Fa’atalofa atu i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Ali’i e, e fa’asaga a’e o’u mata i lau Afio, e o’o mai ai lo’u fesoasoani, o lo’u fesoasoani e mai i Lau Afio lea, ia vi’ia pea Oe e fa’avavau, fa’avavau lava, Amene.”  Ae alo maia, o le a toe fa’aauau atu la tatou tala fa’asolo mo lenei aso, ae ia manuia le alofa faiva o le atunu’u i feau ma galuega o le a feagai ai i lenei aso.

Mai le sefululua o tausaga o le ali’i tusi tala o Richard Preston talu ona ia tu’ua Aferika ma ona matua, o lea ua toe fo’i nei i Aferika, e fa’aauau lana tusitusiga ma fai ana su’esu’ega e ala i lana tusi lenei, “The Hot Sone” po’o le Sone Vevela. O lea la o le a o tatou faitau nei i suiga fou ua va’aia e le ali’i tusi tala i totonu o Aferika, ae maise ai o le nofoaga na nonofo ai ma ona matua i tausaga ua tuana’i.

Ua alu nei le ta’avale o le Land Rover lea ua o ai nei le ali’i tusi tala o Richard Preston ma lana tama e fa’asinosinoina le ala e igoa i a Robin McDonald. O se auala e tele ‘omo’omo o lo’o i ai, o le ala lea ua salutulutu ai le ta’avale ina ua oso i luga o le ‘omo tele lava.

Fai mai le fa’amatalaga a le ali’i tusi tala, o le taimi atoa na alu ai le la ta’avale ma le ali’i o McDonald, ua le mafai ona tatali le tiga o ona taliga i tala o lo’o fai ane e le ali’i lenei. Ona o so’o se mea lava e tau atu i ai, e fa’amatala lava e le ali’i o McDonald le vaitaimi a’o i ai fo’i o ia i totonu o Aferika.

Fai mai, ua tele suiga ua va’aia nei, ae peita’i, ina ua o’o le la ta’avale i tua atu o le a’ai, na o la iloa ai, o lo’o i ai lava nisi mea o lo’o tumau pea. E i ai fa’atoaga saga, fai mai e alu alu se toga saga (corn farm), e lilo i le va’ai le mea e muta mai ai, e nimonimo lau va’ai i le isi itu. Ua tau atu nei i se nu’u e fau o latou fale i ma’a’ele, o nisi o fale e laiti lava, o le fausaga lava sa amata mai ai, o lea lava e tumau ai lava le nu’u lenei. O nisi ua tu’u galuega o lo’o fai, ae tilotilo ane i le alu atu a le ta’avale lea o lo’o la o ai ma le ali’i o McDonald. O nisi, ua talotalo ane i a i la’ua, o nisi e le kea ane i le mea lea o lo’o tupu.

Na tau atu nei le la ta’avale i le isi nu’u, ae fetaui tonu lava ma alu ane i luga o le ala tele o le solo a le lafu povi tele lava, o lo’o leoleo e tamaiti ua ta’ua lo latou ituaiga o Kikuyu. Ua tu nei le ta’avale, ae ua fa’apea ane McDonald ia te ia, “Se, ua matua’i sui lava le itu lenei o Aferika, o aso la pe a i le lusefulu tausaga talu ai, na vaomatua le ‘ele’ele atoa lenei, a’o lea, ua avea ma fa’atoaga saga, ua na o saga, saga mea ia e ola mai ai nei.”

O Robin McDonald, o se ali’i polofesa i ta’aloga o le tuli manu, pe a i le fia ma fia tagata fa’apea, o lo’o i le itu i Matu o Aferika. O le latou galuega, o i latou e fa’asinoala i tagata e fia o e tuli manu i le vaomatua o Aferika. O Robin, o le atali’i o se ali’i polofesa tuli manu e igoa ia ian McDonald. O le tama o Robin, na maliu ina ua pau se va’alele i luga o lau’ele’ele o Aferika i le tausaga 1967, ae fa’atoa sefulutolu tausaga o Robin. i lea taimi, ua matua’i siamu le ali’i o Robin i le galuega lenei e pei o lona tama, aua sa o la tulimanu fa’atasi ma lona tama a’o la’ititi.

O lea la ua o fa’atasi nei ma le ali’i tusi tala o Richard Preston, e fa’asinosino le ala ma mea e aga’i atu ai i le Mauga o Elekone, (Mount Elgon), i Aferika. E pei ona fa’ailoa atu i se taimi ua fano, o lenei tala, o se tala moni lava, o tagata, o nofoaga na tutupu ai, o fa’amatalaga a tagata e uiga i le fa’ama’i mata’utia lenei e moni ma fa’amaoni, e pei ona tusia e le ali’i tusi tala o Richard Preston.

Ua lagona le fiafia o le ali’i o Robin McDonald ona ua ia iloa lelei, o Richard Preston o se tagata tusitala, ma ua ia iloa lelei fo’i, o le a ta’u e Preston lona igoa ma ana fa’amatalaga i totonu o lana tusi lenei  “The Hot Zone”, po’o Le Sone Vevela.

E faia pea…

Fa’aliliu: Akenese Ilalio Zec