[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua iloa ai e Kati o lo o ola masini pu’eata i totonu o le potu lea la te talanoa ai ma Mena.]

E lei sepu se gaioiga a Kati ao la talanoa ma Mena i totonu o le potu o lo o taofia ai le tama’ita’i, ina nei avea ma auala e ono lamatia ai o ia ma le taunu’u ai le fa’amoemoe o lo o ia taumafai i ai, o le fa’asao lea o le ola o Mena ae la malaga atu i Italia, ina ua ia vaaia o lo o ola uma mea pu’eata o lo o tutu mai i tulimanu e fa o le potu o le falema’i lea e taofia ai Mena. Ua fa’ataga tago le ali’i i totonu o lana ato pa’u na alu atu ma ia ma aumai i fafo le faila, ona tui lea o lana mata tioata ma taumafai e fa’amalamalama i le tama’ita’i le mafua’aga o lona malaga atu e asi o ia i totonu o le falema’i.

O Mena i le taimi lea, sa na o le luelue ulu e aunoa ma se fesili po o se upu e gagana ai, o isi taimi e fiu lava Kati e talanoa atu ae ua fa’ataga moe le tama’ita’i, ma na avea lea ma itu na tula’i ai Kati ma savali aga’i atu i le tama’ita’i o lo o nofo i le kesi pito i luma o le Ofisa, ma fa’ailoa i ai vaaiga o lo o ia maitauina ia Mena, e talanoa atu ae moe, pe le mafai ona toe aami le foma’i e siaki le soifua maloloina o le tama’ita’i, ina ne’i tupu se fa’aletonu ao la i ai na o laua i totonu o le potu.

O feuiaiga uma nei ua faia e Kati, na lilo ai i le vaai a fitafita lona fa’apipi’iina o ana masini e mafai ai ona pu’e gaioiga uma o lo o tutupu i totonu o le falema’i, ina ia faigofie ai ona ia mata’ituina gaioiga uma o lo o faia ia Mena, ma faigofie ai ona ia faia se auala e toe fa’asola ese atu ai le tama’ita’i mai totonu o le nofoaga lea.

Se’i o tatou liliu atu lava i le nofoaga autu o Leoeo nana i Italia lea ua fa’amautu ai matua o Mena. Fai mai le tala ua tuana’i le masina e le i toe maua atu lava e le ulugali’i se isi fa’amatalaga e fa’atatau i le la tama po o fea o i ai, e le i toe oo atu fo’i se isi o tama’ita’i e to’alua ia na momoliina laua i le faletalimalo lea ua nonofo ai nei, ma ua amata nei ona fa’aletonu manatu o le ulugali’i, pe o le a fa’apefea nei laua pe a la mana’omia se fesoasoani mai le malo, o ai o le a la sulu i ai.

Ina ua fa’amaonia e le ofisa o leoleo suesue a le malo o Enelagi le tele o le a’afiaga o le ulugalii lenei i le faalavelave lea na fasiotia ai e Kati ma Mena ni ali’i faatupu fa’alavelave se taumafai e osofaia lo la aiga, na manatu ai loa le malo o Enelagi e tatau ona saili le ulugalii ina ia toe fa’afo’i atu i totonu o le atunu’u ae sei fesiligia i lo la a’afiaga i lenei mataupu. Ua taumafai leoleo o le malo e saili ni faamaumauga e faatatau i le ulugalii, ma manino ai, ua malaga ese atu i laua i Italia, ma ua silia ma le masina talu ona la tuua le atunu’u o Enelagi. Ua faia fesootaiga a le malo o Enelagi ma le malo o Italia e tusa ai o lenei mataupu, ma manino ai o le ulugali’i lenei o lo o i lalo o le puipuiga a le vaega o Leoleo nana a le malo o Italia, e le mafai ona toe aveese mai i laua mai le atunu’u.