Vaega: 98

Tatou fa’afetaia pea le alofa ma le agalelei o lo tatou Matai oi le lagi, ona o Lana tausiga alofa mo i tatou i aso uma o lo tatou ola, e ao ai ona o tatou fa’apea ifo, “Le Atua le Tama, o ai e i matou ua e saga alofa mai pea i ai, ua na o i matou o ni tagata fa’atauva’a ma le le atoatoa, ae ui lava i lea matou te fa’amoemoe, e te le liliu ‘ese ma i matou Tama, a’o le vi’iga ma le fa’afetai matou te fa’afo’i atu pea i Lau Afio e fa’avavau, fa’avavau lava, Amene.”

Fa’amalo le onosa’i i faiva ma tiute o lo’o feagai ai i lenei aso, ae alo maia, o le a  toe fa’aauau atu la tatou tala mo lenei aso, e pei ona masani ai. Na muta mai la tatou ina ua tete’i Petelo ma Misi i le fa’alogo mai, ua alu atu le tauvala’au a le lo’omatua o Eseta. O lea la na fai ane ai loa Petelo i a Misi e fa’ataga tago e vele le vao, ma ua fa’apea lava ona fai, ae sau ai tua ma mafaufauga fa’alupelupeina o Misi e uiga i le lo’omatua o Eseta.

Na i ai le manatu o Petelo ma Misi e na o le lo’omatua ua alu atu e asi atu le galuega a Petelo, ae le iloa, o lo’o mulimuli mai ai i tua ma le toeaina o Paulo. Na ona iloa ane lava e Eseta o Misi lea e punou alu ane loa ma le tala, “Oi Misi, oi talofa e, i a Misi, ia topetope, topetope lima, a ua le maua lava se to’alua, atonu o le auala lea e maua ai sou to’alua, se e va’ai mai loa le teine o galue atu, oka, ua matua sikueli paleni ai mea uma, topetope o le a sau le pogisa.”

“Se Eseta, se o le na fo’i o le a tele mai atu tala ia ta ita, ua leva ona i ai, ae ua ou fiu e togitogi ma’a i le teine e le kea mai.” Ua ‘ata le lo’omatua o Eseta ma fa’apea ane, “A fiu loa e togi ae le kea mai, amo loa ‘aua ne i toe fa’atali.” Ua ‘ata ne’e Misi, ae ua na o le lulu o le ulu o Petelo. “Se Eseta, o le a fo’i le mea ua e o’o mai ai, oi na lua o mai ma le toeaina?” Ua punou ifo nei i lalo le lo’omatua ma amata loa ona vele le vao o le ma’umaga.

E alu a lima ae ua le mafai ona taofiofi le alu o le auvae latou, “Se Kelo, o lona uiga o le mea a oe lea e fai nei, na o lou nimo mai i tua i ma lau kitara ma e ta ta ai, ae se i va’ai lenei o le a lilo le toaga i le vao. E le pe pe ni vao i se kitara, o le vele ‘ese o le vao e ola lelei ai le talo, ae le fa’apea a e sau e te pesepese ona alu ‘ese ai lea o le vao. Ua ‘ese fo’i lava au faiga ia ua ou va’ai atu i ai, Kelo fai fa’alelei mai lava a.”

Ua tau le mafai e Misi ona taofiofi lana ‘ata i lea taimi, ae na fa’ate’ia i le liliu ane i ai o le lo’omatua, “A Misi, topetope mai ou lima, fa’amasani i le fai fa’atoaga, o le ‘oa lea o lo’o i le ‘ele’ele ma le palapala, ae a paie le tagata, ia ta’ilo lava i mea n ate ‘aia. A’o le tagata e toaga ma onosa’i ma galue, o le tagata lea na te maua fa’amanuiaga o le ‘ele’ele, topetope mai ou lima o le a pogisa ifo lava e le i o’o lau vele i luma.”

Na mou ‘ese vave lava le ‘ata a Misi, ae ua liliu ane nei e topetopen le veleina o le vao, fa’atasi ma ona mafaufauga e fa’apea, “Se o le lo’omatua lenei se, e sili ai le alofa i se asini ua leai se si’usi’u, e fai fai fo’i Hitila, e feololo mai.” O le taimi lea, ua tu tonu lava Paulo i le itu o lo’o i ai le toaga ua matua ai lava le talo. O le mea na o ane uma ai Paulo ma Eseta i le ma’umaga, aua ua taunu’u le feau mai le Fa’afeagaiga o Tavita, lea o lo’o tau’asuina le ipu o le vai o le ola i le alalafaga lea o lo’o nonofo ai nei. Ua mo’omia sa la fesoasoani i ni nai meamata, ona ua taunu’u a la malo i le aso lava lea. O le mafua’aga la lea ua o ane uma ai i le fa’atoaga le lo’omatua ma le toeaina.

E faia pea…