E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na tete’i ai leoleo ina ua latou fa’alogoina le pa pa mai o fana i totonu o le potu o lo o talanoa ai Kati ma ali’i e to’afa o lo o taofia ai.

Ne pei o le emo o le mata gaioiga a leoleo i le taimi lea, i lo latou taufetuli aga’i atu i le potu taofia lea o lo o i ai Kati ma pagota e to’afa, i lo latou fia iloa o le mea ua tupu, ae na tete’i leoleo ina ua taunu’u atu i le faitoto’a o le potu taofia ae tatala mai loa e Kati le faitotoa ua savali mai i fafo, ona ata tasi lea o Kati i leoleo na taufetuli atu ma fa’apea atu i ai lana fa’atonuga, “Fa’amama uma totonu o le potu”. Na faateia leoleo ina ua taunuu i totonu o le potu ma latou vaaia ai alii e toafa sa taofia ai ua tau fai fola uma mai ua feoti, ae o Kati i le taimi lea, na ona savali sa’o atu lava oso i lana ta’avale fa’asasa’o loa i le la fale ma Mena lea o lo o fa’atali mai ai le tamaitai ma ona matua. “Faafetai Kati mo le fa’asaoina o ma ola ma le olomatua, Faafetai le loto alofa, faafetai le agalelei ..” o le mau faafetai lea na fetaia’i ma Kati ina ua ia tatala le faitoto’a o le fale ma ia vaaia ai matua o Mena o lo o saofafa’i fiafia mai i luma o le potu malolo ma matamata le TV, ae o Mena o lo o pisi i feau masani o le aso.

“Ou te iloa ana leai oe faapenei ma te le toe feiloai ma si a ma tama teine e toatasi, e le toe vaai foi se isi i le mata o le la, sa ou manatu fo’i o le po lea na sauni ai le au alii leaga e fasioti a’u, na ou manatu fo’i o le ma po mulimuli fo’i lea ma le olomatua, ae faafetai ua e fa’asao o ma ola ...” o le talatalanoa atu lea a le toeaina ia Kati, ma inu a latou ipu ti i totonu o le fale a le malo lea ua latou nonofo ai. O le nofoaga lea ua faamautu ai Kati, o le tama’ita’i o Mena ma ona matua, o fale a le malo e faapitoa mo ta’ita’i maualuluga o le malo, e le gata e puipuia e le Ami ae matua malu puipuia fo’i vaega uma o fale nei i masini e mafai ai ona iloa se tagata o lo o taumafai e osofa’i pe fa’aleaga le fale. Na iloa e Kati, e tele le mataupu e fia talatalanoa ai i Matua o Mena, aemaise ai lava i le mataupu e fa’atatau i le tamaloa faipisinisi o Tomasi lea na ia fasiotia i Enelagi, ona o se fa’amatalaga mai le toeaina ma le olomatua, o le a fesoasoani tele lea i lana sailiga o lo o faia nei, i le tau sailia lea o le vaega fa’atupu fa’alavelave lea e masalomia o lo o nonofo i totonu o Italia.

Na motu fa’afuase’i le talanoaga a Kati ma lona aiga ina ua tu’itu’i atu le faitoto’a, ona savali atu loa lea o le tama ma tatala, ae ona vaaia ai se fitafita o lo o tu mai i le faitoto’a. “Lau susuga Kati, ua poloaina a’u e le Ta’ita’i au o le Ami a le malo o Italia, ina ia fa’ao’o atu le tusi valaaulia lenei mo oe ma lou aiga”. Na ona uma lava o tala a le fitafita, togi ma lana fa’alo ia Kati, ona tali atu ai fo’i lea o Kati e ala isi ana tama’i fa’alo, ina ua mae’a, sa ia tatala le tusi valaaulia na te fia iloa po o le a.