Vaega: 95

Fa’atalofa atu i lou alafa’i mai i le manuia i lenei taeao fou, i le tusiga alofa a lo tatou Tapa’au oi le lagi. E ao ai ona o tatou fa’apea ifo, “Le Atua e, ia E alofa, foa’i mai i a i matou le loto onosa’i ma le fa’apalepale, ina ia mafai ai ona matou talia ma le loto maualalo faigata ma mafatiaga e o’o mai i a i matou i lenei aso, a’o le vi’iga ma le fa’afetai matou te fa’afo’i atu i Lau Afio e fa’avavau, Amene.”

Na muta mai la tatou tala, ina ua maua uma nei e Paulo ma lona uso o Pati fa’apea lo la tuafafine o Salamasina ia tusi na fa’amomoli mai e Sila, o lo’o Faifau i le afio’aga o Vatia. O lea la ua a’e ai nei se finagalo i aiga, o le a feiloa’i i le vaiaso oi lima e fa’amautu ai le mataupu e pei ona folasia nei i le Ofisa o Fa’amasinoga. Ua toe fo’i nei le avepasi ma tali o tusi nei, ma ua taua’ao nei e le Fa’afeagaiga.

O le mataupu e uiga i le nofo a’oga o Samuelu i le tuafafine o Paulo ma lona to’alua Palagi o Larry, ua le taunu’u. Ona o le manatu o le lo’omatua o Eseta e fa’apea, e popole lava aua o Samuelu e vave le ita, ne i te’i lava ua tupu mai se fa’aletonu i le nofo ai i a Sala ma lona to’alua Palagi. Ae e sili pe a tausavali mai pea i le a’oga i taeao uma ma toe fo’i atu i le aiga. O le tala a lona tina o Eseta, “Se fa’aaoga le malosi na tu’u mai e le Atua, fa’aaoga vae na fai e le Atua e savavali ai, e le maua ai i ni ma’i suka ma ni toto maualuga. E fetagisi i ta’avale na masani ai, fa’aaoga vae.”

Na muta ai lava i’ina ma le talatalanoaga a Paulo ma Eseta, e le i toe talanoaina le mataupu. O le manatu fo’i na o’o i a Samuelu, ua fiafia fo’i i ai, ona ua ia iloa lelei, e sili lava le mafuta i le aiga moni ma matua moni, na i lo le alu ‘ese mai, ona le iloa ai lea o nisi fautuaga lelei ma mea lelei e pei ona faia pea i totonu o lona aiga. Ua fa’apea lava ona fai, ma ua full stop ai loa i’ina ma le mataupu, e le i toe talanoaina, ae pau le mea na toe mafaufau i ai le lo’omatua o Eseta, o le tuafafine o Paulo, le teine o Sala, lea na mana’o e alu ane Samuelu e nofo a’oga i a la’ua.

Ae i le manatu o le lo’omatua, e i ai se taimi, ona o la fetufa’ai ai lea ma Salamasina e tusa ai ma le mataupu e uiga i a Samuelu. Fai mai, ua matua’i mafana le mafutaga a Petelo ma Misi, aua ua fai lava ma alu ane Misi i le fale o Petelo. Ua le toe fia alu i le fale o Solo, aua ua iloa lelei e Misi, a iloa e Petelo, ia ta’ilo fo’i i maso o lo’o fealua’i ma Samuelu, pe maua maso ia e fealua’i ma Petelo e le gata ina sau ai le toto i lona isu ma lona gutu, ae toe gau ai ma lona ‘auvae.

Manatua fo’i, e le o iloa lava e matua o Petelo le mea lea e tupu i le la tama ma le tama’ita’i o Losalia, aua e le i fa’ailoaina e Petelo i ona matua le mea lea e tupu. Na fa’ate’ia Petelo i le isi afiafi i le va’ai mai o selasela atu Misi i le ma’umaga, na tu nei Petelo ma tilotilo ane i le alu atu a Misi, e foliga mai, o se tagata o lo’o fai atu ni tuliga ma se isi tagata, ina ua maua lana ova.

E faia pea…