Vaega: 140

Tatou fa’afo’i pea le vi’iga ma le fa’afetai i lo tatou Tapa’au oi le lagi, ona o Lana tausiga alofa ma lona agalelei mo i tatou i aso uma o lou soifua fa’apea ma si o’u nei ola. E i ai pea le fa’amoemoe, o lo’o aoina le masina i le soifua laulelei o le atunu’u, ae alo maia, o le a toe fa’aauau atu la tatou tala fa’asolo mo lenei aso. Ae ia manuia le alo atu o le atunu’u i faiva ma tiute o le a feagai ai i lenei aso.

Na muta mai la tatout ala ina ua taunu’u Vatimaleata, o Misi ma lona to’alua o Susana i tua, ae e le o iloa e le tina o Vaitaimaleata le mafua’aga ua o’o atu ai lana tama i lea aso, aua o fa’aiuga o vaiaso ta’itasi e alu ai le teine i tua i lona tina ma lona aiga. Ua ta’ita’i ane nei e le teine lona tina o Salamasina i totonu o le fale ma ua fai ai loa le la talatalanoaga.

Ua punou ifo le lo’omatua o Salamasina, na taumafai e tau nana le maligi ifo o ona loimata i lea taimi, ae na iloa lelei lava e lana tama o Vaitimaleata. Na a’apa ane nei le teine ma fusi si ona tina e pele i lona loto. “Ata, ia e alofa i a Petelo ma si ona to’alua o Losalia, fa’apea fo’i Misi ma Susana ma si a la fanau, ia ‘aua ne i galo i a te oe, fai lelei mea o le aiga, ia outou maua pea le nonofo fealofani i aso uma ma taimi uma o le olaga lenei, o a lava faiga leaga a le fili e taumafai e lepeti le tou nonofo fealofani, ia outou tausi ma alofa pea le tasi i le isi ona manuia lea o mea uma o le aiga.”

“Mama, ‘aua e te popole, fa’ama ma mea uma i lou mafaufau, tatalo i le Atua i aso uma, ina ia foa’i pea lou malosi, ae maise fo’i o si o tatou aiga. A lea ua ou nofo atu, ou te le alu lava i se isi mea, se’i iloga lava o le a le finagalo o le Atua i a te oe, ae ‘aua e te manatu i na mea, e fa’atupu ma’i i a te oe.”

A’o le i taunu’u Vaitimaleata, Misi ma Susana i tua, ua uma ona fai e le teine le tonu, e ‘aua ‘aua lava ne i pisa Misi ma Susana, ae tu’u ane i a te ia, faitalia ia ma teuteu mea uma, ae maise ai o lo’omatutua nei, o ta’ito’alua o tuagane o lona tina.

Fai mai, ina ua ma’ea le feiloa’iga a Vaitimaleata ma si ona tina o Salamasina, na tula’i ai loa le teine ma savali i le fale o le tuagane o lona tina, le toeaina o Sila ma lona to’alua o Su’e. E taunu’u ane le teine, o lo’o i ai Sila ma Su’e i lo la fale. Na tau mafaufau le tama’ita’i, pe tatau ona fai sana tala a’o i ai le tuagane o lona tina, pe fai sana tala e la te o ma Su’e i sana feau.

Ua manatu le teine, ia ‘aua lava ne i iloa e tuagane o lona tina le mea lea e tupu i lo’omatutua, aua e le mautinoa e le teine pe o le a se mea e ono tupu mai ai, ae i lona lava loto, po’o le a le tiga ma le matuitui o nei faiga uma, ia fa’amuamua lava i a te ia si ona tina, ina ia ‘aua ne i tupu mai ai se fa’alavelave.

“Oi, talofa Vaitimaleata, na e sau ana fea.? O le fesili ane lea a le tuagane o lona tina o Sila. Na tali le teine, fa’atoa taunu’u atu, o lea fo’i ua ma’ea ona feiloa’i ma si ona tina. Na nofo ifo nei i lalo le teine ma fesili loa po’o fea o i ai Su’e. A’o le mea ua tupu, na ona iloa mai lava e le lo’omatua o Su’e ua savali atu Vaitimaleata, fa’ataga alu loa i totonu o le potu moe.

Na fesili nei Vaitimaleata i le tuagane o lona tina, pe ua maua atu se tala e uiga i a Salamasina, le afafine o Sila, lea ua uma ona fa’aipoipo ma o lo’o taumafai ma si ona to’alua i Kanana Fou, ona e fia galulue i le galuega a le Atua. Na tali Sila, na gata le latou feiloa’iga ma Sala i le lua vaiaso talu ai, ona o lo’o pisi fo’i la’ua i su’ega a le a’oga.

Na toe fa’apea ane nei le teine, “Sila, na ou sau e ave lo’omatutua matou te o e fai se matou mea’ai i le fale’aiga, ona matou toe o mai ai lea.” Ua ‘ata Sila ma fa’apea ane, “Oi, a ave la na o lo’omatutua, ae fa’afefea toeai’ina.” Ua ‘ata Vaitimaleata ma fa’apea ane i le tuagane o lona tina, “Se ua lava outou i le Lo matou Tama e, oi le lagi, ma le pese a le fa’ili.”

E faia pea…