E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na tatala ai e Kati le tusi valaaulia se’i vaai po o le a lea tusi.

Na te’i Kati ina ua ia tatala le tusi valaaulia ma ia iloa ai, o se valaaulia mai Aferika i Saute i se fonotaga o lo o fa’amoemoe e faia ai i le vaiaso e sosoo ai, mo Leoleo nana uma i le lalolagi, ae o lo o aofia ai ma Leoleo nana mai atunu’u Arapi ia e masalomia sa latou lagolagoina malosi taumafaiga a le tamaloa fa’atupu fa’alavelave o Tomasi mai Enelagi, lea na ia fasiotia i totonu o lana faletalimalo. Na tu Kati mo ni nai sekone ua le gagana ao fa’atau pupula i le tusi valaaulia, ona ata lea o Mena ma fesili atu i ai, “pe i ai se mea ua mamafa i lou finagalo e fa’atatau i le tusi valaaulia”, ona faatoa toe sui lea o foliga o Kati ma fa’apea atu i lana manamea, “E leai Mena, e leai se mea tele o taua mai i le tusi valaaulia, pau le itu ua ou te’i ai ona o se taimi muamua lea ua maua mai ai sa’u tusi valaaulia mai Aferika i le isi fonotaga tele a le lalolagi lea ua fa’amoemoe e faia ai”, o le tali atu lea a Kati, “Fonotaga?, o le a fo’i lena fonotaga ua mana’omia mai ai oe, vaai pe le o se mailei ina ia maua ai le avanoa e fasiotia ai oe”, o le toe tali atu lea a Mena ia Kati, ae na te’i le tama’ita’i ina ua fa’amatala atu e Kati ia te ia isi fonotaga tetele e lua sa faia i Lonetona i le tausaga ua mavae, lea na osofaiga ai e se vaega fa’atupu fa’alavelave le potu sa faia ai le fono, i le taimi tonu lava na fa’ae’e atu ai le fa’ailoga taualoa ia te ia, o ia o le Leoleo nana numera tasi i le lalolagi, ma e le i tele i se pito lona fa’atoilaloina o le au alii na mafua ai le vevesi, ae emo ane le ata, o le tamaloa o Tomasi sa ia fuafuaina le osofaiga lea.

E le i toe manatu Kati e fa’aalu se isi taimi umi e toe mafaufau ai i ni isi galuega i totonu o Italia, ae ua ia manatu loa e fa’aavanoa nai aso o lo o totoe e mafuta ai pea ma si ana manamea o Mena ma nai ona matua, e fa’atali ai le aso lea ua fa’amoemoe la te malaga ai ma le isi sui o le Ofisa o Leoleo nana i le fonotaga, e fai ai laua ma sui o le atunuu o Italia. E toe tolu aso taunuu i le aso o le fonotaga ae taunuu loa Kati ma le tamaitai failautusi i le fale talimalo lea ua faatulaga la te nonofo ai i le isi aai i Aferika. Na ona mautu lava o fuafuaga uma a Kati ma lana paga, fa’atonu loa e le ali’i le tamaitai ina ia fa’amuli atu i le la potu ae sei alu e faitau sana tusi i le Faletusi toe alu atu ai, peita’i ua manatu Kati, o lona avanoa lelei lea e faia ai sana suesuega faapitoa mo tagata o le a auai i le fonotaga lenei. O gaioiga masani lava a Kati sa faia, e le gata sa sui ana teuga ae ua sui fo’i ma ana sikaili ina ia faigata ai ona iloa o ia e le au faatupu fa’alavelave i totonu o le malo. O fa’amaumauga sa maua e Kati mai ni isi o Leoleo nana i totonu o Aferika, e to’a 4 sui mai le vaega o Leoleo nana a Enelagi o le a auai i le fonotaga lenei.