Fa’atalofa atu i lou maleifua mai i fanuga lelei o lenei aso fou, tatou fa’apea ifo ai, “Le Atua e, ia E au ai ma i matou i lenei aso, ina ia i’u manuia a matou fuafuaga ma fa’amoemoega, a  ma’ea, ona o matou fa’apea lea, le Ali’i e, ia tumau atu pea Lou vi’iga e fa’avavau, fa’avavau lava, Amene.” ia manuia le alo faiva o le atunu’u i lenei aso.

O lo’o i ai pea le tusitala o Richard Preston ma lana au malaga i luga o le Mauga o Elekone, (Mount Elgon) i Aferika. O lea fo’i ua ma’ea le sa’ili’iliga a le ali’i tusitala i totonu o le Ana o Kitum. O le taimi lea, ua matua’i maligi lava timuga, ae sa taumafai pea ina ia fa’ato’ato’a lelei le latou sa’ili’iliga. Fai mai, ua inu nei le latou uisiki ma fa’alogologo i le maligi ifo o timuga i lea taimi.

Ua fai le latou ta’aloga o le poka, lea e fa’aaoga ai le pe le, ae sa le i auai le ali’i polofesa i tuligamanu o Robin McDonald, ae na i ai le manatu o le ali’i tusitala, atonu e le iloa e Robin ta’alo poka. Na liliu ane nei le ali’i o Grant, le uo a Preston lea na o latou o atu mai Amerika ma fa’apea ane i a Robin, “Robin, inu sau uisiki, e fa’afiafia ai oe i lenei afiafi.”

Ua le tautala le ali’i tulimanu, ae ua tilotilo ane i a Grant, na i’u lava ina fa’apea ane, “Ou te le fia inu i le uisiki, e le mana’o ai lo’u manava, na o le pia e lelei ai lo’u manava, e maua ai polotini lelei ma maua ai le moe filemu.”

Fai mai, e le i umi lava, ae toe suia le tau, ua amata ona toe malamalama, ma ua tau te’a atu timuga. Ua toe fo’i lava le Mauga o Elekone i le filemu ma le le fa’age’etia, atonu, o se fa’aaliga ua ta’u ane nei e le si’osi’omaga i le au malaga lenei. E le i tele lava i se pito, na ona va’ai tasi lava i le malamalama, te’i lava ua oso fa’afuase’i mai timuga mamafa.

Na fesili ane nei le ali’i o Robin i a Preston, “O fa’apefea mai oe ali’i pule sinia e o le ana o Kitum? Ua amata ona e fa’alogoina se suiga i lou tino, aua ou te iloa e amata ona e fa’alogoina pe afai o le a e talatalanoa na o oe i totonu o le faleta’ele.”

Ua ‘ata le tusitala ma tilotilo ane i a Robin McDonald, ua masani i uiga ia o le ali’i, e ui lava ina fa’aali lona fia malosi ma lona fia toa i le tele o taimi, ae o se tagata e naunau e galue, o se tagata e fia su’esu’e ma fia maua le ‘au o le paipa i mea uma. Atonu o le mafua’aga lea e fesilisili so’o ai i mea uma, afai la e le o le faitatala o lona uiga, o le fia iloa ma ua o fa’atasi ma le fia tama mamafa i le tele o taimi.

Ina ua toe manatua e Richard Preston le tala lea a le ali’i tulimau o Robin McDonald, na ia iloa ai, e moni, ua amata ona ia fa’alogoina suiga ia, aua o lea na tau lona ulu i le pito papa, a’o i ai i totonu o le Ana o Kitum. Atonu, fo’i e fula, ona avea lea ma ala o le a afaina ai ia, peita’i, na ia tali atu ma lona loto tele, e leai, o lo’o lelei lava mea uma i lana fa’alogo.

Ua fa’asolosolo pea le faiga o le ta’aloga poka a le ali’i tusitala ma lana vaega, a’o le taimi lea, ua matua’i lalago timuga ua le toe taofiofia. Ua soso’o lava le pa pa o faititili ma le ‘emo o le uila, ae ua tau le lagona i lea taimi ona ua amata ona sosolo a’e faiga a le uisiki ma ua fa’amafanafana mo i latou i lea taimi. O le faiga lea na fai e le ali’i foma’i o Gene Johnson, fai mai, na o lava ma ave a latou uisiki, fai mai e fai ma tua i ai i taimi o le tigaina ma taimi ua fa’alogo atu ai ua tau sau le fefe ma le popole.

E i ai taimi a’o galue le ali’i foma’i o Gene Johhnson i Aferika i le tau sa’ilia o le virusi, e fiu lana vaega e tau su’e, ae o lo’o nofonofo lelei lava le ali’i foma’i i lalo o se la’au, ma inuinu ai lana ipu uisiki. Fai mai le fa’amatalaga, e aoga, e fa’atupu manatu, e fa’atupu mafaufauga, e fa’atupu vevesi fo’i i nisi tagata, ona e fai mai, e ‘ese’ese tagata pe a inu i le uisiki.

O nisi e avea ma vai fo fo, i taimi o tiga ma faigata, o nisi ua avea ma ala ua tautalatala ai ma ua ‘ese fa’aupuga ua mapuna a’e i le gutu, o nisi e inu, ina ia fa’alogologo ai tagata i le manaia o lona si’ufofoga pe a pese, e fa’agalogalo ai fo’i tiga o le olaga nei. ia o mea lelei lava mea uma, ae afai loa e fa’aaoga e te lafoa ai ni upu fa’atiga ma upu masoa i se tasi, ona le manuia loa lea. E pau le mea e maua, o le lua i le fa, po’o le velo i le ‘ala, ona uma filemu ai lava lea.

E faia pea…

Fa’aliliu: Akenese Ilalio Zec