E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na fiu ai Kati e toe fesili atu i le tamaitai lea la te talanoa ae ua tau le mafai ona tali i le ova o lona ‘ona.

E fiu lava Kati e toe tu’i fesili atu le tama’ita’i na la talanoa e fa’amanino atu le uiga o lana tala, ae ua gau ifo lava i lalo le ulu o le tamaitai ua moe i le ova o lona ‘ona, ona tago atu loa lea o le alii ua faataoto le tamaitai i luga o le moega sei fai sana malologa, ae ua faaauau pea lana evaga na o ia i totonu o le potu ma ki ana masini e matamata ai i mea sa tutupu i ana osofaiga ua te’a. Ua toe tau le matamata a Kati i le osofaiga lea na latou fasiotia ai alii na latou ave faamalosi matua o Mena, atoa ai ma le gaioiga sa ia faia, ona ata lea o le tama ma lulu lona ulu i le mata’utia o gaioiga sa ia faia, faalagolago lea i le poto ma le atamai ua ia maua mai aoga faa Leoleo nana sa aoga ai i totonu o Italia. Na motu fa’afuase’i le matamata a Kati ina ua vaai atu i lana imeli o lo o tuu mai ai le imeli mai ia Mena, lea o lo o fesili mai po o fea o i ai, ae na tali Kati, “o au lea ou te moe i totonu o le potu i le faletalimalo lea na nonofo ai ou matua, lea ou te taumafai e suesue tagata faatupu faalavelave mai Enelagi sa galulue ia Tomai, lea ua ou maua tala o lo o galulue i le faletalimalo lea.”

Na faatofa Mena ia Kati ona tape loa lea o le imeli a le tamaitai ma alu loa i lona moega e moe, ae fetaui loa ma le maua e Kati o se fesootaiga faapitoa mai leoleo, e i ai se faalavelave o lo o manaomia ai se fesoasoani a leoleo i le nofoaga o lo o i ai le faletalimalo lea o lo o nofo ai, ma o lo o talosagaina se fesoasoani a soo se leoleo o lo o latalata ane i le nofoaga. Na iloa e Kati o le nofoaga tonu lava lea o lo o i ai lea ua manaomia mai ai se fesoasoani, ona nofo sauni loa lea o le tama e ala i le tapena o ana a’upega mata’utia ma faasauni i soo se faalavelave e ono tula’i mai, ma ua faapipii fo’i ana masini e mafai ai ona pu’e ni gaioiga e tutupu i totonu o le faletalimalo.

Na ona uma lava ona loka e le tama o le potu lea o lo o moe ai le tamaitai na la talanoa, aapa atu loa aumai ana fana ma sulu i tulmanu o lona ofuvae o lo o fai, faatoa pito atu ai loa lea i tua o lona ofu talaloa e kava ai ana fana ma le faigofie ona iloa mai e se isi. E fetaui le savali atu o Kati i le hall way e aga’i atu i le Bar o lo o i totonu o le fale talimalo, ae tau atu loa ma lana vaai i ni alii leoleo se to’alua o lo o tutu mai i luma o le faitoto’a o le Bar e foliga mai o ni ali’i leoleopo i la toniga o lo o fai. Na masalosalo Kati i alii leoleo ia e tutu i luma o le Bar, o lea na faataga tago ai i lana telefoni ma fa’ataga tali e faafoliga ai o lo o tatagi lana telefoni, o le taimi na tali ai e Kati lana telefoni, na maua ai loa ma le avanoa e fa’ataga toe savali ai i tua o isi laina potu ma tamo’e ai loa e aga’i tonu lava i le nofoaga lea e masalomia o lo o avea ma nofoaga autu o le au fa’atupu fa’alavelave.