Vaega: 6

Fa’atalofa atu i le alafa’i mai i le manuia o le mamalu o le atunu’u i lenei taeao fou, taeao toto’a, i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Le Ali’i e, o Oe o le Alefa ma le Omega, o le Amataga ma le Muta’aga o mea uma lava, matou te fa’amoemoe pea i Lau Afio i mea uma matou te faia i lenei aso, ae fo’i atu lava le vi’iga ma le fa’amanu i a te Oe Tama e fa’avavau, fa’avavau lava, Amene.”

Na muta mai la tatou tala, ina ua toe savali nei Petelo i tua i le umu lea o lo’o gao’o ai le supo moa Samoa ma le fa’alifu aua le meatausami a nai ona matua. Na toe liliu nei le lo’omatua o Eseta ma savali atu i le fale o lo’o i ai le toeaina o Paulo ma lona atali’i o Samuelu.

O le isi tulaga na o’o i ai le fanau a Paulo ma Eseta, e foliga mai e pele i loto o le lo’omatua ia le tama o Samuelu, ae afisi e le toeaina le tama matua o Petelo. Ae ua galo i a i la’ua, o le mafua’aga tonu lava lea, o lo’o sasi ai i la’ua uma, i le faiga o le la fanau. Atonu o lo’o fa’apena fo’i le tele o aiga i totonu o Samoa nei, e i ai le tamaititi e alofa i ai le tina, e i ai fo’i le tamaititi e alofa i ai le tama.

Afai la e to’a fitu le fanau a le ulugali’i, ona alofa lea o le tina i le isi tamaititi, ae alofa le tama i le isi tamaititi, a’o le fesili, o ai la o le a alofa i isi tamaiti ia e totoe. O lona uiga, o le a tu’u lafoa’i ma tu’u fau ai lava fa’apea, e leai se tasi e alofa i ai.

O le tulaga lea ua sili ona le lelei i totonu o aiga, ona o lo’o aliali mai pea, ae galo ai i a tatou matua, o totonu lava o o tatou aiga, o lo’o mafua ma amata mai ai le tele o fa’afitauli ma faigata ua o’o i ai fanau i lenei vaitimi. Ae o matua e alolofa ma tausi lelei i fanau, e tutusa uma le faiga o tamaiti, ‘aua ne i fai fa’apito na o le se to’atasi pe to’alua, ae ia tutusa leo o le tama ma le tina i le fa’atonutonuina o fanau. Ona ola a’e lea o fanau, i se olaga lelei ma le manuia.

Ola a’e e fealofani, e alofa le tasi i le isi, e o’o lava ina matutua ma ua fai o latou aiga, e fa’aauau pea galuega lelei ia na fafau mai e matua mo i latou. Ae afai o ni matua e ola i se olaga e fa’apito le tasi i le isi, ona ola a’e fo’i lea o fanau, e ola taua’imisa, ola fa’atupu vevesi, e le alolofa ma le fealofani.

O le mafua’aga tonu lava lea o lo’o taoto ai le aiga o le toeaina o Paulo ma le lo’omatua o Eseta, ma atonu la te le o iloa le mata’utia o lea tulaga la te faia i le la fanau.  O le mea ua tupu, a tele atu tala a le toeaina i le lo’omatua e uiga i a Samuelu, e oso mai lava le lo’omatua o Eseta e tau pupuni. A fai ane fo’i se tala a le lo’omatua i le toeaina e uiga i a Petelo, e oso a’e fo’i le toeaina latou e pupuni. O le mea la ua tupu, ua tu’u nei tamaiti ae ua tau pa’ilia ai le lo’omatua ma le toeaina i le va lea.

O le tala lava a le lo’omatua e fai so’o, “E leai lava se tagata na lavea ai lima nei.” Ae sau le tali a le toeaina, “Ioe, e moni lava oe le lo’omatua, e leai lava se tagata na lavea i lou lima, ai a na o a’u lea ua lavea ai ou lima.” Ua tu’u le tauga upu ae alu nei le tali e a Paulo ma Eseta.

E faia pea…