Taeao manuia i lou alafa’i mai i lenei taeao fou, e ao ai ona o tatou fa’apea ifo, “Le Atua e, ua o matou fa’alogoina le tausagi mai o manulele, ua o matou va’aia fo’i le ‘oso a’e o le la, ona o matou fa’apea ai lea, fa’afetai i le ola ma le malosi ua e foma’i mo i matou i lenei aso, Amene.”

Ae alo maia, o le a toe fa’aauau atu la tatou tala e pei ona tusia e le ali’i tusi tala o Richard Preston, ae ua ou taumafai e fa’aliliu i la tatou gagana ina ia o tatou iloa ai le tele o isi fa’ama’i mata’utia na a’afia ai le soifua ma le ola o tagata fa’apea ma manu.

O le a fa’aauau pea la tatou tala i le feiloa’iga a le ali’i tusi tala ma le ali’i foma’i o Peter Jahrling i totonu o le nofoaga a le Ami i Fort Detrick. Ua fa’asino ane nei e le ali’i foma’i o Jahrling i a Preston foliga o le virusi o le Ebola, ma e foliga o ni manoa ua ta’ai’ai, e pei fo’i o le supokeli e tavi’ovi’o solo.

Na fa’apea le tala a le ali’i foma’i i a Preston, “O le Reston, oi, na ou tau fai atu o le Reston, ae e leai, o le Zaire.” O le manatu autu, e le mafai ona e iloaina lelei le ‘ese’esega ona e tali tutusa lava.” O le fesili ua tula’i mai, aisea ua malosi ai le a’afiaga o tagata i totonu o le Zaire, ae aisea ua le a’afia ai tagata i totonu o  Reston, ona e vavalalata auga o virusi nei e lua.

O le Ebola Reston, lea ua fa’aigoa ai e Jahrling ma Giesbert ia le virusi lea na maua ai manuki i totonu o le nofoaga i Reston, atonu na mafua ona tau a’afia ai tagata faigaluega, ona e mafai ona fa’aaoga le ea, e pepesi ai, ma e i ai le talitonuga o le mafua’aga tonu lea na a’afia ai tagata faigaluega i Reston.”

Na fesili le ali’i tusi tala o Richard Preston i le ali’i foma’i, “Pe na ‘alo mai se pulu fana malosi i latou nei?” Na tali le ali’i foma’i, “Ailoga, ou te le iloa, ae ua tau tonu lava le pulufana, ua pau lava ua laki, ona o le pulufana e le o se pulufana malosi, o le pulufana e fausia i le pa’u, ma o le fana na fa’aaoga o le ituaiga o le luasefululua .22, ae le o se fasefululua .42.”

O le mea e popole ai, ina ne i toe tupu, ona fa’apea lea o tagata, e leai, o le Reston, ae ‘emo ane le ata o le uso mata’utia o Reston, o Ebola Zaire. Ua ma’ea le feiloaiga a le ali’i tusi tala ma le ali’i foma’i, ona o lea ua fa’amatala ane uma mea na tutupu i totonu o le nofoaga o manuki i Reston fa’apea ma le iloa e le ali’i tusitala o foliga o le virusi.

Fai mai le fa’amatalaga a le tusi tala o Richard Preston, ua tu’ua e le ali’i foma’i o C.J. Peters le Ami, ae ua avea nei ma ta’ita’i o le Vaega su’esu’e i totonu o le C.D.C. i Atlanta. ina ua toe fa’asolosolo ona mafaufauga i le mea na tupu i Reston, sa ia fa’amatala ai loa i le ali’i tusitala o Preston ona fa’alogona ma ona manatu i le mea na tupu.

Na fa’apea le fa’amatalaga a le ali’i foma’i o C.J. Peters, “O lo’u manatu, o le aluga na i ai le a’afiaga o manuki i totonu o Reston, na i ai lava le Ebola, ma o le mafua’aga fo’i lea na mama’i ai manuki. Afai e te va’ai i ata o ma ma o se manuki ua a’afia i le Ebola Zaire, ona e iloa ai lea, ua matua’i fa’aleagaina lava ma ma, ua e va’ai i ni ata?” O le fesili lea a le ali’i foma’i, ae na tali le tusi tala o Richard Preston, ua ia va’ai i ai, ina ua fa’aali ane e Nancy Jaxx ia te ia.

E faia pea…

Fa’aliliu: Akenese Ilalio Zec