava e le toe fa’atali.”

Ua tau fai ta’ape solo nei le pasese mo a latou fa’atauga i lea aso, e fa’atalitali ai le toe fo’i o le pasi i Amanave. E lafo ane lava tala a le lo’omatua o Eseta ma savali lava i le isi itu, a’o lea ua tu nei le toeaina o Paulo, e tau totogi o la pasese. O upu moni lava, o lo’o mafanafana lelei i le ‘ato a le toeaina le tupe na maua mai ina ua fa’atau le aumatua (pua’a) i le vaiaso ua tuana’i e le isi aiga i Fagamalo. O lea la o lo’o mafanafana lelei lava le tupe lea i le ‘ato a le toeaina, ae se i vanaga ai le seleni na tu’u mo si ona atali’i o Petelo.

Atonu o lo’o maitau pea e le lo’omatua le tupe lea, fua i le le gaioi e avane se tupe e totogi ai o la pasese, a’o lea ua lavea ai si toeaina. O lea ua savavali nei i le isi itu o le maketi e fai ai sa la talatalanoaga po’o le a le mea o le a fai. Aua a fa’atali i le alu o le pasi i Tula i na vaitaimi, o lona uiga e momoe ai i Tula, fa’atoa usu mai lea i le pasi usu o le taeao.

Na ona tu lava o le pasi mai Tula, pei o le a le autilotilo a le lo’omatua ma le toeaina i lea taimi. Ae ua fa’ateia, ina ua tilotilo atu, ae fetaui loa ma le oso mai i lalo o le Fa’afeagaiga. “Auoi, Paulo, se i va’ai atu, o Sila lea e oso mai i lalo o le pasi.” Ua galo i le lo’omatua, o lea fo’i e tilotilo toto’a atu i ai si toeaina i lea taimi, ma ua na iloa atu ai lona uso Faifeau.

A’o fa’asolosolo mai pea i lalo le pasese mai le pasi a Tula, na mulimuli mai lava i fafo le tama fa’alogogata o Samuelu. E le i toe fa’atali le lo’omatua o Eseta, tu a’e loa i luga ma tamao’e atu i le mea o lo’o tu mai ai le pasi. A’o le Faifeau lenei, o lo’o tu ma talatalanoa ma nisi tagata o lana aulotu lea na o latou o mai fa’atasi i Fagatogo.

Na fa’ateia le Fa’afeagaiga i le fa’alogo mai o alu atu le tau vala’au, “Samuelu, Samuelu, talofa e, i si a’u tama, Samuelu.” Na liliu nei le Fa’afeagaiga ma tilotilo mai i le itu lea e alu atu ai le tau vala’au, ma ona iloa mai ai, o le to’alua o lona uso lea o lo’o tamo’e atu ma tau vala’au le igoa o Samuelu. Fai mai, ua tuai lima o le toeaina o Paulo, e toe a’apa atu e taofi mai le lo’omatua o Eseta, ae ua i luga le lo’omatua ma alu i le atoa, i lona fia feiloa’i i lana tama.

E faia pea…