[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua faamautu ai Kati ma Mena i le fale o le isi la uo i se aai maotua e fa’atali ai se auala la te toe fo’i atu ai i Italia manu e lei maua i laua e Leoleo i Enelagi.]

Na ona uma lava ona tali atu o Kati i le ali’i leoleo toe fa’asaga loa i luma o le a toe faaauau lana savali aga’i i le isi pito nu’u, peita’i na toe fesili atu i ai le leoleo, pe mafai ona ia fesoasoani atu i le latou galuega, i le tau sailiina lea o se ulugalii e fou mai i le nofoaga lea, ona o lo o masalomia lo la aafia i le faalavelave lea na fasiotia ai le alii faipisinisi logologo o Tomasi i totonu o lona fale talimalo. “O le a la se mea e mafai ona ou fesoasoani atu ai ia te outou”, o le fesili atu lea a Kati i ali’i leoleo, ae na faatonu e leoleo pe mafai ona ta’uina atu ni fa’amatalaga na te fa’alogo i ai e faatatau i le ulugalii fou lea latou te tau sailia, ona lue lue lea o le ulu o Kati ma savali ese, ae ua toe tuli oso leoleo i le la taavale ma toe aga’i atu i le aai.

Na ona te’a atu lava o leoleo tago loa ma le tama i lana telefoni ua vili ai Mena o lo o fa’atali mai i le fale, ma fai i ai e sauni lelei i soo se taimi e osofa’i atu ai ni leoleo i le fale po o ni fitafita a le Ami, aua ne’i ona tuuina i ai se avanoa a ia tafana uma, ia vave fo’i lana gaioi ma ia lelei lana vaai.

Sei tatou toe fo’i atu lava i totonu o le malo o Italia lea o lo o lalafi ai matua o Mena. Ua atoa le lua vaiaso talu ona taunu’u leoleo nana e to’alua mai Enelagi i totonu o Italia, mo le tau sailiina o ni fa’amatalaga e fa’atatau i le ulugalii lea ua sosola mai ma nonofo i Italia, ona o lo o masalomia lo la aafia i le faalavelave lea na fasiotia ai ni ali’i faigaluega a le malo sa fesoasoani i le tausiga o i laua i le fale o tagata matutua. Na lilo i manatu o ali’i leoleo nana e to’alua mai Enelagi, ua leva ona iloa e le malo o Italia lo la i ai i totonu o le atunu’u, ma ua iloa fo’i le fale talimalo lea o lo o la fa’amautu ai, pau le itu lea o lo o fia maua e le ofisa autu o le vaega Leoleo nana i Italia, o le taimi lava e fa’alavelave ai leoleo nana ia e to’alua mai Enelagi i le ulugalii lea o lo o latou fa’alafiina, o le taimi fo’i lea e fasiotia ai ma i laua.

O le nofoa afi na sau mai Enelagi o lo o la’u ai uta mo tagata e leai ni fale e nonofo ai i totonu o Italia, na mafai ona lalafi ai Kati ma Mena ma la sao atu ai loa aga’i i Italia. E 5 itula na malaga mai ai le nofoa afi, ma taunu’u ai loa i luga tonu o le tuaoi o malo ia e lua, ona fa’atonu ai loa lea e le ave nofoa afi Kati ma Mena e sili ona la o ese ma le nofoa afi, manu e le i taunu’u i le vaega o lo o siaki ai e leoleo le pasese, ina ne’i maua atu ai ma laua, ona malilie lea o Kati ma Mena ma la tulioso ese loa ma le nofoa afi, i le tuana’i ai o le lua itula talu ona taunu’u le tama i eleele o lona malo, na ia tago ai loa i lana telefoni ma vili ai loa le numera a lona ta’ita’i o Eteuati i le leva o le po ma fa’ailoa i ai, o laua lea ua taunu’u i laueleele o Italia.