Ads by Google Ads by Google

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea ua taunu’u ai fuava’a tetele e lua mai le malo o Asuria i gataifale o le malo o Initia, ma ua sauni fo’i e fa’atino la latou osofa’iga e tali atu ai i le osofa’iga na faia fa’asaga i lo latou malo.]

E le’i taitai tafa ata o le taeao o le aso lea na soso’o ma le aso na taunu’u ai le fuava’a a le malo o Initia i lona taulaga, ae taula loa fuava’a tetele e lua a le malo o Asuria i lona gataifale, ma ua sauni o le a fa’atino la latou osofa’iga, na manino i le manatu o le ta’ita’i ‘au lea o lo o ta’ita’ia le osofa’iga, e leai lava se isi taimi e pito sili ona lelei mo le osofa’iga, o le taimi tonu lava lea ua taunu’u ai la latou va’a, aua o lea o lo o malolo le to’atele o tagata o le malo. Ua uma ona fa’ata’oto e Iasoni le fa’afanua atoa lava i totonu o le a’ai o Initia atoa ai ma ‘auala e tatau ona latou uia ina ia manumalo ai la latou osofa’iga.

E tafa ane loa ata o le aso fou ae taunu’u loa fitafita fa’apitoa a Iasoni ma latou togiga fa’apitoa i gatai o le a’ai, i le mae’a ai lea ona o latou fa’aaogaina o masini e maulu mai ai mai tai i le moana aga’i atu i uta i le pa’u matu. Na ona taunu’u lava o le vaega fa’apitoa lea i le matafaga, tatala ‘ese masini ma mea uma sa latou fa’aaogaina, ona toe tu’u lea i luga o va’a pa’u ona toe fo’i atu loa lea o va’a pa’u nei i tai i le vaega o lo o taula mai ai fuava’a fa’apitoa ae ua amata loa le osofa’iga a fitafita a le tama o Iasoni, lea ua fa’atutu atu nei i le nofoaga ‘autu o le malo, ae o le taimi lea, e to’aitiiti lava nai fitafita o le malo o lo o tiute i le taimi lea, ona o le to’atele sa mafuta ma o latou aiga i le po lea na fa’atoa toe fo’i mai ai le osofa’iga.

E fetaui lava le tafa ane o ata ae taunu’u loa fitafita a le tama o Iasoni i le mati’eti’e lea e fa’afesaga’i tonu lava ma le faitoto’a e ulufale atu ai i totonu o le lotoa o le malo, ma o latou va’aia ai loa fitafita e to’a lua o lo o tiute mai i le faitoto’a. E le’i umi lava ona fa’atulaga gaoioiga ae pau’u i lalo fitafita ia sa tiute i le faitoto’a ina ua tafana e fitafita a Iasoni, ma fa’asolo atu ai lava le osofa’iga aga’i atu i totonu o le maota o le malo, lea na maua atu ai isi fitafita i luma o le maota atoa ai ma le itu i tua, ma fa’apea fo’i  ona tafana e fitafita a le tama o Iasoni. O le ta’ita’i ‘au lea o lo o i luga o le fuava’a lea o lo o taula mai gatai, o ia lena o lo o fa’atonutonuina maia le osofa’iga, ona o i’ina lea o lo o i ai le fa’afanua atoa o le malo o Initia lea o lo o fa’alagolago i ai le osofa’iga. Na ona ulufale lava o fitafita a Iasoi i totonu o le maota o le tupu, ona latou va’aia lea o le potu fa’apitoa lea e ‘auro lona faitoto’a, ma latou ulufale ai loa i totonu, lea na o latou va’aia ai purinisese Lorina o lo o ta’oto mai i luga o lona moega, o lo o saisai ona vae ma ona lima i maea.