Na taua e le Sui Taitaifono o le Komiti o le Pone a le malo ia Utu Abe Malae, e mafua ona tuai ona taulia pone a le malo o lo o taumafai le latou komiti e fa’atau atu i maketi i fafo, ona o manatu le lelei o lo o fa’aalia e le to’atele o le atunu’u i luga o auala o fesootaiga fa’aonaponei.

Saunoa atili Utu e fa’apea, soo se taimi lava e tu’u ai e se isi o le atunu’u ni ona lagona poo manatu i luga o auala o fesootaiga fa’aonaponei, o le taimi fo’i lea e mafai ai ona faitau i ai le to’atele o tagata ma latou malamalama ai i mataupu o lo o tutupu i Amerika Samoa.

I le galulue ai o le Komiti o le Pone e fa’atau atu pone a le malo i tagata ma pisinisi o lo o galulue i le fa’atauina o pone i maketi i fafo, na taua ai e Utu e fa’apea, e tolu vaega o Pone sa fa’atulaga e le Komiti Fa’afoe e fa’atau atu i maketi i fafo, o le lua o ia Pone ua mae’a ona fa’atau ma ua talia, toe tasi lava le Pone lea o lo o fa’ata’ita’i pea i le taimi e taulia ai.

O ni isi o galuega o lo o fuafua e fa’atupe mai i le Pone lona tolu lea e lei taulia e pei ona saunoa Utu, e aofia ai le fa’avaeina o le Faletupe a le Charter Bank lea ua mae’a ona pasia e le Fono Faitulafono.

Saunoa atili Utu e fa’apea, e ese mai i le Faletupe o lo o manaomia se tupe e fa’atupe ai, o lo o i ai fo’i i si mataupu fa’asaga i le Falema’i ua mae’a ona poloaina e le fa’aasinoga e totogi tupe i aiga sa tagi, peita’i e o o mai lava i le taimi nei e lei totogiina ia alagatupe.

Na taua e Utu e faapea, e mafua ona tuai le taulia o tatou Pone, ona o le le lelei o manatu fa’aalia o tagata o lo o fa’asalalau ma fa’alauiloa i luga o auala o fesootaiga faaonaponei, ae o le isi lea vaega e tatau ona fautuaina ai le atunu’u ina ia silasila toto’a i ai, o le taimi e fa’aalia ai o latou lagona ma aia tatau.

Na taua e le afioga i le alii kovana ia Lolo Matalasi Moliga, ua tatau ona fai se suiga i auala o lo o mafaufau ai le atunu’u i gaioiga ma galuega a le malo, aua afai e fa’aauau pea ona faia e le atunuu nei tulaga, e le taitai lava ona manuia taumafaiga a le malo.

“Ua mana’omia le tatau lea ona galulue fa’atasi o le malo ma le atunu’u, ina ia latou silafia ma malamalama i gaioiga uma o lo o taumafai le malo e fai mo le manuia o le atunu’u,” o le saunoaga lea a Lolo.

Sa ia taua fo’i le leai o se agaga o le malo e fa’alilolilo gaioiga mo le Pone, ae o lo o naunau pea e fa’amalamalama tulaga uma i le atunu’u.

E oo lava i le Fono Faitulafono o lo o latou fesiligia fo’i tulaga o pone a le malo.

Na taua e le afioga i le ali’i senatoa ia Tuaolo M. Fruean i le taeao ananafi, le tatau lea ona aami e le maota maualuga le komiti faafoe o le Pone e oo atu i luma o le maota, sei faamalamalama tulaga o pone a le malo.

Saunoa Tuaolo e fa’apea, o le tulafono lea ua pasia e le fono e tuu atu ai le malosi i le komiti o le Pone latou te faatauina atu tupe o pone i fafo, o lo o atagia mai ai ni isi o vaega taua, e pei o le alu uma lea o tupe e maua mai i lafoga e toe totogi ai le pone, ae le o le 25% e pei ona manatu i ai ni isi o afioga i senatoa.

Ae na saunoa Soliai T. Fuimaono, e tatau ona toe aami le komiti o le Pone se’i fesiligia pea e le maota i mataupu e faatatau i tupe o le pone, ina ia malamalama lelei le fono i gaioiga a le komiti o lo o faia.

O le aso Tofi o le vaiaso fou lea ua faatulaga ai le iloiloga a le senate ma le komiti o le pone a le malo.