Vaega: 69

Fa’afo’i pea le vi’iga ma le fa’afetai i le Atua Soifua, ina ua mafai ona toe alafa’i mai i le manuia le atunu’u i lenei taeao fou i Lona alofa ma Lona agalelei, e ao ai ona o tatou sunu’i lapalapa o malo ma fa’afo’i le mua i le Atua, aua o Ia lava e ona mea uma lava.

Ia manuia faiva ma tiute o le a feagai ai i lenei aso, ae alo maia o le a toe fa’aauau atu la tatou tala, Lupe o le Filifili e pei ona masani ai. Na muta mai la tatou tala ina ua fa’asolosolo mafaufau o Petelo i lona uso o Samuelu, lea o lo’o aunagi ane pea, e ‘aua ne i feoa’i pe fai fo’i sa la uo ma le tama’ita’i o Losalia, ona ua iloa lelei e Samuelu le tulaga o lo’o i ai Losalia.

Fai mai, na maua lelei lava e Samuelu le ‘ato talo lapo’a lava na ave e Petelo i tuagane o Losalia, na iloa fo’i e Samuelu ‘ato kukama ma le ‘ato pi u’umi na ave e Petelo i tuagane o Losalia e fai ai sa latou mea’ai. O le mafua’aga tonu fo’i lea na o’o ai le lima o Samuelu i le isi tuagane o Losalia, ona ua iloa lelei e Samuelu, o lo’o fa’ase’e e Losalia lona uso, ina ia maua atu ai mea e a’ai ai.

Na uma ona fa’atotolo e Samuelu le tuagane matua o Losalia, toe liliu ane, ua fa’asau le toto i le gutu ma le isu o Solo. O lea fo’i la na sala ai matua o Petelo ma Samuelu i luma o le nu’u. O mea uma nei ua toe mafaufau nei i ai le tama o Petelo, a’o fa’agasolo pea le la talatalanoaga ma Misi.

Ua va’ai atu nei Misi ua ‘ese lava foliga ma uiga o Petelo i lea taimi, e foliga mai o se tagata ua matua’i mamafa tu lava se avega o lo’o ia amoina. Ua lagona le alofa o Misi i a Petelo i lea taimi o le ala lea na ia talanoa ane ai ma tu’u ane se fa’amama avega i a Petelo i lea taimi.

Ina ua ma’ea le fa’amatalaga a Petelo i le mea na tupu, ua na o le pupula alofa ane o Misi i a Petelo. “Petelo, va’ai oe le uso, e te le to’ilalo ai, ou te iloa ua e lagona le tiga i le taimi lenei, ae va’ai oe, a tonu e le o sou tofi lea, aua afai o amioga ia a Losalia, o lona uiga, e fai pea fai pea, ona e tiga ai lava lea, ae va’ai oe le uso, e le na o ia se tama’ita’i o le nu’u, to’atele tama’ita’i lelei, e fetaui tonu ma oe. Ae o le a fai atu la’u tala lea Petelo, e toe inu lava Losalia i ana mea na fai, ae ia e maua le onosa’i ma le fa’apalepale, e au mai e le Atua sou tofi lelei i se taimi oi luma.”

Selau pasene le fautua lelei a Misi lea ua fai i a Petelo, e to ai la lo’u pulou, ona o le lelei o fautuaga i taimi o tiga, ae talosia e to’atele ni Misi o lo’o soifua i totonu o Samoa i vaitaimi nei. Aua o le tele o Misi o lo’o i ai, o le ituaiga Misi fo’i lea, e tau fa’aosooso e pei o se tiapolo, alu i ai, ne i fa’apea lava e te le mafai se mea, tagolima i a Solo, se i ona lagona ai le mea leaga ua ia faia.

Ae e leai, ua fai le galuega lelei a Misi o le tu’u atu lea o se fautuaga ua silisili ona lelei, e maua ai le filemu, e to’a ai le loto ma le mafaufau, e sili le toa na te pulea lona loto, na i lo le toa na te a’ea le ‘olo.

Amuia Misi, na te tu’u atu fautuaga lelei i taimi e mo’omia ai, amuia Misi, na te maua le agaga o le fa’amagalo, ma o lea fo’i ua talia ma le loto maualalo e le tama o Petelo.

Amuia fo’i Petelo latou, na te maua le fa’apalepale ma le onosa’i i mea uma, ae a tu’u ane la i a tatou, ia ta’ilo, ta te le fia faia lava se tala. Aua ua tau le maua ni Misi ma ni Petelo i Samoa i aso nei. Pau Misi ma Petelo lea e i ai nei, o le au tiapolo tau fa’aosooso i mea e leaga ai le isi uso a tagata. Ae tatou tatalo fa’atasi, ina ia ‘aua ne i tele i Samoa ni Misi ma ni Petelo lelei.

E faia pea…