[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua taunuu ai Kati i le vaega tonu lea ua fuafua e feiloai ai Mena ma le au ali’i o lo o ave faamalosia ona matua.]

Na vaaia e Kati le pisi solo o tagata ofu uli na o atu i ta’avale e lua o lo o paka i le isi itu o le auala laupapa, e foliga mai ua tapena se latou osofaiga, ona toe siaki lea e Kati le telefoni a Mena ma vili i ai po o fea ua latou o o mai ai, ae na tali le tamaitai o latou lea ua toeititi taunuu atu i le nofoaga ua fuafua e feiloa’i ai ma le au alii o lo o latou ave faamalosia ona matua. Na tape e Kati le telefoni ae vili le numera a lona ta’ita’i ma fa’ailoa i ai le vaega tonu lea ua lafi mai ai, atoa ai lona faatonuina o le ta’ita’i ina ia tapena i so o se gaioiga e ono tula’i mai, ona o lea ua ia vaaia le tau fai sauni o tagata o lo o faatalia latou. Na ofo le ta’ita’i a Kati i le vave o gaioiga a le ali’i ona faapea lea o ona mafaufauga, “o le tagata lelei lava lenei ua tatau ona avea ma ta’ita’i o Leoleo nana i totonu o Italia, e le gata e vave lona mafaufau i fa’aiuga fai ae o se tagata fo’i ua lava lona tomai i auala eseese e fa’atino ai le galuega”.

E lei umi ona va le talanoaga a Kati ma lona ta’ita’i ae ona vaaia loa ta’avale uli a le vaega o Leoleo nana ua sosolo lemu atu i le vaega tonu lea ua faatulaga e feiloa’i ai ma le au alii leaga lea ua leva ona taunuu. Talu mai le taimi na taunuu ai le au alii leaga ia i le isi itu o le auala laupapa, e lei vaai lava Kati i le ulugalii ua aumai i fafo o le ta’avale, ma o le itu lea sa sili ona popole ai lona loto, ina nei pepelo le au alii ia ae ua uma ona latou fasiotia le ulugalii. Na vaaia e Kati lana pele o Mena ua savali mai i fafo ma le ta’avale ma aga’i mai loa i le vaega lea o lo o tutu atu ai alii e to’alua ma la suki lan uliuli, ae o lo o uu mai e Mena se ato ta’ita’i uliuli i lona lima, e foliga mai o se vaega lea o le tupe e 10 miliona lea ua faatonu e le au alii ia e avatu ona faatoa mafai lea ona tatala mai i tua ona matua.

Na ona taunuu lava o Mena ona faatalofa lea ma le isi o le to’alua lea, ona ia tuu lea o le ato i le alii na la faatalofa, ona toe laa lea i tua ma tu mai ai, ae o le taimi lea na tatala ai e le isi alii le ato ma faaali atu i le alii o lo la toalua, ona toe tapuni lea o le ato ae ua talo lona lima i tua i le ta’avale, ma ia vaaia ai loa le matala o le faitoto’a tele o le ta’avale i le pito i tua, ma ia vaaia ai le ulugalii ua ta’ita’i atu i le vaega tonu o lo o tutu mai ai Mena ma isi alii o le vaega leaga lea, ona tago lea o Kati ua vili le telefoni a lona ta’ita’i o lo o nofonofo mai i totonu o le ta’avale ma fa’ailoa i ai, e to’alua isi ali’i o lo o i le vaega lea e paka ai ta’avale, ma o lea o le a ia tafanaina ali’i ia e to’alua, ae ia sauni lelei fo’i o ia ma lana vaega ina ne’i tula’i mai se fa’alavelave ia Mena ma ona matua lea ua tutu fa’atasi mai i le vaega o lo o faia ai talanoaga. Na ona uma lava o upu ia a Kati i lona ta’ita’i, fa’asaga atu loa ma tafana ali’i e to’alua o lo o fa’atali atu i le vaega o lo o i ai ta’avale ma feoti ai.