Vaega: 129

Fa’atalofa atu i lou alafa’i mai i le manuia i lenei taeao fou, ona o le tausiga alofa a lo tatou Matai oi le lagi. Tatou fa’afo’i la’ia o le vi’iga ma le fa’amanu i Lona Suafa Paia, ona o ia o le Mataisau o mea uma lava. Ae alo maia, o le a toe fa’aauau atu la tatou tala mo lenei aso.

Ina ua malilie uma aiga e tusa ai ma le fa’amoemoe o Vaitimaleata, na alo ai loa mo le fausiaina o fale papagi o le aiga. Fai mai, e leai se tasi o fanau a le i togi sana ma’a i le fa’atinoina o galuega lelei mo le aiga. Ae o le tagata na lima malosi i mea uma, o le tama’ita’i lea o Vaitimaleata Caroline. Ua fau fale, ma o le mea lava na mana’o i ai Vaitimaleata e tu ai le fale mo nai ona matua, o lea lava ua i ai.

Fai mai, mai le tala, e le i mafaufau lava le tama’ita’i i nisi itu, ae o le fa’ata’imuaga o ona mana’oga, o lon fai mea fa’alogo lea i a Petelo, aua o Petelo ua fa’ae’e i ai le matai o le aiga, po’o ai lava la le tagata e mana’o i se fasi fanua e fa’atu ai sona fale, ua tatala mea uma.

A’o le i maliu le lo’omatua o Eseta, fai mai e fai mo le tama’ita’io Vaitimaleata ia le nofoaga o le aiga i tua, ua ma’ea fo’i la ona fa’asinosino i ai e le lo’omatua ia tuaoi o fanua. O tala uma o le ‘ele’ele o le aiga, ua iloa uma e Vaitimaleata, aua o le galuega lea asa fai e le lo’omatua o Eseta, na o Petelo lava la ma Vaitimaleata lea ua o la iloaina.

O le va’ai a le lo’omatua o Eseta i uiga o Vaitimaleata, e matua’i selau pasene, e le o se tama’ita’i e fa’asausili ni ona uiga, e le o se tama’ita’i e fa’amaualuga ni ona uiga, ae o se tama’ita’i e atia’e ma fa’amautu mea uma o le aiga. O le fautuaga a Eseta na fai i a Petelo a’o le i maliu, “Petelo, ia oulua galulue fa’atasi ma Vaitimaleata, o lou feaosoasoani lea i mea uma o le aiga, o uiga o Vaitimaleata, e loto alofa, ua ou iloa Petelo, e le tau suea lava uiga o le tagata alofa, ia oulua galulue fa’atasi, e atia’e le aiga, uae fa’alogo mai.”

“Petelo, ia e tausi i a Salamasina ma si ona to’alua o Larry, ua afu le tautua a le tamaloa i totonu o le aiga, ou te le tau fa’ailoa atu i a te oe, ia e manatua a’u upu ia. Ua e va’ai i lou tama, o lona ioi mata o lona tuafafine, o le a le lagi i a te a’u, ia e tausi ma e teu i a’u upu ia. ia e alofa i si ou to’alua, ia oulua maua le nonofo fealofani, ae sa sa lava ona o’o lou lima i a Losalia, va’ai tamaiti, a’oa’o tamaiti i le mea e tatau ona fai.”

“Petelo, ia e alofa fa’amaoni i si ou uso e to’atasi o Samuelu, atonu e sau se aso ona toe fo’i mai lea o Samuelu mai i ana a’oa’oga, ae ia e alofa i si ou uso, o oe e matua, o oe fo’i lea ua tula’i mai i totonu o le aiga, ia matala lau fa’alogo, ma lau va’ai, ia e va’ai ma e pule i le alofa, o a lava nisi mea e tutupu mai, o le tagata alofa ma le tagata e to’a lona loto, e au ai le Ali’i i ana filifiliga ma ana fa’aiuga uma. A’o le matai e ola fia pule ma ola fa’asausili, Petelo, e leai se mea na te maua, a’apa e opogi mai nai ou tei, o fanau a Sila, o Sala, o Pati, o Eteuati ma Falaniko, a’apa atu i ai ou lima e opogi mai nai ou tei ia, o latou ia e fa’aeaea i a te oe, ae afai e te manatu ifo e sili lava oe, ia talofa e, Petelo, e leai se tasi e alofa mai i a te oe.

“O ‘ele’ele ma fanua o le aiga, e au uma i ai aia a fanau uma, o fea lava e mana’o le tagata e fa’atu ai lona fale, fai, ae afai e to’a lou loto ma e alofa, e si’i oe i le ma’a salafa, e nai ou tei ia. Petelo, o la’u fautuaga lea mo oe si a’u tama pele, e le i lava ni au a’oa’oga, e te lima vaivai fo’i, ae a’apa e fa’amaopopo nai ou tei, ia  maua e outou le nonofo fealofani, ona manuia lea o le aiga.”

E faia pea…