Ads by Google Ads by Google

Fagogo: Lupe o le Filifili

Vaega: 14

 

Fa’amalo le onosa’i, fa’amalo fo’i le tauata’i i le mamalu o le atunu’u i lenei aso, aua o lea ua o tatou va’aia ataata o ta’ulelei, i le alofa ma le agalelei o lo tatou Tapa’au oi le lagi. Tatou sunu’i la’ia o lapalapa o malo ma fa’afo’i le vi’iga i lo tatou Atua, ona o lana tausiga alofa mo i tatou e le mavae, lea o lo’o tatou ‘oa’oa ai pea i faleseu ma o tatou sa’a ai i ma’a o malie e ala i ana fa’amanuiaga.

 

Ae alo maia, o le a toe fa’aauau atu la tatou tala fa’asolo e pei ona masani ai i lenei aso, ae ia manuia faiva ma tiute o le a feagai ai.

 

E i ai lava taimi, e o’o lava tauga upu a Paulo ma Eseta i le itu lea, e fa’alogo mai loa le toeaina ua fai atu se tala a le lo’omatua e uiga i lona tuagane ma lona aiga, e le toe fa’atali Paulo. “Eseka, tu’u la’ia e, mita’i so’o mai lou aiga, lou aiga fai mea leaga, lou aiga e fai mea pi’opi’o e su’e ai a latou mea.”

 

E le i uma tala a le toeaina ae puna mai le lo’omatua, “E a Paulo, e lelei lo’u aiga o la e maua mea, a’o lou aiga, ia ta’ilo, ou te le fia fai atua lava se tala.”

 

A’o le i taunu’u le solo a Paulo ma lona atali’i, na fai le la talatalanoaga i lalo o le ‘ulu e le mamao le va ma lo latou fale. Na talanoa nei le toeaina i lona atali’i, i le mafua’aga ua alu ai lona uso o Samuelu.

 

“Petelo si o’u atali’i, atonu e fa’ate’ia nei oe i le tala o le a ou fai atu, ae ui lava i lea, o le matua alofa lava ia, a i ai le mea e tatau ona tautala atu ai, o le mea lena e tatau ona fai. Ae va’ai oe si o’u atali’i, ua ou iloa le mea ua o’o i ai si ou uso la’ititi o Samuelu, ma ou te iloa lava, o le mafua’aga ua alu ai fa’apea si ou uso, ona ua fefe i a te oe. Ae va’ai oe, a tonu lava e le o taua tele i a te oe ma e le o mamafa fo’i i lou loto.

 

Ae tau ina ou fa’ailoa atu i a te oe si o’u atali’i, o a lava mea o lo’o tutupu i a Samuelu, ia e alofa i si ou uso. E na o le to’alua lava oulua, o a lava ona uiga vaivai, ou te talitonu lava Petelo, ua lava lou iloa e fa’ato’ato’a ai mea uma o le tatou aiga. E leai fo’i se tasi ma te tua i ai ma lou tina, ua na o oe lava, fa’afetai i lau tausiga, ua ou ‘ai ma ou inu, ua ou malie atoatoa i mea uma, Petelo, fa’afetai i a te oe si o’u atali’i.

 

Ae pau lava lenei o le mea ou te fautua atu ai i a te oe, ia e alofa i si ou uso o Samuelu, ona ua pau lava o ona uiga vaivai. E ui lava ina atamai i mataupu o le a’oga, ae e vaivai lava lona mafaufau i mea fa’apea. A’o oe, ua ou iloa ua lava lou iloa i mea uma lava, ia e fa’apalepale ma e onosa’i i amio a lou uso o Samuelu.”

 

Ua le iloa atu e le toeaina i lea taimi aua ua pogisa, le maligi ifo o loimata o Petelo i lea taimi ina ua fa’alogo atu i le tala ua tautala ane ai lona tama i a te ia. Sa lilo fo’i o le loto o Petelo, o le a o’o lo latou aiga i se tulaga fa’apea, sa ona le iloa fo’i, ua avea ana upu na lafo i lona uso ma ala ua alu ausulusulu ai fa’apea Samuelu ona o lona fefe.

 

“Tama, va’ai oe, o a’u upu ma uiga na fa’aali i se taimi ua tuana’i, ua ou le toe manatu i ai tama, e leai fo’i sou manatu e o’o lo’u lima i lo’u uso, e leai, ona ua pau fo’i o le taimi ma le oso a’e o le ita latou, ae ua uma. Ae sa i ai lava lo’u manatu a ma’ea le tatou lotu ona tatou fetufa’ai ai lea, se i fai atu sa’u tala i a Samuelu, a’o lea ua alu fa’apenei si o’u uso, ona o lagona ai lea o le vaivai o lo’u loto tama. Afai lava o le mafua’aga lea ua alu ai fa’apea si o’u uso, ia alofa fa’amagalo mai a’u, ae a o’o taeao pe a aulia i le ola ma le malosi, ona ou usu lea i le pasi usu, e toe au mai Samuelu.”

 

E faia pea…