Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua maua ai e le ofisa autu a Kati i Italia, o lea ua mafai ona la sosola ese mai le nofoaga na taofia ai Mena ma ua la sauni e fo’i atu i Italia.]

 

Ua logo tala le ofisa autu o Kati i Italia, o lea ua mafai ona sosola ese mai Kati ma le tama’ita’i o Mena mai le falema’i a le Militeli a Enelagi lea na taofia ai le tama’ita’i mo togafitiga, ma ua faia nei loa fesootaiga ma se auala e mafai ai ona toe o o atu le tama ma Mena i Italia, ae manatua fo’i, o le taimi lea ua taunu’u ai i totonu o Italia Leoleo nana e to’alua mai Enelagi, mo le tau sailia o le ulugali’i lea o lo o masalomia na auai i le fasiotiina o sui o le vaega a le tamaloa fai pisinisi o Tomasi lea na asiasi atu i lo la fale mo le tau sailia o le la tama teine o Mena po o fea ua alu agai i ai.

 

Na paso le vaega o leoleo nana a Italia e tau saili po o fea tonu o le atunu’u lea o lo o nonofo ai leoleo nana e to’alua mai Enelagi lea ua ulufale i le atunu’u, ae poo a fo’i ituaiga suesuega o lo o aga’i i ai a laua su’esu’ega, na pau le auala lea ua manatu le ofisa autu o Leoleo nana a Italia e faia, o le saili lea o se auala e mafai ai ona toe fa’afo’i mai Kati i le atunu’u, pau lea o le tagata e mafai ona ia sailia leoleo nana e to’alua mai Italia e ala i le fa’aaogaina o lona tomai fa’a leoleo nana o lo o i ai. O le nofoaga lea ua fa’amautu ai nei Kati ma Mena, e leai ma se isi e mafai ona ia mateiaina, o se nofoaga e le masani ona aga’i i ai ni osofaiga a leoleo ma fitafita, ae ua filifilia e Kati la te faamautu ai e tapena ai mo le toe fo’i atu i Italia.

 

“Sole Kati, e pei lava o se ta’avale leoleo la le e paka mai i le isi itu o le auala ..” o le musumusu atu lea a Mena ia Kati lea o lo o talanoa i le latou ofisa autu i Italia i luga o lana masini komipiuta. “E a lau tala, o ai?” o le fesili fia iloa lea a Kati ma tu atu loa i luga i le taimi lea, ma ia vaaia ai se ta’avale leoleo o lo o paka mai i le isi itu o le auala i totonu o le tama’i pito nuu lea o lo o la nonofo ai. E lei toe fa’atali Kati i le taimi lea ae ua savali atu loa i totonu o le potu lea e teu ai lana ato, ua aumai i fafo ana tama’i fana otomeki e lua o lo o i ai ona nana lea i totonu o lona ofu talaloa o lo o fai, ona ia faatonu lea o Mena e faatali atu i le fale ae sei alu e faatalanoa leoleo o lo o i totonu o le ta’avale. E fetaui le taunu’u atu o Kati i le vaega tonu o lo o paka ai le ta’avale a leoleo ae vaaia loa e Kati le aga’i atu o le isi ta’avale a leoleo ma paka i tua o le ta’avale lea na muamua paka i le nofoaga lea, ma ia vaaia ai leoleo e to’afa ua tuli oso i fafo ma talanoa i fafo o taavale leoleo e to’alua, a o aga’i atu pea Kati i le vaega o lo o paka mai ai ta’avale a leoleo.  “Fa’amolemole lava, e te nofo i le pitonuu lea”, o le fesili lea a le isi leoleo ia Kati, ona tu lea o le ali’i ma fa’asaga atu i le leoleo ma tali atu i ai, “leai, ou te nofo i le isi nuu i luma atu, ae na ou sau ou te savali i le vaveao.”