Vaega: 64

Tatou fa’afo’i pea le vi’iga ma le fa’amanu i lo tatou Matai oi le lagi, ina ua o tatou va’aia ataata o ta’uleleia i lenei aso fou. E ao ai ona o tatou fa’apea ifo, “Le Ali’i e, e le lava upu o le gagana e sula ai Lou alofa ma Lou agalelei mo i matou, ae ua matou o atu i ou luma i lenei aso, e fa’afo’i atu le vi’iga ma le fa’afetai i Lau Afio e fa’avavau, fa’avavau lava, amene.”

Ua toe fa’asolosolo mafaufauga o Petelo i si ona uso fa’alogogata o Samuelu, ae maise ai o le aso na fa’atotolo solo ai e Samuelu i a Solo, o lona uiga, ua iloa e Samuelu le mea lea, a’o lea fa’atoa ia iloaina. Leitioa fo’i a musu Samuelu e fai se la uo ma Losalia, ona o le mea tonu lava lea. Ua toe nofo tata a’e i luga Petelo, “O, ia ua mate ai Solo, ae ailoga ua tofo Solo i le mamafa o o’u lima, e feololo lima o Samuelu e tau tu’u mai, a’o o’u lima, e matua’i gau lava pou o le isu o Solo pe a ou tagolima i ai.”

O mafaufauga ia o Petelo na i’u ai ina o’o i le mea’ai lea na a’ai ai Misi ma Solo i le afiafi lava lea, o lona uiga e ‘ai si ali’i o Solo, ae pei e ula mai i a te a’u, ona o lea o lo’o fai si a la fa’alapiti ma Losalia. O nei mafaufauga uma ua totogo a’e i le loto o Petelo, o mafaufauga lava e feoa’i ai to’i ma naifi, ae sa fa’asilisili i le tama lona manatu, ia tausia le filemu, ma e le to’ilalo ai, afai ua alofa Losalia i a Solo, o le a le mea o le a ia mafai, afai fo’i ua alofa Solo i a Losalia ia o le mea lea e tatau ona fai.

A’o ia, o le a fa’atafatafa a fuga e pei o le fetalaiga i vaifanua o le Sa’ofa’apito ma Salevalasi. Na toe a’apa ane nei Petelo i le kitala, alu loa ma le pese, “Ua ou vaivai ua ou fia moe, ae le mafai ona galo oe, i si o’u nei fa’amoemoe, moe, moe…..”

Ae tali mai le pili o lo’o nofonofo lelei lava ma tilotilo ane i a Petelo, “Ioe, Kelo, moe loa oe, se ua ga o mea gau lava mea a ta’ua e maua, moe loa, ‘kagi so’o, kagi so’o.”

O a lava la nisi mafaufauga ua a’e nei i le loto o Petelo, ua tasi lava lona manatu, “E sili a le toa na te pulea lona loto, na i lo le toa na te a’ea le ‘olo.” O le manatu lea na mafai ai ona fa’ato’ato’a e Petelo lona loto i lea afiafi. Ae se i tatou liliu atu i le Faletua o le Fa’afeagaiga o Sila ma lana fanau po’o fea ua o’o i ai i lea afiafi.

Manatua fo’i le lo’omatua o Litia lea na alu ane i le fale o le Faifeu, o lea ua i’u lava ina moe ai. Fai mai e ao lelei lava e le i maua se moe, aua ua fai nei le talatalanoaga ma le Faletua o Su’e. E leai ni upu fo’i lea e fetufa’ai ai i ni mea e lelei ma mautu ai le mafutaga a tina o le aulotu, ae ua na o le fa’avi’ivi’i lea ua fai nei e le lo’omatua i le Faletua o le Fa’afeagaiga i lea po.

A uma lea, ua muimui lea, a uma lea liliu ane i lea tina, o tala e malepelepe ai aiga, o tala e maua ai le feitaga’i i le va o le tina o le aulotu lea ua fai nei i lea afiafi. Ae manatua, o Satani lava ia e sau e fa’aosooso ina ia fa’aleaga lea ma fa’aleaga atu lea. O le mea tonu lava lea ua tupu nei i le Faletua o Su’e ma le lo’omatua o Litia.

E faia pea…