Ads by Google Ads by Google

Fagogo: Lupe o le Filifili

Vaega: 96

 

Ua molimauina e le atunu’u le oso a’e o le la mai i lona nofoaga masani, ma ua o tatou va’aia ai ataata o ta’uleleia i le soifua manuia o si o tatou atunu’u i lenei aso fou. E ao ai ona o tatou fa’apea ifo, “Le Tama e, o le vi’iga ma le fa’afetai ma le fa’amanu matou te fa’afo’i atu i Lau Afio, aua o Oe o le Mataisau o mea uma, ia fo’i atu lava le vi’iga e fa’avavau, Amene.”

 

Ae alo maia, o le vaega lona ivasefulufa lenei o la tatou tala fa’asolo, “Lupe o le Filifili,” ae ia manuia lou alo atu i feau ma galuega o le a feagai ai i lenei aso. Na muta mai la tala ina ua fa’ate’ia Petelo i le au selasela atu o Misi ma le tusi na avatu i a Losalia. Manatua fo’i o le tama’ita’i lenei ua fa’ananau i ai le loto ma le mafaufau, atoa ma le agaga o le tama o Petelo. Ae se o tatou va’ai pea, po’o le a le tulaga o le a o’o i ai.

 

O le tele tele, o le fa’atoaga o le mafua’aga lea na tauvala’au ai Misi i le ioga o Petelo. Na tali mai i ai Petelo ma savali sa’o loa i a Misi, na ona tu lava o Petelo i luma o Misi, a’apa loa ma Misi i totonu o lona ie ua lua masina e le i taina, ma ava’e i fafo le tusi. Ua tu nei Petelo ma tilotilo ane i a Misi, “Misi, o le a le na tusi?” Ua tau to le sela o Misi i lea taimi, “Telo, o le tusi na tu’u mai i a te a’u e Losalia, ua ou te’i i le alu ane i lo matou fale anapo, o lea la ua ou sau ma a’u e tu’u atu i a te oe.”

 

O le mea muamua lava na va’ai i ai Petelo, e leai se teutusi, o lona uiga ua alu le po atoa o faitau ai Misi. Ua lu lu le ulu o Petelo ma a’apa atu i le tusi ma tatala loa. O upu nei o le tusi a Losalia i a Petelo, “Petelo si au uo peleina, ua ou tusi atu i a te oe, ona ua i ai lo’u manatu, ua e iloaina le mea na tupu i a te a’u. Ae va’ai oe, e leai lava se tasi e fa’aluaina oe i lo’u loto ma lo’u mafaufau se i o’o i le fa’avavau, amene.

 

“Ae afai lava o i ai ni ou alofa o totoe mo a’u, ia natia ai so’u leaga Petelo. O le mea na tupu, sa ma talanoa lava ma Solo i auala ma ma, ae ua tele lava le fa’aletonu, ona ua maua atu ma’ua e lo’u tuagane. A’o upu moni lava, e leai lava ni uiga o Solo, e fa’apena fo’i i a te a’u Petelo. O le ala lea afai lava e musumusuina lou loto i le mea sa’o, ona fa’aavanoa lea o sou taimi ta te feiloa’i ai. Ae o lo’u alofa mo oe si a’u uo pele, e gata mai le maualuluga o mauga. Ou te alofa fa’amaoni i a te oe Petelo, o Losalia.

 

Manatua fo’i, ua uma ona folafola e Samuelu, le uso la’ititi o Petelo i a Petelo, le mea e o’o i ai pe a toe fa’alogo ua toe alu i a Losalia. O lea la se i o tatou va’ava’ai pea, pe o le a le filifiliga o le fai e Petelo, pe alofa i a Losalia, pe alofa i lona uso o Samuelu. ia o mea lava fa’apenei, e tagi ai le fatu ma vaivai ai le loto, aua a tu’u ane i le isi itu, po’o le a le loloto o le sami, o le a fo’i le maualuluga o mauga, afai lava ua fa’ananau le loto ma le mafaufau o le tagata i se mea o lo’o fiafia mana’o i ai, e le toe solomuli ai lava.

 

Tiga ona a’au atu o lae ua gali mai e malie vae, e le mafai lava, tiga fo’i ona fa’alogo atu ua e’eva ma o le pa’u mai i lalo mai le mauga, e a’e lava e le toe fa’atali, tiga fo’i ona va’ai atu ua feosofi mai pua’a a Saleufi, e le fa’avaivai ai lava. ioe, ua pei o le alofa o Ruta i a Naomi, o le mea e tanu ai oe, e velo i ai ma a’u, o fea fo’i e te alu i ai, ou te taumulimuli atu lava i a te oe. Leaga lava lenei mea o le alofa e matagofie tele, o lau foa’i fo’i o lo’o silafia e le Atua mea uma, aua o le upu a le tusi, e sili lava le manuia o le na te foa’i, na i lo le na te talia.

 

E faia pea…