Vaega: 149

Fa’atalofa atu ma fa’afeiloa’i atu i le atunu’u i lenei taeao fou, ua va’aia ataata o ta’uleleia ina ua o tatou molimauina le susulu matagofie o le la, le tausagi mai o manulelei i le taeao, ua fa’ailoa mai ai le mamana ma le silisili’ese o lo tatou Atua Soifua, o le vi’iga ma le fa’afetai e fa’avavau, amene.”

Ae alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o le a feagai ai i lenei aso. Na muta mai la tatou tala, ina ua auai lupe o le filifili, i le aso fiafia o Vaitimaleata ma Mikaele. E ui ina sa i ai le mea na tupu i le lo’omatua o Salamasina, ae sa to’a pea le tai, e ala i le fa’alaei’au ma le fa’afiafia o le aiga, ae maise o tagata uma na auai.

Ua ta’ita’i mai nei e Petelo ma le tuagane o le lo’omatua o Sila ia Salamasina  i fafo, ae fai mai le tala, o tagata uma na auai, ua foliga mai o se maliu ua fai nei, ae le o se fa’aipoipoga. Ae sa taumafai pea aiga galua, ina ia ma’ea lelei le aso fiafia o Vaitimaleata ma Mikaele. Ua taunu’u nei le solo a Sila ma Petelo i le fale, ma ua fa’anofo ifo nei i lalo le lo’omatua o Salamasina.

Na a’apa ane nei le lima o le lo’omatua ma u’u atu le lima o lona tuagane o Sila, “Sila, fa’amolemole si o’u tuagane, ia fa’ama’ea lelei le aso o si a’u tama, ‘aua le popole i a te a’u, ma ia outou alolofa i a Petelo, i le taumafaiga o le aiga Sila.

“Ia fai lelei le aso o si a’u tama Sila, o a lava mea o lo’o i ai, ia fai lelei mea uma, va’ai le aiga o Mikaele, ia fai lelei. ia  foa’i e le Atua le mau i a te oe foa’i manatu ma mafaufauga lelei e fa’atino ai le aso o Vaitimaleata.

“Petelo, fa’afetai ua e tautua ma lou loto malie, e ui lava ina ua fa’ae’e i a te oe le suafa mata’i o lo tatou aiga, ae e le galo oe, ona ua tu’u lava lou matai, ae e liliu mai e fai le tautua i le aiga, fa’afetai Petelo, fa’afetai mo le tausiga o a’u, ae maise o uso o si ou tama.

“E talofa e, i si o’u tugane o Paulo, talofa e, i a Eseta, talofa e, i si o’u to’alua o Larry, ua o latou le molimauina le matagofie o le aso o Vaitimaleata. Ua toe tagi lotulotu nei le lo’omatia, “E ma’imau e, mafutaga pe ana leai le oti, e se mea a leaga o mea fa’apenei.”

“Sala, afai e te mana’o ia lelei le aso o lau tama, ia e loto tele ma fa’ato’ato’a e oe mea uma, aua e leai se aoga o nei mea uma pe a tupu mai se fa’alavelave i a te oe le tuafafine, ia e loto tele ma fesoasoani mai i a te a’u ma le fanau atoa, i le aso o Vaitimaleata.

Ua ma’ea le sauniga lotu i le malumalu, ma ua alo nei mo se malologa pu’upu’u, e ala i le taumafataga ma ma, aua malo fa’aaloalogia e talitali ai le fa’apaiaina fa’aSamoa o le fa’aipoipoga a Vaitimaleata ma Mikaele. Fai mai, ina ua pao le fa’ilipu, o i’ina na toe fo’i ai le loto vaivai o le lo’omatua o Salamasina i le loto tele. E le i toe fa’atali Vaitimaleata, na savali sa’o mai lava e su’e si ona tina, ae taunu’u ane, o lo’o saofa’i le lo’omatua i luga o le nofoa.

E taunu’u ane Mikaele ma lona tina, o lo’o fai tala a Vaitimaleata ma lona tina. Ua potopoto nei na o latou i totonu o le fale, a’o le taimi lea, ua aga’i le auvala’aulia i faleie ua saunia lelei ma teuteu lelei e tagata o le nu’u. O le taimi lea, ua pao le fa’ili, ua lagona le fiafia o tagata. E i ai le tausoga o Salamasina na  malaga mai Savai’i, le lo’omatua o Vineta.

Fai mai, ua tu le lo’omatua i lona tofi, ua afe nei i luga le ie o le lo’omatua, ae na fa’ate’ia tagata uma ina ua o latou va’ai i se malu ua sili ona matagofie. O le lo’omatua o Vineta, e pa’epa’e lona tino, o le ala fo’i lea ua iloa lelei ai le mamanu o lana malu. Fai mai, e fa’alogo mai Salamasina ma le tina o Mikaele fa’apea ma le ulugali’i fou, o lo’o alu atu le e a tagata, ma le tilotilo mai i fafo, o lo’o ta’afilifili atu le lo’omatua o Vineta i luga o le mutia.

Ua ta’avalevale nei i luga o le mutia ma tauvala’au mai i si ona tausoga, le lo’omatua o Salamasina, “Salamasina, afio maia lau afioga, ai o le mea lea e te mana’o i ai, afio maia, se o ta fa’afiafia i le aso o le afioga ia Vaitimaleata Caroline ma Mikaele, o le a e fa’apena mai ea, ua na o a’u lea ua fa’afiafia, afio maia, se i sae le mata o le aitu i le aso lenei. E letioa fo’i a lagi lelei la aso, e sao fa’alalelei, afio  maia Salamasina.” Ua tu a’e nei i luga ua tamo’e atu ma a’e  luga o le la’au o lo’o tu tonu lava i talane o le fa’ilipu.

Ua suia lagona fa’anoanoa o le lo’omatua o Salamasina i le fiafia, ina ua va’ai mai, ua alu atu le fa’afiafiaga a le lo’omatua o Vineta. E i ai le soga’imiti o le aiga o Mikaele mai Pago Pago, fai mai, na alu le na aso atoa o taumulimuli i a Vineta. Na i’u lava ina fai i ai le tala a le isi toeaina o le latou aiga, “E Kalasa, ai fafasa, e te va’ai atu lava e le kea mai le lo’omatua ae fai lava.” Ua ‘ata Kalasa ma fa’apea ane, e a, ua e loto  leaga fo’i, tu’u mai le toeaina se i fai lona loto.”

E faia pea…