Vaega: 141

Fa’atalofa atu i lou alafa’i mai i le manuia i lenei taeao fou, i le alofa ma le agalelei o lo tatou Tapa’au oi le lagi, e ala lea i le soifua laulelei o le atunu’u i lenei taeao fou. Tatou sunu’i lapalapa o malo ma fa’afo’i le vi’iga i le Atua, ona o Lana tausiga faifai pea mo i tatou i aso uma o lou soifua fa’apea ma si o’u nei ola vaivai.

Ae alo maia, o le a toe fa’aauau atu la tatou tala mo lenei aso, ae ia manuia le alo faiva o le atunu’u i feau ma galuega o lea feagai ai i lenei aso. Na muta mai la tatou tala ina ua taunu’u Vaitimaleata i lona aiga i tua, o lea la ua o nei ma lo’omatutua o ta’ito’alua o tuagane o lona tina. O le lo’omatua o Su’e, le to’alua o Sila, o Tupu le to’alua o Falaniko ma Lisi, le to’alua o Eteuati.

Fai mai, e leai ma se tasi o lo’omatutua o iloa le mafua’aga ua ave ai latou e Vaitimaleata i lea aso. Fai mai ua na o le minoi solo o le lo’omatua o Lisi, i le tau teuteuga o lona ulu, a’o Tupu latou ua faliu solo i totonu o le ta’avale a Vaitimaleata, e tau va’ai po’o lelei lona ‘ofu o lo’o fai.

A’o le lo’omatua o Su’e, ua na o le nofo ma pupula sa’o i luma ua leai ma se toe minoi, ua pei lava e i’ite le lo’omatua e i ai le mafua’aga ua alu atu ai Vaitimaleata i tua i lea aso, ao le tama’ita’i fo’i, e na o fa’aiuga lava o vaiaso e alu atu ai, ona nofo ai lea, se ia o’o i le taeao o le Aso Gafua, ona toe fo’i lea i lana galuega.

Ua taunu’u le ta’avale i luma o le fale’aiga i Nu’uuli, ae manatua fo’i, o Nu’uuli o lo’o i ai le aiga o si lo’omatua o Eseta, o lea la e taunu’u ane le solo, o lo’o i ai le uso o Eseta ma lana fanau i totonu o le fale’aiga. Na feiloa’i fiafia nei Vaitimaleata ma le uso o Eseta ma lana  fanau, a’o lo’omatutua, e le i toe fa’atali, na savavali sa’o lava ua saofafa’i mai i le isi  itu.

Na tuamafai nei Vaitimaleata, e su’e se nofoaga e na o i latou e a’ai ai, o lea na fesili ai i le pule o le fale’aiga pe ia i se motu o avanoa mo latou, na tali le pule o lo’o i ai, ae e totogi le tupe, na totogi lava e le teine le tupe ma o loa i totonu o le potu lea ma saofafa’i ai loa. A’o le o i totonu o le potu lea, na fai le teine i le pule o le falea’iga, e avatu le pili o mea’ai a le uso o Eseta ma lana fanau na te totogina.

Na fa’ateia fo’i le uso o Eseta le lo’omatua o Olive, ina ua totogi e Vaitimaleata le latou mea’ai ma si ana fanau. Na fa’apea ane nei le tala a le lo’omatua o Olive i lana fanau, “E ‘ese le tamali’i o uiga o lenei teine o Vaitimaleata, talofa e, o fea lava e va’ai ai i a te a’u, e le mafai ona alu le teine e le i tu’uina mai se tupe i lo’u lima, o se teine e lelei ai aiga, o se teine e loto alofa i so’o se tagata, amuia Vaitimaleata na te maua uiga alofa ma le tausa’afia, e manuia se tama e nofo i lenei teine.”

Ua le tautatala le fanau a le lo’omatua o Olive, ae ua tilotilo ane i lo latou tina. Ua amata le ‘aiga a Vaitimaleata ma lo’omatutua i lea aso. A’o fa’agasolo pea le taumafataga, na amata ai loa e le teine le tala.

“A’o alo fo’i outou tina i le taliga o le sua i lenei aso, e i ai le mataupu ou te fia talatalanoa atu ai, a’o le mea muamua lava, tatou fa’afeataia pea le alofa ma le agalelei o le Atua, ina ua ia faia lenei aso, tatou te feiloa’i ai ma tatou fetufa’ai ai i mea e lelei ai aiga, ma maua ai le nonofo fealofani o matou le fanau.” Na tu’u ifo lemu lava i lalo le sipuni a le lo’omatua o Su’e, ae o le a o’o i lona gutu.

E faia pea…