Ua fa’alogoina le tausagi o manulele i lenei taeao fou, e fa’ailoa mai ai le mamana o galuega ma foafoaga a le Atua Silisili ‘Ese’ese, e ao ai ona o tatou fa’apea ifo, “Le Atua e, e fo’i atu lava i Lau Afio le vi’iga, o le fa’ane’etaga ma le fa’amanu e le aunoa, Amene.”

Ua ma’ea le galuega sa feagai ma le vaega a le ali’i foma’i o Jerry Jaxx, ua mamate uma manuki sa i totonu o le nofoaga a le kamupani i totonu o Reston i Virginia. A’o lea fo’i o le a toe alu atu le isi vaega, e fa’amama atoa totonu o le fale lenei, ina ia ‘aua lava ne i ai se virusi e toe i ai i totonu.

E ui fo’i ina ua feagai le tina ia Nancy Jaxx ma tiga, ona o le vala’au a le Atua i lona tama, ae sa lagona lava lona loto tele, ona o le fa’amafanafanaga ua fa’ao’o ane e le vaega atoa a le Ami o lo’o i totonu o le nofoaga o Fort Detrick. (o upu o le tusi, “Amuia e fa’anoanoa, aua e fa’amafanafanaina i latou.”)

Ua ma’ea le galuega sa fa’afeagai ma le vaega a le 91-Tangos, lea na ta’ita’ia e le ali’i foma’i o Eugene Johnson ma le ali’i foma’i o Jerry Jaxx, ua amata ona auaua’i ta’ito’a lua mai i fafo mai le fale sa fa’atino ai le galuega lenei. E le i manana’o e tala noa ma ta’uta’u le galuega i se tasi, e o’o fo’i i nisi o Fitafita sa leoleoina le fale atoa, e leai se tasi na gagana i ai.

Ina ua fa’ae’e ta’avale a Fitafita o le a toe fo’i i Fort Detrick, na o latou iloa atu ai le ali’i foma’i o Eugene Johnson, o nofonofo mai i lalo o se la’au i luma tonu lava o le fale. Ua le fia talanoa i se tasi, ae ua fefefe fo’i Fitafita e talanoa i ai. Ua ‘ese le va’aiga a Fitafita i le ali’i foma’i i lea taimi, e foliga mai ua miliona ma miliona maila lea ua o’o i ai mafaufauga o Gene Johnson i lea taimi. Fai mai mafaufauga o le ali’i foma’i, pe na i ai se tasi na tuia lona lima i se tui, pe na i ai se tasi na pa’i lona lima i le toto o se manuki, ua afe ma afe fesili ua tutupu a’e nei i le mafaufau o le ali’i foma’i.

A’o lea ua ma’ea le galuega, o lo’o sologa lelei lava mea uma, e moni lava sa i ai nai fa’aletonu ae sa mafai lava ona toe fo’ia e Fitafita, ae maise o le galue malosi o le ali’i o Jerry Jaxx. O le manuki fo’i lea sa sola mai totonu o le pa, ua toe maua, ma o le manuki lava lea na mulimuli ave ‘ese mai i totonu o le fale.

Ua tapena nei le isi vaega a le Ami, e o i totonu o le fale e fa’amama atoa, ma ia ‘aua lava ne i totoe se mea e tasi i totonu o le fale lenei. Ua va’aia le pogisa i lea taimi, peita’i, e le i mana’o lava le ali’i foma’i o Gene Johnson e toe tu’u atu mo se isi aso le galuega lea, ona o lona fefe tele i le virusi o le Ebola, o le ala lea na fa’amalosi atu ai i Fitafita, ina ia fa’amama loa le fale atoa, ‘aua ne i toe fa’atali.

O le vaega la lea a le au fa’amama, o le a ta’ita’ia e le ali’i o Merhl Gibson, ua fai nei lona suti puipuia ma alu loa i totonu o le fale, ona o lona fia va’ai pe o le a le ituaiga fa’amama e ao ona fai i le fale atoa. Na iloa atu nei e Gibson, o lo’o paepae solo mai fasi masi ma gutigamasi i luga o le foloa o le fale, o mea uma sa fai ai le galuega a le ali’i foma’i o Jerry Jaxx ma lana vaega, o lea o lo’o ta’titia mai i totonu o potu.

O le isi aso na soso’o ai, na alu ai le fa’atauga a le vaega lenei i le faleoloa e fa’atau mai ai vaila’au e fa’aaoga mo le tapenaina o le fale. Na fa’ailoa ane e Gibson i a Gene Johnson e fa’apea, ua matua’i faigata lava ona fa’amama le fale, ona e foliga mai na pa ai se pomu atomika i totonu.

E faia pea…

Fa’aliliu: Akenese llalio Zec