Vaega: 13

Fa’atalofa atu i le alafa’i mai o le atunu’u i le manuia i lenei taeao fou, e i ai pea le fa’amoemoe maualuga, o lo’o aoina le masina i lo outou soifua laulelei. E ao ai ona o tatou fa’apea ifo, “Le Atua e, o lo’o i Lau Afio le upu, o le upu o le ola, o le ola fo’i lea o lo’o matou sapi ai nei i ma’a o  malie i aso uma, ia e alofa fesoasoani mai mo i matou i lenei aso, a ma’ea, ona o matou fa’apea ifo lea, o matou lava o ni auauna fa’atauva’a ma le le aoga, a’o le vi’iga, matou te fa’afo’i atu i Lau Afio e fa’avavau, Amene.”

Ua alu nei le sa’iliga o Samuelu, na muamua lava o’o Paulo ma Petelo i le fale o le aiga e latalata ane i lo latou fale. E o’o ane, fai mai e leai se isi o i latou na va’ai i a Samuelu. Ua toe alu le savaliga a Paulo ma lona atali’i o Petelo i le fale o le isi aiga, o le mea lava e tasi. Ae o le lona tolu o fale, na ta’u ane ai loa e le tama e masani ona tafafao ma Samuelu i a Paulo ma Petelo, o Samuelu ua alu i le pasi.

Ua tu le toeaina o Paulo ma lona popole tele, ae na toe fesili atu lava i le tama lea, “O fea o alu i ai, na fai mai se tala i a te oe i le mea ua alu i ai.?” Na tali le tama lea, “Na fai mai i a te a’u, o ia o le a alu i le fale o lou uso, ona toe sau ai lea taeao.”

Na fai si umi o fa’atalitali Petelo i se isi tala a lona tama, peita’i, e va’ai atu le tama, ua ‘ese lava foliga o si ona tama i le ataimi. Na a’apa atu nei le tama ma u’u mai le lima o Paulo, “Tama, o a mai oe, e i ai se mea o e fa’alogoina?” O le fesili lea a Petelo, ua lagona le popole o le tama ina ua va’ai atu i lona tama ua sui ona foliga.

Na liliu nei le toeaina ma fa’apea ane i lona atali’i, “Petelo, ta toe fo’i, o lea ua maua le tala sa’o, o lona uiga ua alu Samuelu io’u uso, ae sau ia ta o o lo’o fa’atali mai le lo’omatua.”

Na toe fo’i nei le sa’iliga a Paulo ma lona atali’i o Petelo ina ua maua le tala, ua alu Samuelu i lona uso, ae o lea fo’i na toe fa’apea ane le tama, fai mai Samuelu e toe fo’i mai taeao. A’o alu le savaliga a Paulo ma lona atali’i o Petelo i lo latou fale, na fa’asolo ai lava mafaufauga o le toeaina i lona atali’i fa’alogogata o Samuelu. Ua o’o i le toeaina le agaga alofa, ua tu’u fesilisili i lona mafaufau, pe aisea lava ua au sulusuulu ai fa’apea si ona atali’i i le mamao o le ala.

Na fa’asolo fa’asolo lava mafaufauga o le toeaina, tau loa i le mea na tupu i le va o lona atali’i matua ma lona atali’i la’ititi. Na fa’apea loa le manatu o le toeaina, o i tonu lava lea ua mafua ai ona alu au sulusulu Samuelu, ua fefe i a Petelo, aua ua folafola i ai e Petelo le mea e o’o i ai.

Ua fa’aauau pea le savaliga a Paulo ma lona atali’i, a’o le taimi lea, o lo’o nofonofo pea le lo’omatua o Eseta ma tilotilo mai i le auala pe ua tau aliali atu Paulo ma lana fanau. Peita’i, ua fiu le lo’omatua e va’ava’ai mai, ma ua alu ifo lava le pogisa, na tu a’e nei i luga le lo’omatua ma tutu le moli matagi ua sefulu tausaga o fa’aaoga pea.

O le molimatagi na maua atu mai i lona tuagane o lo’o avea ma faipule i le isi itumalo, lea la o lo’o mumu ai nei. O le isi fo’i lea mafua’aga o lo’o sisi ai pea le fu’a a le lo’omatua o Eseta, ona ua maua e lona aiga le tamaoaiga, e ala lea i lona tuagane o lo’o ave ma faipule, o le faleoloa o lo’o ola ai lona aiga, ia ma le mau fale o lo’o i ai.

O le isi lea itu e alu alu lava o’o i ai le misa’aga a Paulo ma Eseta, ona e i ai lava uiga o le lo’omatua e fa’apea o lona aiga ua maua mea, o lona aiga e maualuluga igoa matai o lo’o i ai, o lona aiga e sefulu pa povi ma sai pua’a e fitu. O le mea tonu lava lea o lo’o i ai le loto o le lo’omatua. A va’ai mai nei ua alu atu le solo a ta’avale i lo latou fale, ua oso i luga le fefete o le si’usi’u o le pi pi, ona ua va’ai mai  le nu’u ua alu atu lona aiga e asi atu latou.

E faia pea…