Ads by Google Ads by Google

Fagogo: O Le Sone Vevela — Vaega 165

Fa’atalofa atu i le alafa’i mai o le atunu’u i le manuia i lenei taeao fou, e i ai pea le fa’amoemoe o lo’o aoina le masina i lou soifua laulelei i lenei aso. E ao ai ona o tatou fa’apea ifo, “Le Atua e, o ai ea o le a matou o i ai, o lo’o ia te Oe upu o le ola e fa’avavau, fa’afetai i lou alofa, fa’amalo i lau pule fa’asoa mo i matou i aso uma o lo matou ola, ia fo’i atu lava i a te Oe le vi’iga e fa’avavau, fa’avavau lava, Amene.”

 

Ua ma’ea le su’esu’ega a le ali’i tusitala o Richard Preston i totonu o le Ana o Kitum i Aferika, ma o le mea e sili ona ta’ua i lenei ali’i tusitala, ua ia va’ai ma molimau i mea uma o lo’o i totonu o le ana lenei. O le talitonuga o nisi o foma’i popoto e i ai foma’i o le Vaega a le Ami i Fort Detrick, e fa’apea, o totonu o le Ana o Kitum, na mafua mai ai le virusi o le Malburg ma le virusi o le Ebola. O le ala fo’i lea na toe alu ai lava le malaga a le ali’i tusitala, ona o lona fia su’esu’e pe o le a le mafua’aga o nei virusi mata’utia, lea na a’afia ai tagata ma maliliu ai.

 

E le gata i lea, ae ua matua’i fa’aleagaina ai manu, ae maise lava o manuki ia na avane mai Filipaina i Amerika, e ala i se kamupani e ioga o le Hazelton Washington i totonu o Reston i Virginia. O lea la ua ma’ea le asiasiga a le ali’i tusitala o Preston, ma o le fa’aiuga, e tau matemate lava i ona itu uma, ona o le tele o mea sa ia va’aia i totonu o le Ana o Kitum. O meaola uma, o le nofoaga lea o lo’o fai ma o latou ofaga, o le tele fo’i o isi manu ua mamate lava i totonu o le ana lenei.

 

Ae o se fa’amatalaga lenei a le ali’i tusitala e uiga i mea o lo’o tutupu i totonu o le ana o Kitum, ae maise ai o lona fo’i manatu i le mafua’aga o virusi ‘ese’ese, e i ai le AIDS, Malburg, Ebola ma le tele o isi virusi o lo’o a’afia ai le ola o le tagata soifua.

 

O le AIDS, Ebola ma le tele o isi virusi ma fa’ama’i e tutupu i totonu o le vaomatua, e mafua lea ona o le fa’aleagaina ma le fa’atama’ia o le si’osi’omaga fa’alenatura o le lalolagi. O virusi nei e mafai ona alia’e ma a’afia ai le tagata ma manu ona o le fa’aleagaina o nisi vaega o le vaomatua ma le si’osi’omaga o le lalolagi. O le tele la e sau mai le vaomatua, o nisi vaega o le vaomatua ua fa’atoa ma fa’aaiga e tagata i se taimi vave.

 

O le si’osi’omaga fa’alenatura o le vaomatua lava ia, o le ogatotonu galemu lea o le ola o le paneta o lo’o tatou i ai nei, ona o lo’o ola ai so’o se meaola ma so’o se la’au. O totonu fo’i la o le vaomatua lenei, o lo’o olaola ai le tele o virusi ‘ese’ese, ona o tagata ma meaola uma o le lalolagi, latou te feavea’ia virusi. Afai la o le a sao mai i fafo virusi mai le si’osi’omaga o le vaomatua, e pei o le agi a le matagi lona sosolo ma a’afia ai le tagata ola.

 

O nisi nei o igoa o virusi ua sao mai i fafo mai le si’osi’omaga o le vaomatua ma a’afia ai le tagata ola, e pei ona tusia e le ali’i tusitala o Richard Preston, e ala i ana su’esu’ega. Lassa, Rift Valley. Oropouche. Rocio. Q. Guanarito. Virusi o le VEE, Monkeypox. O le Dengue. Chikungunya. O le virusi o le Hanta e i ai le Mokola ma le Duvenhage. Le Dantec. O le virusi e a’afia ai le fai’ai, e i ai le Kyasanur, ae maise ai o le HiV-O le virusi lea ua aliali mai i le lalolagi, ona ua a’afia ai le tagata soifua, ma ua fa’ateleina lava e o’o mai i le aso.

 

O isi virusi e mafua mai i le vaomatua o Semliki, o Crimean-Congo. Sindbis. O’nyongnyoung. Sao Paulo. Malburg. Ebola Sudan. Ebola Zaire fa’apea ma le Ebola Reston. O virusi uma nei, ua mafai ona sao mai le si’osi’omaga o le vaomatua ma a’afia ai le ola o le tagata. Ae tatou talosia, ia ‘aua ne i o’o mai i si o tatou atunu’u nei fa’ama’i faigata.

 

Fai mai le manatu o le ali’i tusitala o Richard Preston, atonu o lo’o taumafai pea le si’osi’omaga fa’alenatura o le tagata soifua, ia tete’e atu i nei virusi e ala lea i le fa’atula’i mai e ali’i ma tama’ita’i foma’i atamamai o togifitiga, e i ai tui puipuia, o tui fa’agata, o a’oa’oga e puipui ai mai fa’ama’i ‘ese’ese. Ae peita’i, e malosi lava le sau a virusi latou, ona o le si’osi’omaga o lo’o ola ai, e le mafai ona fa’amutaina.

 

O le fa’asinomaga o manu ma la’au o lo’o ola fa’atasi ma le tagata, o se tasi lea o lu’i i le tagata soifua, ona afai ae fa’aleagaina lea si’osi’omaga, o lona uiga, o le a mafai ona sao mai ai so’o se ituaiga virusi ma maliliu ai tagata. O le tele fo’i o meaola o lo’o ofaga i le vaomatua, ua fai lea ma o latou apitaga, ma afai ae fa’aleagaina e le tagata soifua, ona tali mai fo’i lea o le si’osi’omaga o manu ma la’au i le tagata, e ala i le sao mai i fafo o fa’ama’i ma virusi ma a’afia ai le si’osi’omaga o le tagata soifua, e ala i fa’ama’i ‘ese’ese, e pei ona o tatou molimauina nei i le lalolagi atoa.

 

E faia pea…

 

Fa’aliliu: Akenese Ilalio Zec