Ads by Google Ads by Google

FAGOGO: O KATI LE LEOLEO NANA

Vaega #1

[E faatalofa atu i uo ma paaga masani a le tatou polokalame i aso Toonai taitasi, faamoemoe sa outou maua se vaiaso fiafia ma le manuia i le agalelei o le matai o le lagi, ae o le vaega muamua lenei o le tatou tala faasolo fou i le alii o Kati.]

E fetaui lava le taunuu o le malaga faalilolilo a le tama o Kati i totonu o le taulaga i Rusia ae salalau loa le tala i se kegi leaga o loo fai ma latou amio le ave faamalosi o tamaitai ma fasioti, o nisi o taimi latou te osofaia ai pisinisi tetele, o faletupe ma fale o aiga milionea, ma latou gaoia ai le faitau miliona ma miliona o tupe mai totonu o nofoaga eseese nei i totonu o le taulaga. Na ona taunuu lava o le vaalele na malaga atu ai le o Kati i le malae vaalele tele i Rusia, aga’i sa’o loa lava lana faigamalaga i le nofoaga faapitoa lea ua faatulaga e le malo e faamautu ai. E faigata ona iloa e tagata le tama i ana sikaili, aua e na o lona ofuvae uumi lava ma lona mitiafu o loo fai, ae ofu atu ai i tua ma lona ofu talaloa lanuuliuli, le ofu lea o loo ta sulu ai ana fana pupu’u e lua, e faaagaga ai mo se isi na te osofaia o ia.

E iloa gofie lava Kati e le o ia o se tagata Rusia pe afai e filo solo ma tagata o le atunuu i le taulaga, aua e ese ai lava ona foliga ma foliga o tagata Rusia, e tai tutusa lava ma ni tagata mai Saina ma Kolea pe afai e o mai i Samoa, e iloa gofie lava i latou i o latou foliga. Na ona savali atu lava o Kati i le vaega lea e faatau ai nusipepa, piki lana pepa ona toe savali lea i le fale kofe lea e faasaga mai i le isi itu auala ina faitau ai lana nusipepa ma inu lana ipu kofe. “Talofa, e manaomia se fesoasoani mo sau taumafataga e aumai,?” o le fesili lea a le tamaitai faigaluega, “Aumai sa’u ipu kofe ma se sanuisi fuamoa faamolemole,” o le tali atu lea a Kati ona toe faaauau lea o le faitauina o lana nusipepa. Ao faitau le pepa a le tama, sa ia maitauina ai le tele o faasalalauga mai le malo i le tau sailia lea o ni tagata e mafai ona ofo atu o latou taimi, e suesueina ai mataupu e uiga i kegi leaga o loo faia le amio o le ave faamalosi o tamaitai ma fasioti, aemaise ai o i latou o loo gaoia faletupe, pisinisi ma fale o aiga.

E le’i atoa se afa itula na i ai Kati i totonu o le faleaiga, ae ona vaaia loa ni alii se to’alua ua ulufale atu ma nonofo mai i le isi laulau e mamao ese mai ma le laulau o loo nofo atu ai. Na faalogoina e Kati tala sa tautatala i ai le aualii lea i si teine faigaluega o le faleaiga, e ese lava a laua tala, e foliga mai o ni alii faatupu vevesi ma le faamimisa le to’alua lea, peitai, e le’i ano lava i ai le tama ae sa faitau pea lana nusipepa ma ai lana sanuisi fuamoa. Na ona maea lava, savali atu loa ua totogi le tupe i le kesia ma savali loa i fafo ma le faleoloa. O le aso na sosoo ai na toe afea ai foi e Kati le fale kofe lava lea ae ua sui la ana teuga, ua fai lona pulou pei o se pulou kaupoe, o ona seevae malo ma totinilima uli e kava ai ona lima, ae o fana e lua o loo sulu i pito e lua o lona ofu talaloa o loo fai. E lei umi ona i ai Kati i totonu o le faleaiga ae ona toe vaaia foi le aualii e toalua lea sa vaai ai ananafi, ua toe ulufale atu i le faleaiga, ae foliga mai e matua onana lava i laua.