Vaega: 139

Taeao manuia i le alafa’i mai o le atunu’u i fanuga lelei o lenei aso, ina ua o tatou va’aia ataata o ta’uleleia i le tausiga alofa a lo tatou Tama oi le lagi, e ao ai ona o tatou fa’apea ifo, “Le Ali’i e, o le vi’iga ma le fa’amanu matou te fa’afo’i atu i Lau Afio i aso uma o lo matou ola, amene.”

Ua taunu’u le malaga a Misi ma lona to’alua o Susana i le ofisa o le tama’ita’i Loia o Vaitimaleata Caroline, na fa’ate’ia le teine ina ua taunu’u Misi ma Susana i lona ofisa. O le mea fo’i e lelei ai e taunu’u ane, o lo’o fai se malologa a le tama’ita’i i lea aso. Ua fa’amatala nei e Susana i a Vaitimaleata le mea na tupu, na va’aia e Misi le mumu o foliga o le tamaita’i i lea taimi. E foliga mai o se tagata ua leva ona fa’ala, tu a’e loa i luga ua feaato solo pepa sa i luga o lana laulau.

“Vaitimaleata, malie lou loto, ‘aua e te to’atama’i fa’apena, ia to’a le tai, ua o ma o’o mai e logo mai oe, ona e le mafai ona o ma talanoa i a Petelo, ona o Petelo lea e pau i ai le ulu o le lapalapa, ae ua ma iloa lava oe Vaiti, alofa mai si o’u tuafafine, ia to’a lou loto, ae tatau ona fo’ia vave le mea lenei, ae e le i iloa e Petelo.”

Fai mai fa’atoa va’ai lea o Misi ma Susana i le ita a le tama’ita’i, ai ana fa’apea e latalata mai Su’e, ua ato i fafo e le teine. E leai lava ni upu, na a’apa loa i le ki o le ta’avale ma fai ane i a Misi ma Susana e tatau ona o latou o i tua i le taimi lava lea.

Fa’atoa tautala lava Vaitimaleata ina ua latalata i Amanave, e lua faleoloa na tu ai le ta’avale a le teine, o le faiga lea o se fa’atau mea’ai mo Misi ma Susana ma i a la fanau, o le fa’atauga mea’ai ma Petelo ma Losalia ma si a la fanau, fa’apea ma le tele o isi mea na fa’atau e le teine, mo si ona tina, fa’apea tuagane o lona tina. O lana galuega masani lea i fa’aiuga o vaiaso ta’itasi, e alu ai e asi si ona tina ma lona aiga.

E tofu uma lava le aiga ma le atigipusa mea’ai. O lea la ua fai nei, ina ua o’o ane Misi ma Susana, “Misi, e ofo lo’u loto, e ofo lava lo’u loto Misi, pe afai ua faufau fa’apea e lo’omatutua se faiga leaga fa’apea, e leai lava se isi o Su’e lava lea e ‘eli’eli leaga nei i totonu o le aiga, ua pei o se tiapolo lenei lo’omatua se, e fiu lava e fai i ai faiga lelei, ae le mafai lava.”

“Vaitimaleata, alofa mai si o’u tuafafine, ia e manatu alofa i a Petelo, o lou tuagane, a’o se uso i a te a’u, alofa mai fo’i i a ma’ua ma si o’u to’alua, e leai lava se isi auala, na o oe lava sa o ma manatu i ai, e fo’ia lenei fa’afitauli ua tula’i mai i totonu o le tatou aiga, alofa mai Vaitimaleata, fa’ato’ato’a lelei lou loto ma lou mafaufau i le mea e ao ona fai, e maua ai le nonofo filemu ma le nonofo fealofani.”

Na va’aia e Misi ma Susana le maligi ifo o loimata o le tama’ita’i o Vaitimaleata, aua e ui lava i nisi fanau a uso ma tuagane, ae e pei lava o Vaitimaleata, o lo’o fa’amaoopopoina nai ona tei. E mafana le va o Vaitimaleata ma Petelo, o le isi lea itu na va’ai i ai le tama’ita’i, o lona alofa lea i si ona tei, ma ua ta’u lava o lona tuagane.

Ua taunu’u le ta’avale i luma o le fale o le tina o Vaitimaleata, ma na fa’ate’ia le lo’omatua o Salamasina, ina ua o’o atu lana tama, ae e le i o’o i le fa’aiuga o le vaiaso. Ua lagona le popole o le lo’omatua, pe o le mea ua tupu se fa’alavelave, po’o le mea ua ma’i si ana tama e pele i lona loto.

“Ata, e i ai se mea ua tupu, sau ia, o le a le mea ua e o’o mai ai i lenei aso.? Ua ‘ata le tama’ita’i ma a’apa atu ua fusi mai si ona tina e pele i a te ia. “Mama, e leai, ua ou nofonofo lava o’u mafaufau mai i a te oe, o lea ua ou sau ai, o ai o lua to’alua.? Na tali le lo’omatua, o ma’ua ma Losalia, na usu mai lava si fafine i le taeao e fai la’u ti i le taeao, o lae la e i tua i le umukuka.”

Na ta’ita’i ane nei e Vaitimaleata lona tina i le potu malolo ma fa’asaofa’i ifo i luga o le nofoa. E ui ina lagona e Vaitimaleata le fa’anoanoa tele, ae sa taumafai lava ia ‘aua ne i iloa e si ona tina le mea lea e tupu, ae ua taumafai nei le teine, ia teuteu e ala lea i lo latou va ma lo’omatutua nei.

“Mama, fa’afetai i le Ali’i, o lo’o maua pea e oe le tina le malosi, fa’afetai fo’i i a Petelo ma Losalia i lo la agalelei i a te oe ma le tausiga o oe, ae maise fo’I o si tama o Misi ma si ona to’alua o Susana.”

E faia pea…