Vaega: 86

Fa’atalofa atu i le alafa’i mai o lea atunu’u i le manuia i lenei aso, fa’amalo le onosa’i, fa’afetaia pea le alofa ma le agalelei o lo tatou Matai oi le lagi ona o Lona agalelei mo i tatou e le mavae, o lea ua tatou aulia mai ai lenei aso i Lona alofa ma Lona agalelei. Ae alo maia o le a toe fa’aauau atu la tatou tala mo lenei aso, ae ia manuia le alo faiva o le atunu’u i feau ma galuega o le a feagai ai.

Ua alu nei le talie a Paulo ma Eseta, ae e ui lava i lea ae ua fa’ate’ia le lo’omatua ma le toeaina ina ua fa’alogologo atu, o lo’o taumafai Samuelu e avea ma loia. E le i tele lava i se pito, na ona uma lava o le ‘ata a le lo’omatua o Eseta, velo ane loa ma le fesili. “E a ea, ali’i Samuelu, o lo’o e taumafai e avea oe ma loia, oi ta’i lelei si a’u tama, alo i ou faiva, o le a matou tapua’i atu, ae ia e iloa lelei  lava Samuelu, e pei  ona talanoa mai lou uso, o le Loia, o se galuega e faigata tele, ma e le ‘au maua fo’i e le to’atele o tagata, ae ia avea oe ma loia lelei, sa’o au fa’aiuga, ia e iloa le mea moni, ona fai lea, ae tu’u le mea pi’opi’o, aua o le tele lava o Loia, e fa’apea, ae ia manuia lau taumafaiga, talofa e, i si a’u tama o Samuelu.”

Na fa’apea le manatu o le toeaina o Paulo, “Se ua leai fo’i se mea na ta’u ai fua, o lea fo’i la ua fa’alala le lima o le lo’omatua, e so’o uma nei fo’i le nu’u o tala’i ai e Eseta lenei mea se, ae a le manuia loa la, o le a le mea o le a fai.” Ua na o le tilotilo ane nei o le toeaina i lona to’alua ma lana fanau. Ua fa’ato’ese nei Samuelu i ona matua fa’apea ma lona uso o Petelo ma ua ta’oto ai loa i ta’otoga malu le mataupu i lea afiafi.

Ina ua taunu’u le malaga a Sila i lea afiafi, na va’aia lava e le Faletua o Su’e le fa’anoanoa o Sila. O le ala lea na taumafai ai lava le Faletua e fia maua sina taimi paninoa, e fetufa’ai ai ma le Faifeau. ina ua taunu’u le malaga a le Fa’afeagaiga, e le i maua se taimi e mafuta ai i lana fanau, na ona taunu’u lava, tu’u atu i le Faletua le pusa mea’ai ma taga pepa, ma savali loa i totonu o lona potu moe.

Ua fetilotilofa’i solo nei le fanau, ae ua leai se tasi na fai ane se tala i lo latou tama. O le Faletua fo’i ia, ua le gagana i lea taimi, ae ua na o le tilotilo ane i lana fanau ma lulu lona ulu. Ua tau matemate fo’i, po’o le a le mea ua tupu, ona sa i ai lo latou manatu o le a maua se feiloa’iga fiafia, ona o lea fa’atoa taunu’u ane, peita’i, ua ‘ese lava uiga o le Faifeau i lea afiafi.

Na topetope nei ona gao’o le faiga o le mea’ai o le afiafi, ma ua uma fo’i ona fa’atonu e le Faletua i a Su’e lana fanau i le faiga o le mea’ai, ae ua savali nei i totonu o le potu moe, i lona fia iloa po’o le a le mafua’aga ua fa’apea ai le Fa’afeagaiga. Na tatala nei le faitoto’a ma tilotilo atu le Faletua, e le o tofa le Fa’afeagaiga, ae o lo’o nofonofo ma tilotilo i fafo i le fa’amalama i le itu o lo’o i ai le toga la’au matagofie lava o lo’o i talane o le fale.

Na savali atu nei ma tu loa i talane o Sila, “Sila, o le a le mea ua tupu, e i ai se mea na tupu i la outou talanoaga?” O le fesili lea a le Faletua, ae e le i ano ane i ai Sila, ae o lo’o fa’asolosolo pea ona mafaufauga i si ona uso matua o Paulo. “Sila, se o lea ta te fesili atu, ae o le na lava e u mai lou tua, se tautala mai ona ta fetufa’ai ai lea, ae a teu i lou loto, ona le maua ai lea o se to’a i lou mafaufau, talanoa mai fa’amolemole.”

E faia pea…