Vaega: 63

Fa’atalofa atu ma fa’afeiloa’i atu i lou maleifua mai i fanuga lelei o lenei aso fou, tatou fa’afo’i la’ia o le mua i le Atua Soifua, ona o Lana tausiga alofa mo i tatou i aso uma o lo tatou ola. Ae alo maia o le a toe fa’aauau atu la tatou tala, ae ia manuia faiva ma tiute o le a feagai ai i lenei aso.

Na amata le talatalanoaga o lelei, ae fa’aiu ane ua amata ona masesei, o le ala lea na lafo ai loa le manatu, e sili pe a fa’ata’atia se i sau se taimi ona toe potopoto lea o le aiga.

Ua fa’apea lava ona fai, ua moe le toa, ae se i aulia se isi aso ona toe talatalanoa ai lea i mea o lo’o tutupu i lo latou aiga i tua. Ua fa’ai’u puta le talatalanoaga i lea afiafi, aua ua tagi le lo’omatua o Eseta, “Lau susuga i le Fa’afeagaiga, fa’apea fo’i le alaala atu o Salamasina, e  tiga lo’u loto, aisea, ona ua fai so’o, fai so’o, tiga ona  iloa e le o ni o latou ‘ele’ele, ae taumafai lava e fai auala pi’opi’o ina ia maua ai, e tiga lo’u loto, leaga o le a faoa e tagata ‘ese ia ‘ele’ele sa afu liligi ai ma afu toto ai tama ma tina i tausaga e tele. O le ‘ele’ele lenei o Alava’a, o le fa’asinomaga tonu lava lea o lo tatou aiga, tatou finau ma le loto tele, ina ia ‘aua ne i faoa lo tatou fa’asinomaga ae masie mo a tatou fanau i le lumana’i.”

Ua fa’ai’u puta le talanoaga a le Fa’afeagaiga, o Paulo, ma lo la tuafafine o Salamasina, ina ua tagi le lo’omatua o Eseta. Ae na fa’ato’ato’a lava e le Fa’afeagaiga mea uma o lea afiafi, o lea na i’u ai i le filemu ma ua tasi ai se manatu, o le a moe le toa, ae sema se mago, i le aso fou o le Ali’i, e toe talatalanoa ai ma fetufa’ai ai i mea o le aiga.

Ae se i liliu la tatou tala, po’o fea ua o’o i ai le fa’amuli a Petelo, lea ua fa’alogo ona taliga ma pupula ona mata i le fasiina o Losalia e lona tina. Ua ta ta le kitara a le tama i lea afiafi, ua te’i lava ua maligi ifo ona loimata, ua fa’asolosolo ona mafaufauga i le mea na ia va’ai i ai i lea afiafi i le fale o matua o Losalia. E monilava le upu, o musika malie, e maua ai le fiafia o le loto o le tagata, o lea la ua taumafai nei Petelo e fa’agalogalo le gau a’ano lea ua i ai.

Ae peita’i, ua fiu lava le tama e fa’agalogalo ae ua lagona lava le tiga o lona loto, i a Losalia, ae maise ai o Solo lea ua maua nei le tala, o ia lea na eva ma Losalia, ae maua atu ai e ona tuagane, lea la ua ‘afu ai nei i faiga a lona tina. O le taimi lea, ua oso a’e lava Satani i le loto o Petelo, ua le maua ai se mapusaga o lona mafaufau. Ae e pei lava e musumusu ane se i a te ia, ‘ia nofo i lalo ma toe mafaufau, ma saga mafaufau i le mea e ao ona fai.

O le tulaga la lea ua o’o nei i ai Petelo, ua fa’asolosolo ona mafaufauga e fa’apea, “Se, o lo’o tele lava ‘ia o lo’o tata’a i le sami, ne i fa’apea lava a Losalia na o ia se ‘ia, o mea fo’i fa’apenei e fai i ai le loto o le tagata, a’o le tagata lava ia e to’a ma tele lona loto, fai le auala e silisili ona filemu, o i’ina e iloa ai le tagata e toa lona loto, o upu lava o lo’o sau mai le Tusi Paia, “E sili le toa na te pulea lona loto, na i lo le toa na te a’ea le ‘olo.”

Ua toe tatagi uaua o le kitala a Petelo, ua uma le pese, “Losalia la’u pele, e sili i lo’u fa’amoemoe…….” Ae ua alu le isi pese a le tama, “Honey, fo’i mai, ua le mafai ona ou ‘ai, ua le mafai ona ou moe, i le fia va’ai i a te oe, ou te nofo ma o’u tagi, fia va’ai i a te oe Honey…….” Ua motusia fa’afuase’i le pese, ae taoto ifo i lalo Petelo ua lagona le vaivai, ona o lona loto ua matua’i mafatia lava i faiga a Losalia lea ua ia iloa nei.

E faia pea…