Vaega: 81

Tatou fa’afo’i pea le vi’iga ma le fa’amanu i lo tatou Matai oi le lagi, ona o Lana tausiga alofa mo i tatou e le mavae, e ao ai ona o tatou fa’apea ifo, “Le Atua e, fa’afetai, fa’afetai tele, i le taulaga tutasi na e molia mo i matou mo lo matou fa’aolataga, ia avea ma vai fofo i o matou ola fa’aletagata, ae ia fa’asilisli lo matou ola fa’aleagaga i Lau Afio, Amene.”

Ae alo maia mo le toe fa’aauauina o la tatou tala mo lenei aso, ae ia manuia le alo atu o le atunu’u i feau ma galuega o le a feagai ai. Na muta mai la tatou tala ina ua o tatou faitau i le fanau a le teine o Salamasina, le tuafafine to’atasi o Paulo, Sila, Pati, Eteuati ma Falaniko.

E maua lava le feso’ota’iga a Salamasina ma Larry ma le la fanau, ona e fa’aaoga le masini mai le Vaega a le Navy e talanoa ai. E i ai fo’i taimi e mafai ai ona vala’au Sala e asi nai ona tuagane o Eteuati ma Falaniko, ae sau ai le tala a tuagane o Sala ma tali e mai, i tala a lana fanau e fai. A’o le tali a Salamasina i ona tuagane, “Eteuati ma Falaniko, alofa ane i si a’u fanau, taumafai ia maua pea se avanoa tou te mafuta ai ma fa’atasitasi, e ui lava ina fa’apea o lo’o nonofo i matua o Larry, ae o lo’u mana’oga, ia iloa ma o latou manatua pea lo latou tupu’aga i Samoa nei.”

Ua taunu’u le malaga a Paulo, Eseta ma Samuelu i lo latou fale, fai mai e taunu’u ane i lea afiafi ua amata ona pogisa. Ae ua vela le mea’ai a le tama o Petelo e fa’atali mai ai le malaga mamalu a ona matua. E le i o’o lelei Paulo ma Eseta i le fale, ae alu le tauvala’au a le lo’omatua, “Kelo, Kelo, o fea oe, o lea ua  matou o mai.” O le taimi lea, o lo’o tau fa’amuolu le ofuave o Petelo, ona o lea fa’atoa uma lava ona fa’amalu le tama, ina ua fo’i ane i le momoliga o Misi ma lana ‘ato talo o popo ma moa Samoa e fa na fai e Petelo.

O nei mea uma e le i iloa e le toeaina ma le lo’omatua, ae ua liliu lava Petelo e fa’atino, ona o le alofa i a Misi, i le tele o le galuega na afu lelea ai Misi i lea aso atoa. O lea la ua fo’i ane ae fetaui tonu ma le taunu’u ane o le malaga a ona matua ma lona uso fa’alogogata o Samuelu.

“O a’u lea e fai lo’u ofu, lea o le a ou alu atu.” O le tali ane lea a Petelo i le tauvala’au a lona tina. Na saofafa’i ifo nei i lalo le malaga, ae ua matua’i lagona le gapelu o si tama o Samuelu, aua o ia na amo to’atasi le atigipusa lea na avatu i a Salamasina. Ua ta’oto ifo nei Samuelu ma fa’aloloa ona vae i luga o le fala, ua lagona le vaivai. Na tamo’e mai nei Petelo ma tilotilo mai i le ta’o’oto vaivai o le malaga. Na muamua lava savali mai Petelo ma ta’oto ifo i talane o Samuelu ma ‘ene’ene le puimanava o Samuelu ma ‘ata.

“Ua a, ua e toe fo’i mai i lo tatou aiga, Samuelu, o si tagata lava ma si ona aiga, po’o fea lava e alu i ai, e le mafai lava ona tu’ua, o si ou aiga lava e malie ai lou loto, o a fo’i tala e lafo atu i a te oe, ia e onosa’i ali’i Samuelu, ae ave’ese uiga fia fa’ali’i na e leai lava se mea lelei e maua ai, ua e fa’alogo mai i a te a’u.”

Na nofo a’e nei i luga Samuelu ma tilotilo ifo i si ona uso, e mo’i lava e matua Petelo, ae e pei e matua ai Samuelu i ana faiga e fai i lona uso. O lea ua feiloa’i fiafia nei, ma ua toe fa’alelei le laumoli na fai. “‘Elu, tago ane i le atigipusa po’o a mea o lo’o i ai i totonu, lenei teine se, tiga lava ona fai atu e tu’u mea, ae le mafai lava, ia ai fo’i o lona alofa mai ia tatou, tago ane po’o a mea o lo’o i ai i totonu.”

E faia pea…