E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea ua sauni ai Kati ma lana fana e osofa’i le Van lea ua paka mai i tafatafa o le la ta’avale ma lana paga.

E nofo fua Kati ma lana fana otomeki lea o lo o uu i lona lima, ae o lona mafaufau o lo o ta’amilo solo i lana ulua’i gaioiga e fai pe afai e osofa’i fa’afuase’i laua e se isi o le vaega na o atu i le Van lea o lo o paka mai i le isi itu o le malae. Pe tusa o le 20 minute talu ona paka mai le Van uliuli i tafatafa o le ta’avale a Kati ma lana paga, ae vaaia loa le matala mai o le faitoto’a i le itu o le ave ta’avale, ma vaaia ai se ali’i e laei mama o lo o oso mai ai i fafo, ona tu lea i le isi pito o le ta’avale ma talanoa i le telefoni. mo le 10 minute, ae o mata e le malolo i le tilotilo solo i isi itu o le loto o le fale talimalo. O le tomai fa’aleoleo nana o lo o ia Kati atoa ai ma le lelei o fesootaiga i ana masini o lo o i totonu o lana ta’avale, na faigofie ai ona faasalavei Kati i fesootaiga o lo o faia a le ali’i lea, ma iloa ai o lo o talanoa o ia i se laina telefoni i fafo atu o Aferika.

Na ona uma lava ona talanoa o le ali’i lea i lana telefoni, tapuni loa le telefoni ma sulu i le taga o lona ofuvae o lo o fai, ae aapa atu ua tatala le isi faitoto’a pito i tua o le ta’avale, ma vaaia ai loa e Kati le se’i mai e le ali’i lea o se fana otomeki ma se tama’ita’i e foliga mai o ni pulufana o lo o i totonu. Na ona tau lava o le vaai a Kati i le fana, e le i toe fa’atali ae ua aapa atu loa ma seki lana fana ua sauni e osofa’i le ali’i lea. Na ona mautinoa lava e Kati e na o le ali’i lava lea sa sau i le ta’avale, ona oomiina loa ma le amoki o lana fana ma fasioti ai le ali’i lea, ona oso loa lea o le tama i fafo ma lana ta’avale ae ua savali faanatinati atu nei i le Van lea o lo o paka mai i le isi itu ma oso ai i totonu i lona fia iloa o mea o lo o i ai, ae na matua te’i Kati ina ua ia vaaia ni ato ta’ita’i lanu uliuli se fa o lo o i totonu o le ta’avale, e tutumu i tupe pepa ta’i US$100, ma e foliga mai e faitau miliona ma miliona le aofa’i o le tupe o lo o i totonu o ato nei e fa, e le iloa pe na gaoia mai i se faletupe, ae o le isi nofoa o le ta’avale o lo o i ai fana otomeki e 10, o pusa ututau faapea ai ma seevae e masani lava ona fa’aaoga e fitafita po o leoleo fo’i i taimi o a latou osofaiga.

E le i toe fa’atali Kati i le taimi lea, ae ua ia logoina loa leoleo o le malo o Aferika e tusa ai o le van, e ala i lona fa’aaogaina o se telefoni e le mafai ona iloa, na ona mae’a lava, fa’aola le la ta’avale ae sosola ese mai le nofoaga lea sa la nofonofo ai. E fetaui le taunu’u o Kati ma lana paga i le malae va’alele, ae fetaui ma le taunu’u atu i ai o sui o le vaega a le tamaloa leaga o Tomasi, lea lava o lo o pisi i le tau tuliloloaina o ia po o fea e maua ai, ae na faateia tama faapitoa a le tamaloa o Tomasi ina ua latou vaaia Kati i le malae va’alele i Aferika i le afiafi lea.