Vaega: 84

Ua o tatou va’aia le susulu matagofie mai o le la i lenei taeao fou, e fa’ailoa mai ai le alofa ma le agalelei o lo tatou Matai oi le lagi, aua o lea ua ia foa’i lenei aso e fa’aopoopo i lo outou soifua fa’apea ma si o’u nei ola vaivai. E ao ai ona o tatou fa’apea fio, “Le Ali’i e, e silisili lava Lau Afio i mea uma te manatu i ai, ia E alofa ma foa’i mai le loto tele i a i matou, ina ia o matou olioli ai Lau taulaga tutasi na molia mo i matou le tagat agasala, a’o le vi’iga o le fa’amanu ma le fa’afetai matou te fa’afo’i atu i Lau Afio e fa’avavau, fa’avavau lava, Amene.”

Ia manuia le alo faiva o le atunu’u i feau ma galuega o le a feagai ai i lenei aso, ae alo maia, o le vaega lona onosefuluono lenei o la tatou tala fa’asolo, “Lupe o le Filili. Na muta mai la tatou tala ina ua fai nei le mafutaga fa’aleaiga a Paulo, o lona to’alua o Eseta ma le la fanau o Petelo ma Samuelu. Manatua fo’i, o lea ua toe feiloa’i fiafia le aiga, ina ua toe atoa tino o le tama.

Fai mai, ina ua lau leo tele e Samuelu le tusi mai i a Salamasina, ua pei o uaga e maligi mai le lagi loimata o le toeaina o Paulo, ua le gata i lea, ae ua fa’apea fo’i le lo’omatua o Eseta. Ua uma nei le tali e, ae ua fetagisi, ua mafaufau lava le tagata latou i ona uiga i lea taimi. “Samuelu ma Petelo, ia o le na ua oulua faitau ma oulua fa’alogo i se tima’iga ma fautuaga ua tu’u mai e Salamasina mo oulua e ala i lana tusi. O upu moni lava, e fa’apena fo’i o ma mo’omo’ga ma a ma talosaga i luma o le Atua, ina ia maua e oulua le fealofani ma le fegalegalea’i.

Samuelu, o le a fa’amamafa la’u tautalaga i a te oe le atali’i, va’ai oe, o le tamaititi e usita’i ma fa’alogo i a’oa’iga a ona matua, e ola a’e, e manuia lava ona ala uma, ae afai o le faiga lea o ou uiga Samuelu, ia o le na lava e te iloa. E leai nisi upu e mafai ona ou tautala atu ai, aua ou te talitonu, ua e lagona se mea o lo’o i totonu o lo’u loto, ae sau se taimi ona talanoa atu lea o lou tina i a te oe, ae maise o lou uso le na e nofo atu.”

Ua fa’ata’atia ‘ese nei e Samuelu le tusi lea sa ia faitauina mai le tuafafine o lona tama, ae ua fa’alogo nei i le fautuaga lea ua tautala ane ai lona tama. Na fai si umi o fa’atali se tala mai lona tina, na ‘eu nei e Paulo le vae o Eseta, ae va’ai atu le toeaina, ua na o le punou o le lo’omatua ma tagi. Na ea a’e nei i luga ma amata loa lana tautalaga e a’oa’i ai lana tama fa’alogogata o Samuelu.

“Samuelu, ia e fa’alogo lelei mai i a ma a’oa’iga, o le tama poto, na te fa’afiafia le loto o lona tama, a’o le tama valea, e fa’anoanoa ai lona tina. Ou te le fa’avi’ivi’i atu i a te oe i lou atamai o lo’o i ai, e leai, leai lava Samuelu. Samuelu, o le na e te iloa, e te atamai, ae va’ai oe, e leai se aoga o lou atamai, pe afai e ‘ese le auala o lo’o e fa’aaoga ai, a’o le tamaititi e atamai, ia fa’aali ona uiga lelei ma ona uiga tausa’afia e alofagia ai e tagata.

Ua le iloga se tagata ua fa’alala i ai ou lima i totonu o le nu’u lenei, ae ‘emo ane le ata, na o le sala, sala o ma’ua, o le a la le aoga o lou atamai ma lou poto lea e fai ai tala a tagata. Samuelu, po’o le a lava le poto ma le atamai o le tagata, ae a aunoa ma lona fa’autauta, e leai lava se aoga o mea uma, e pei lava o le selo. Se i e va’ai ane lava i si ou uso le na e nofonofo mai i ou talane, ua pologa Petelo, i le faiga o mea uma o le aiga, amuia oe, e i ai sou uso e alofa i a te oe Samuelu, amuia oe.

“Samuelu, ua ma le iloa po’o le a se isi upu o le a fai atu, ae tau ina ou fa’apea atu, Samuelu, alofa mai, alofa mai i a ma’ua ma lou tama, alofa ane i si ou uso, o lo’o feagai ma mea uma o le aiga, o le alofa lava e fa’atino ai mea uma o le olaga o le tagata, aua afai e le alofa le tagata, o uiga ia na te faia, ae a i ai le alofa i le loto o le tagata, o i’ina e matala ai mea lelei uma i ona uiga fa’aalia ma ana aga, ae maise o ana upu e tautala ai. Samuelu, alofa mai ia ma’ua ou matua, tu’u loa Samuelu, ae liliu mai e fai lelei mea o le tatou aiga…..” 

E faia pea…