Vaega: 147

Taeao manuia, i lou alafa’i mai i fanuga lelei o lenei aso fou, i le alofa ma le agalelei o lo  tatou Matai oi le lagi. E ao ai ona o tatou fa’apea ifo, “Le Ali’i e, ia tumau atu pea i Lau Afio le vi’iga ma fa’amanu e fa’avavau lava, amene.”

Alo maia o le a toe fa’aauau atu la tatou tala, ae ia manuia faiva ma tiute o le a fagai ai i lenei aso. Na muta mai la tatou tala, ina ua amata nei tapenapenaga mo le aso fiafia o le tama’ita’i o Vaitimaleata Caroline ma lana uo o Mikaele. Fai mai, o le aiga fo’i o Mikaele i Pago Pago, e to’atele fo’i, ma o le ala fo’i lea na mana’o ai fo’i le tina o Mikaele le lo’omatua o Malia, ina ia fa’atele le aso o si ana tama o Mikaele. E to’a lima tuafafine o Mikaele, ae to’atasi lava ia, e to’atele fo’i tuagane ma uso o le lo’omatua o Malia.

Ae talofa e, i si lo’omatua o Salamasina, e na o ia lava, ae to’alima nai ona tuagane, o lea la ua maliu Paulo e ulumatua fa’apea ma si ona to’alua o Eseta. Fai mai, ua pei e aiga atoa le nu’u o Salamasina ina ua o’o i le aso fiafia o Vaitimaleata ua galulue tagata uma, e leai se tasi na nofonofo, ae sifi ai le lo’omatua fa’ataulaitu o Su’e. Ua lalaga pola, ua fili atoa le fale talimalo o Petelo ma lona aiga, e o’o i pouulia ua alu fa’asolo atoa le teuga e tagata o le nu’u. Ua taunu’u mai fanau mai Amerika, e leai se tasi na nofo, na o mai uma lava e molimau le aso fiafia o si o latou tei.

Ua taunu’u fo’i le aiga o le tina o Salamasina ma ona tuagane mai Upolu, fai main a fa’atumulia le fale atoa o le aiga, ma o nisi ua momoe i le fale o Salamasina ma ona tuagane. A’o le i faia fuafua a le tama’ita’i o Vaitimaleata, ua ma’ea ona fau lona fale i talane o le fale o si ona tina, o le manatu o le teine, ia ‘aua ne i soliina le fale o si ona tina, ma o lo’o i ai fo’i si ona uso ma nai ona tugane e to’alua, atonu lava e i ai se aso e toe fia fo’i mai ai Samoa, a’o lea ua i ai le fale e nonofo ai.

O se fale ua matua’i matagofie i le va’ai, ma o lea ua api ai le to’atele o le aiga o si ona tina  mai Upolu. Fai mai, na o le nonofo o le aiga o le lo’omatua o Salamasina ma fetilotilofa’i solo, o le matagofie o le lau fanua, aemaise o fale o lo’o tutu ai. O le fale la o Vaitimaleata sa o la fa’atupeina fa’atasi ma Mikaele, lea o le a avea ma ona to’alua ma ona fesoasoani e o’o mai le fa’avavau amene.

Na ofo le Komiti o tina o le nu’u, latou te teuteuina le falesa o le a fa’apaia ai Vaitimaleata ma lona to’alua o Mikaele. Ua malilie fo’i ia i le aiga o Salamasina, o taulele’a o le nu’u, o le a o latou teuteuina le malae o le nu’u, o le a fa’apaia ai i tulaga fa’aSamoa le ulugali’i fou. ina ua taunu’u mai fanau mai Amerika ma Hawaii, fai mai ua fai ua na o le mata’i nei e le nu’u, le to’atele o le fanau, ae na o si toeina o Paulo ma Eseta e na o le to’alua le la fanau, o le tama lea o Petelo ua ava nei ma Sa’o o le aiga, fa’apea ma si ona uso o Samuelu.

Fai mai, ae e le i o’o i le aso o Vaitimaleata, na maua ai le avanoa e talatalanoa ai ma si ona tuagane o Petelo, ua le toe ta’uesea lava e Petelo ia Vaitimaleata, o si ona tuafafine, ua fa’apea fo’i le tama’ita’i, ua le toe ta’u ‘esea Petelo, o si ona tuagane.

Fai mai o se talanoaga na va’aia ai le loimata maligi, “Vaitimaleata si o’u tuafafine, o lea o le a fai lou to’alua, o la’u tatalo i le Ali’i, ia ‘aua ne i avea lea ma ala e sui ai ou uiga, ‘aua fo’i ne i avea ma ala o le a e le toe alofa ai i lou aiga. O le taimi lava e fai ai le to’alua o le tagata, ua lua ai iina ona aiga. ia fa’asalafa lou alofa, ia fa’atutusa lou alofa, i lou aiga, fa’apea le aiga o si ou to’alua. ia tutusa lau tausiga, i lou aiga, fa’apea le aiga o si ou to’alua, ona e maua lea o le filemu o lou loto, ma le fiafia o lou mafaufau. E te manatu fa’apito loa na o lou aiga, o i’ina e tutupu mai ai fa’afitauli, e le toe maua ai se nonofo fealofani o oulua, ae ia e alofa i le tina o si tamaloa o Mikaele, ua nofo to’atasi fo’i na o ia, e pei lava o si ou tina.

“Vaitimaleata, a e talia ma teu i lou loto a’u fautuaga ia, ona tumau lava lea o le nonofo fealofani o si o tatou aiga, e filemu mea uma, o a fo’i vevesi a nai lo’omatutua, ia o tatou maua le onosa’i, ua matutua fo’i latou. Ae ia tumau pea lou alofa ma lou fai aiga lelei Vaitimaleata, ‘aua e te toe popole mai i a ma’ua ma Losalia ma tamaiti, a lea ua mautu mea uma, ae sauni lelei mo lou aso, ia taunu’u i le manuia i le alofa ma le agalelei o le Atua.”

E faia pea…