Ua va’aia atata o ta’uleleia, ina ua fa’alogoina le tausagi o manulele o le taeao ua va’aia fo’i ave o le la, e fa’ailoa mai ai e le Atua Soifua, o lenei aso ua fo’ai mo i tatou, o se aso e fa’aopoopo i lou soifua fa’apea ma si o’u nei ola. E ao ai ona o tatou fa’apea ifo, “Lo matou Tama e, ia tumau atu pea i Lau Afio le fa’amanu, o le fa’ane’etaga ma le vi’iga e fa’avavau, Amene.”

O lo’o tatou i ai pea i le vaega lenei ua fa’amatala mai e le ali’i tusitala o Preston lana asiasiga na alu i Aferika. O lea fo’i la ua o tatou iloa ai, le tele o nisi mea e tutupu pe afai e i ai ni ana fa’apea i totonu o si o tatou atunu’u. O le naunau o lenei tusitala ina ia ta’u ma fa’ailoa i le lalolagi le mafua’aga e mafua mai ai virusi ‘ese’ese lea ua a’afia ma maliliu ai tagata.

Ae talosia, ia ‘aua ne i o’o mai i Samoa nei fa’ama’i mata’utia fa’apea. Ae se i o tatou tulituliloaina pea, po’o fea o le a o’o i ai su’esu’ega ma sa’ili’iliga a le ali’i tusitala o Richard Preston e pei ona ia tusia i lana tusi lenei “The Hot Zone”. Ae ua ou taumafai e fa’aliliu i la tatou gagana, ina ia o tatou malamalama ai i le mata’utia ma le ogaoga o fa’ama’i e mafai ona maua ai i tatou, ae ia o tatou sauniuni i fa’ama’i e ono tutupu mai.

Ua fa’amatala nei e Richard Preston lana malaga lea na alu i Aferika ma asiasi atu i le ana o Kitum i luga o le Mauga o Elekone. Fai mai ina ua alu pea lana savaliga i totonu o le ana, na ia iloa ai le vevela o totonu. Ma na ia manatua vave ai i lea taimi le fa’amatalaga a le tama’ita’i foma’i o Nancy Jaxx. O le viursi e fiafia e nofonofo i nofoaga vevela ma matutu.

Ae e tele la lona ‘ese’esega ma le ana lea ua i ai nei, ona o le ana lenei e nofoia e so’o se meaola o lona uiga, o feau ma pua’iga a meaola, o lo’o si’omia ai le ea vevela o lo’o ta’ai i totonu o le ana o Kitum.

Atonu o le mafua’aga lea na a’afia ai Tiali Moneti ma le tama’iti lea na alu i totonu o le ana i ni nai tausaga ua mavae. Afai sa e tuliloaina pea la tatou tala moni lenei, ona e manatu ai lea, o Tiali Moneti, (Charlie Monet) na mafua ona a’afia, ina ua alu i totonu o le ana lenei o Kitum. Atonu, sa ia pa’i i se mea e le tatau ona pa’i i ai, atonu fo’i, sa lavea lona lima pe tuia fo’i i se mea ma’ai i totonu o le ana. Afai e le o lea, ona iloa ai lea, atonu ua mafua ona a’afia ona o le ea vevela o lo’o si’omia ai totonu o le ana o Kitum.

O le virusi o le Malburg, o ona vaega e fai lava si fefeu ma le malolosi. E i ai le manatu o se tagata e mafai ona ola pea mo se taimi umi i totonu o le ana pogisa ma le vevela o Kitum. O le virusi o le Malburg, e mafai ona nofonofo e le suia pe tusa i le lima aso i totonu o le vai. O le fa’ailoga lea na iloa i su’esu’ega a le ali’i o Tom Geisbert. O le isi su’esu’ega a le ali’i o Tom Geisbert na ia tu’u ai se vaega o le virusi o le Malburg i totonu o nifo tetele o manuki, ona tu’u lea i luga o le fata, ma fa’ata’atitia ai mo aso e lima. ina ua ma’ea lea, na ia tu’u loa le vai lea sa i ai le virusi o le Malburg i totonu o nifo tetele o manuki, ma na ia iloa ai, ua matua’i suia lava, ua pa pa ma ua a’afia i le Malburg.

O le tele o isi virusi, e le umi ona a’afia pe nofo i totonu o se tagata po’o se manu. O le virusi o le AiDS, e ola pea mo ni nai minute, pe afai e aliali i luga o le ea. E leai ma se tasi na taumafai e va’ai pe o le a le umi e ola ai le virusi o le Malburg ma le Ebola i totonu o se ea vevela.

E i ai le avanoa e mafai ai ona olaola pea le virusi pe afai ua pipi’i i se nofoaga matutu, pe afai fo’i e o’o atu i ai ave vevela o le la. Ua toe alu le savaliga a le ali’i tusitala o Preston i luga o se maupu’epu’e o lo’o i totonu o le ana. Fai mai, na a’apa atu nei lona lima ma tago i le tumutumu o le ana. Na ia iloa ai, o lo’o pipi’i fa’atasi e ala i a’a o la’au o lo’o ola i totonu o le ana. O le isi mea sa ia iloaina, o ma’a o lo’o i totonu o le ana, ua foliga mai o ni ma’a ua liu lefulefu, ai ona o taimi e pa ai le mauga mu o Elekone, o le mafua’aga lea. Ona o le mauga lenei o Elekone, ana fa’apea e le fai ma mu so’o, fa’apenei ua avea ma mauga e pito i sili ona maualuga i le lalolagi atoa.

O le mea la lea ua tupu, e pei ona fa’amatala e le ali’i tusitala, e pa’i atu lona lima, ae pei e to’ulu mai i lalo ma’ama’a ua foliga mai o ni malala. Ua fa’aauau pea le maimoaga a le ali’i tusi tala i totonu o le ana o Kitum, ua le iloa e le ali’i tusi tala ona fa’amatala mea uma o lo’o i totonu o le ana lenei o Kitum. Ae tasi lava lana fa’aiuga, atonu o le ana o Kitum na mafua atu ai virusi e pei ona a’afia ai tagata fa’apea ma meaola.

E faia pea…

Fa’aliliu: Akenese lIalio Zec