“Le Atua e, o matou lava o ni tagata fa’atauva’a ma le le atoatoa i Ou luma, ia e alofa ma fa’amagalo mai i matou. A fai lava, o lou finagalo ia o matou maua le ola e fa’avavau, fa’afetai Tama, ae o le vi’iga matou te fa’afo’i atu i Lau Afio e le aunoa, Amene.” Ia manuia le alo faiva o le atunu’u i feau ma galuega o le a feagai ai i lenei aso.

Ua fa’aauau pea le malaga a le ali’i tusi tala o Richard Preston ma le ali’i polofesa tulimanu o Robin McDonald e aga’i atu i le Mauga o Elekone, (Mount Elgon) ma ulufale ai i le Ana o Kitum, (Kitum Cave). Ua amata ona va’aia foliga louloua o le tau i lea taimi, ma ua amata ona to’ulu ifo timuga. Ua ki nei e Robin le moli o le ta’avale ina ua tau le iloa atu le alatele ona o le maligi o timuga. Na fesili nei i ai le ali’i tusi tala, pe sa manatua e ia ia vaila’au e tatau ona avane. Na tali le ali’i o Robin, o le kalone atoa lea na ia fa’atau mai e o ma la’ua i luga o le mauga.

Na toe fesili le tusi tala i a Robin, pe o le Clorox, na tali Robin ioe, o le Clorox, na fa’apea upu a le ali’i tusi tala, “Talosia, ia mafai ona ta pe ai le virusi o le Malburg.”

Ua alu pea le ta’avale a Preston ma McDonald e aga’i atu i nu’u i tua o Aferika lea o lo’o nofoia e le tele o ituaiga tagata ‘ese’ese ua i ai nei. So’o se mea e va’ai i ai le ali’i tusi tala ua tele lava le suiga ua i ai nei i totonu o Aferika, o ta’avale loli (trucks) o isi ta’avale sa le i ai muamua, o lea ua maua i totonu o nu’u nei.

Ua i ai fo’i le tele o fale’aiga, o fale fa’afiafia, o faleoloa tetele ua va’ai nei i ai le ali’i tusi tala o Richard Preston. E moni lava, e leai se mea e tumau pea, e i ai lava suiga, ona o lea ua o’o mai i tausaga fou, ua i ai fo’i ma ona suiga. E i ai le manatu o se tama’ita’i foma’i e fa’apea, o le ivasefulu pasene o le fa’ama’i o le AIDS, e mafua lea, ona o le fale o lo’o nonofo ai tama’ita’i, lea e ta’ua e tatou, o le fale pa’umutu, po’o fale tosolau, ia po’o fale fo’i e fiafia le itupa o tama e o i ai, o lea fo’i la ua va’ai i ai le ali’i tusi tala, o lea fo’i ua i ai i totonu o nu’u nei.

Fai mai fo’i le talitonuga o nisi o foma’i popoto, o tagata nei o lo’o nonofo i talane o le Mauga o Elekone, o i latou ia o le a a’afia tele i le HiV, ma o pepe fo’i e le i fananau mai, o le a a’afia o latou olaga i le fa’ama’i lava lea, pe afai o le a le faia se fa’aiuga a le Malo o Aferika i le mea e tatau ona fai.

O le HIV, AIDS, o se fa’ama’i e a’afia ai loa le tagata soifua, e le mafai ona toe togafitia, se i vagana ai la aso nei, ona o lea ua o’o mai le malamalama, ua maua ai fo’i ma le togifitiga e ao ona fai i ai. Ae fai mai, afai ae maua ai le tagata, e tele ma tele tausaga e a’afia ai, ona fa’atoa maliu ai lea. E i ai le manatu o le ali’i tusi tala o Richard Preston, sa tatau ona fa’aioga i le AIDS Kinshasa, ona o le ala lea na uia e le AIDS ma o’o atu ai i itu uma o le lalolagi, ina ua fa’atoa alia’e i le vaomatua o Aferika.

Fai mai le fa’amatalaga a le ali’i tusi tala o Richard Preston, a’o ia uia le ala lea o Kinshasa a’o la’ititi, o se auala e gaoa, e le i fa’ataina, ma e umi lava, e alu alu, tau atu i le vanu lafulemu e ioga o le Rift ona alu fa’asasa’o ai lea tau atu i le Vaituloto o Vitoria, (Lake Victoria), e tau leai ni ta’avale e feoa’i i la vaitaimi.

A’o le taimi lenei ua fa’ata atoa le auala lea, ua le toe i ai se gaoa, ma se ‘omo’omo e pei ona i ai muamua. O le fa’ataina ma le galuea’iga o le auala lea e fa’aigoa o le Kinshasa Highway, o se galuega fa’apitoa lea e pei ona tula’i mai nei i totonu o Aferika. O lona uiga, ua le toe fitu ni au tatalo ma ni au pese lotu e sefulu fa’atoa e taunu’u, e leai, ua alu fa’asasa’o lava le tama ua le toe malolo.

E faia pea…

Fa’aliliu: Akenese Ilalio Zec