Vaega: 82

Taeao manuia i le alafa’i mai o le atunu’u i le manuia i lenei aso fou, o se aso e fa’aopoopo i lou soifua fa’apea ma si o’u nei ola. E ao ai ona o tatou momoli fa’atasi le vi’iga ma le fa’afetai i lo tatou Tama oi le lagi, ona o Lona alofa ma Lona agalelei, o lea ua tatou alafa’i mai ai i le manuia i lenei aso.

Ae alo maia, o le a toe fa’aauau atu la tatou tala mo lenei aso, ae ia manuia lou alo atu i feau ma galuega o le a feagai ai i le aso. Na muta mai la tatou tala, ina ua taunu’u manuia le malaga a Paulo, Eseta ma Samuelu i lo latou aiga. O lea ua tatala le pusa na fai e Salamasina mo i latou.

Fai mai ua fai le fa’atonuga a le lo’omatua o Eseta e tatala la atigipusa ma ua fa’apea lava ona fai, ua auaua’i mai nei i fafo le tele o le mau mea, letioa fo’i a vaivai si tama o Samuelu, ona o le tele o mea o lo’o i totonu o le atigipusa. Ua la’u nei i fafo, o fasimoli, o suka, o le masima, o le falaoamata, o le tele o ‘apa e fa’aaoga e fai ai a latou mea’ai. Na toe a’apa nei i totonu le lima o Samuelu, ma tago atu, o lo’o i ai le afifi o lo’o i le pito lava i lalo o le atigipusa.

Ua ava’e nei i luga, ma ua tatala, e tatala atu, o lavalava, o mitiafu o mu’umu’u o Eseta ma ofuae sapola (underwear) o lo’o i ai i totonu. Ua alu nei le tali e, a Eseta ma lana fanau tama, ae ua liliu i fafo le toeaina o Paulo ma soloi ona mata. “Paulo, talofa e, i a Sala, e le mafai ona galo i si ou tuafafine ou sapola, ai o le mea lea na e moe sa’esa’e vavale ai i lona fale e leai sou sapola, o lea ua au mai ai e si teine ia sapola o Larry e te sapola ai.” Ua toe alu le tali e a Eseta ma lana fanau, ae ua atili ai ona maligi ifo loimata o le toeaina o Paulo, “Talofa e, i si o’u tuafafine.”

O mitiafu ma ofutino e tusi ai lava le igoa o le tagata, a’o mu’umu’u lava ia o ofu ia o le lo’omatua o Eseta. Fai mai ua le iloga le itu e feliuliu’ai ai le lo’omatua ina ua va’ai i ona mu’umu’u matagofie ma le aulelei. Na i’u lava ina fa’apea le tala a le lo’omatua, “Se e silafia lelei lava e lana afioga i a Salamasina ia ‘ofu ou te aulelei ai, e matua’i selau pasene i a te a’u, fai mai lava ua ou lo’omatua, ae e leai, o lo’o malosi lava le afi o le ta’avale, na o le tino lava ua tau fai si tuai, a’o le afi latou e le mafai ona tuai, o lea la ua toe maua mai ma nei ‘ofu, ua atili ai ona malosi le afi o le ta’avale.”

E ‘ata lava Eseta ma fa’apipi’i ofu i lona tino ma feliuliua’i solo. “Paulo, ua e va’ai mai a, ua e va’ai mai, ia teuteu lelei mai lau amio, aua na ona fa’agapa lava o lima o le teine, oso mai le mea latou e le toe fa’atali, a’o oe, talofa e, o lau afi ua tau alu feto’i, ae toaga e fa’asuau’u lelei, ona alu lelei lava lea o le tama.” Ua alu le tali e a Petelo ma Samuelu, ma tilotilo ane i si o la tama i lea taimi, ua masani tama i tala a lo la tina. O nisi o taimi e malie, a’o le tele o taimi, e matua’i le fia fa’alogo lava i ai tama, aua ua sau ai i tua ma upu fa’alupelupeina.

Na i ai le manatu o tama o le a leai se tali a lo la tama, ae ua fa’ate’ia tama i le fa’apea ane o le toeaina, “Kelo ma ‘Elu, ia o le na ua oulua fa’alogo atu i le tala a si o oulua tina, e moni lava ia, ae o le mea e sili ona malie, a misi lana va’ai, ua ou alu e fa’atau pe a leai se tatou suka.”

“E Paulo, lea fa’atoa ou iloa atu nei, o oe e te loto leaga a ea? Fa’apea lava a a’u e tele le fa’apena, a’o lea ua ou iloa atu nei. Paulo, va’ai oe si o’u to’alua fa’apelepele, se po’o a lava suaga i va’atele, e leai lava se tasi e fa’aluaina pe fa’asefuluina oe i lo’u loto ma lo’u agaga, na o Paulo lava, uma mea uma o le olaga nei.”

E faia pea…