Vaega: 41

Taeao manuia, i lou alafa’i mai i fanuga lelei i lenei taeao fou i le alofa ma le agalelei o lo tatou Tama i le lagi. E ao ai ona o tatou fa’apea ifo, “Le Ali’i e, e Silisili lava Oe i mea uma matou te manatu i ai, e leoleoina ai i matou mai le fili ma ona faigata, ia tumau atu pea i Lau Afio le vi’iga e fa’avavau, fa’avavau lava, Amene.”

Ae, alo maia, o le a toe fa’aauau atu la tatou tala mo lenei aso. Na muta la tatou tala, ina ua ulufale i totonu o le potu le ali’i foma’i o Eugene Johnson ona o lona fia mautinoa, po’o le a le tulaga ua o’o i ai Nancy Jaxx. O le fa’aiuga o le ripoti na tusia e le ali’i foma’i o Johnson e uiga i a Nancy Jaax, o lo’o fa’apea mai, “E le i a’afia Nancy Jaax i le virusi o le Ebola. O le totigilima mulimuli lava e le i pu pe matala fo’i, ma o le virusi e mafai ona a’afia ai le toto o le tagata, peita’i, o Nancy Jaax e le i a’afia i se toto o le manuki lea sa i ai le virusi o le Ebola.”

Na alu nei Nancy i lona fale, ma lona loto fa’afetai, aua ua ia iloa se manu lava a fa’aletonu o ia i le fa’ama’i. Ua manatua e Nancy lana fanau laiti o Jason ma Jamie. Ua fa’anatinati le alu a le ta’avale i lona fia va’ai i lana fanau ae maise ai o le fia vala’au i lona to’alua o Jerry e fa’ailoa i ai le mea na tupu ia te ia.

Na taunu’u nei le ta’avale a Nancy i le fale ma e le i mau lelei le faitoto’a ae ua la’a i fafo ma tau valavala’au igoa o lana fanau. Ua matala le faitoto’a ma ulufale Nancy ma a’apa atu loa ua fusi mai lana fanau. Na iloa ane nei e lana tama o Jason, ma fesili loa pe ai sea ua tagi ai. Na tali Nancy, “E leai, na o lo’u fia pa’i atu ma fusi mau mai oulua i o’u lima, pau lea.”

Ua alu le vala’au a Nancy i lona to’alua o Jerry ma fa’amatala i ai le mea na tupu, e le i uma atu tala a Nancy ae tau lelea le taliga i le ‘ava’avau mai a lona to’alua i luga o le telefoni.

“Nancy, na ou fai atu lava i a te oe, e ‘aua ne i e galue i le galuega le na, ae e le mafai lava oe, ua a la, ana tupu mai nei se fa’alavelave i a te oe, o le a le mea la’a fai.” Fai mai, na atoa le tolu minute o sau lava le faitau pi a le ali’i o Jerry i lona to’alua. Ae o le taimi lea, o lo’o to’a lava le loto o Nancy, e le gaoia, ua tu’u lava le avanoa se i fa’auma mai le le malie o lona to’alua i a te ia.

E ui lava i le agi a le tuaoloa lea na agi mai i le isi itu o le telefoni, ae na fa’ato’ato’a lelei e Nancy, aua ua ia iloa, e sa’o lava si ona to’alua, aua e leai lava se tagata e sa’o lele i ni ona manatu. Na lagona e Jerry e ala i lona fa’alogo mai i lona to’alua, e to’a lava le loto o Nancy, ae se manu e toe fo’i ane lava, pe ana fa’apea e fa’alogo mai, ua i ai se mea ua tupu i lona to’alua ma le la fanau.

(Amuia Nancy ia, e alofa moni si ona to’alua i a te ia, a’e ana fa’apea o se tamaloa Samoa, e tagi atu i ai si fafine se ma nu e uma lona ola, ae fa’alogo atu o fa’apea mai, “Se alu i ai, o’o i ai, se i vave ai ona e uma atu oe ia ma lou fa’asoesa i lo’u olaga taumafai, ae se i fa’asau le vaega oa latou e fai ai lo’u ivi.”

E sa’o ai la le tala a le isi lo’omatua o le matou nu’u, fai mai na ona uma lava o ia, o fea lava e alu i ai si ali’i, e tilotilo mai lava, o savalivali atu ma ia, “Sau, sau ta o, ua lava lou ‘aiafu i a’u tupe, e ese le manaia o le lagi, ua na o Agelu lava o lo’o felelei ai, e le toe i ai se tagi, ae sau ta o se i lou oe e Satani i le afi.”)

E faia pea…

Fa’aliliu: Akenese Ilalio Zec