Vaega: 74

Fa’atalofa atu i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Ali’i e, matou te fa’anaunau atu lava i Lau Afio, aua ua o matou talitonu o Oe o lo matou Maluapapa ma lo matou ‘Olo Maualuga, matou te malu ai i faigata ma puapuaga o le soifuaga nei. Alofa mai i a i matou i lenei aso, a’o le vi’iga ma le fa’ane’etaga, matou te fa’afo’i atu i Lau Afio e fa’avavau, fa’avavau lava, Amene.”

Ae alo maia, o le a toe fa’aauaua atu la tatou tala fa’asolo, Lupe o le Filifili mo lenei aso, ae ia manuia faiva ma tiute o le a feagai ai i lenei aso. Na muta mai la tatou tala, ina ua fai nei tala a le toeaina o Paulo ma lona uso Faifeau o Sila i le Maketi i Fagatogo, a’o lea o lo’o fa’alogologo i ai le lo’omatua o Eseta.

Ua fa’ate’ia le lo’omatua i le fa’alogologo atu i tala a Paulo ma lona uso o Sila, aua e le i fa’ailoa ane e le toeaina i a te ia, a’o lea ua fai a la tala ma Sila, ae na te le iloaina. Na tu’u pea e Eseta se i fai le tala a Paulo, ona o lea o lo’o i ai le Fa’afeagaiga, e moni lava o a nisi uiga o le lo’omatua, ae a auai loa le uso lea o Paulo, e matua’i fuli le lo’omatua e teuteu fa’alelei si ana amio. O lea la ua fai nei, ona e leai se upu e tasi na gagana ai Eseta, a’o fa’agasolo pea le talatalanoaga a Paulo ma lona uso Faifeau o Sila.

O le isi itu na fa’amamafa i ai le tautalaga a Paulo i lona uso, o le mataupu lea i le Fa’amasinoga lea o lo’o loma nei e uiga i le fanua o lo latou aiga, lea ua i ai le manatu o le isi aiga o o latou ‘ele’ele. Ae o le upu moni lava, e leai se isi e malamalama tele i le fanua lenei, ae se i vagana ai le lo’omatua o Eseta ma le teine o Salamasina. O le ala fo’i lea e mimita tele ai le lo’omatua o Eseta, ona o mea uma o le aiga i tua, ua iloa uma lava e Eseta.

Ae o le taimi muamua lea ua fesiligia ai le aia o le aiga i le ‘ele’ele lenei o Alava’a, ona e leai lava se isi na iloaina, ae ua na o matua lava o Paulo ma Sila. O le mea fo’i la lea e tu ai le tuiga o le lo’omatua o Eseta, ona ua iloa lelei e Eseta ia tuaoi ma tala’aga o fanua uma o le aiga o Paulo. O le upu a le lo’omatua e masani ona lafo pe a fai ni a la finauga ma le toeaina, “Paulo, o mata a nei na va’ai, o taliga fo’i nei na fa’alogo, a’o laiti le ta fanau o Petelo ma Samuelu, o mata nei Paulo, so’o se ‘ele’ele o le aiga lenei, e leai se mea e ga se i le tagata lenei, pe o a’u lava o le nofotane, ae ua iloga a’u galuega i totonu o le aiga lenei, fai lelei mai au faiga, ua e fa’alogo mai.”

A o’o loa le talatalanoaga a Paulo le Eseta i le itu lea, ua na o le nofo o si toeaina ua le tautala, ae ua tu’u lava le lo’omatua latou e fai le mea e loto i ai. E le i umi, ae taunu’u ane loa Samuelu ma le fa’atauga a le Faifeau, ua tu’u nei i totonu o le atigipusa, ma ua fa’ata’atia ‘ese nei. O le atigipusa a Paulo ma Eseta na fai e lona tufafine o Sala, ua atoatoa mea uma o lo’o i ai, a’o le pito lava i lalo o le atigipusa, o lo’o i ai le afifi lavalava, o alofa’aga molimoli ia o tuafafine mo o latou tuagane.

O le a le tele o mea e maua e le tagata, ae a aunoa ma le alofa, ua leai se aoga o mea uma. O le a fo’I le fai mai, o lo’o tutupu pisinisi ma mea uma, ae a le alofa, e pei lava o le fale e tu fua, e leai se aoga.

E faia pea…