Ina ia so’oula aso ua tuana’i o le tautua a le Maligi Koa ma ona fitafita talavou o lenei vaitau o le soifuaga, na matua fa’agae’etia ai le agaga o le ali’i 2nd Lt Ernest Einstein T. Haleck i lona tofiga fa’apitoa mo le polokalama fa’ataoto e fa’asolo a’i le fa’ailogaina o le Aso Fa’apitoa mo Vetereni uma o le Militeri a le Iunaite Setete o Amerika.

“O se tofiga na fa’ate’ia ai lou fitafita talavou ma le fa’atauva’a, ae ina ua vala’aulia mo se tiute, e faia le tu ma le aga a le Fitafita Maligi Koa, tula’i ma le ava, tula’i ma le loto toa e fa’atino ou tiute i taimi uma! Ave i ai lau atoaga e o’o lava i lou leo ma lau tautala!” O se fa’amatalaga lea a le ali’i lutena.

I le taimi nei, ua taliu mai i fanua le sailigamalo a lea alo, e pei ona mua’i fa’ae’e i ai manuia ma talotaloga a lona aiga, o lana a’oga, uo ma lona malo, a’o tu’uva’a ese atu ina ia saili le atamai i kosi sa ia mataituina e fia agava’a ai, ae maise le avea ma se ali’i Lutena o le Maligi Koa.

Peita’i sa ave lua ma ana taumafaiga mo se ofisa sinia i le Maligi Koa, ma ua ia maua ai le 2nd Lutena mai le Iunivesite o Kalefonia i Berkeley, sa tau’avea ai ana a’oa’oga fa’apitoa a le maligi, aua e leai se kosi a le Maligi Koa i le silapasi a le Stanford University.

O lenei a’oga na fa’aalu ai e Haleck le sikolasipi e $150,000. na ofoina mai e le US Marine Corps, peita’i e le totogia ai lona nofoa’oga i totonu o Stanford. Ona fa’aaoga lea e ia o isi ana sikolasipi sa manumalo ai i le taimi na fa’ai’u ai ana a’oaoga i Kanana Fou High School, mo lena fa’amoemoe.

O lenei fo’i le ulua’i atali’i na a’otauina mai Kanana Fou, ma latou tatalaina le ulua’i vasega e tau’avea kosi a le JROTC e a’otau ai mo a’oa’oga fa’amiliteri, i le vaitaimi na avea ai Rev. Iasepi Ulu ma pule a’oga o Kanana Fou.

Ua mae’a fa’amauina fo’i, o se ulua’i alo lea o le tatou malo, ua ia maua le sikolasipi $150,000. mai le US Marine Corps, ona o lana taumafaiga i le kosi o le OCS, lea na ia ausia ai togi maualuluga lava.

 “E tasi lava se fautuaga taua, o le fa’ailoa lea i fanau uma a Amerika Samoa, taumafai i le mea sili e te mafaia i so’o se mea e te fiafia e fai, ae afai o tau saili se mea e te fiafia e fai, fesiligia se mea e te aoga ai mo lou aiga, ma nai ou tagata! Fa’aaoga tatau avanoa ua ofoina mai mo i tatou, a’o tatou talavou ma maua le malosi o le tino ma le mafaufau!”

Na fesiligia fo’i Haleck i le mafuaga ua le fa’aauau ai lana a’oga i lenei vaitaimi, ae sa ia fa’ailoa mai, “Ona o lo’o i ai le US Marine Corps i tulaga fa’aitiitia o latou paketi mo le a’otauina o latou Lutena, ua taofia ai mo sina taimi le ulufale atu mo le fa’aauauga o matou kosi mo’omia mo le avea ma “1st Lt,” se’ia toe amatalia ia Iuni 2014 i Quantico, Virginia.”

Peita’i, ua fiafia o ia e mafuta ma lona aiga, nu’u ma le ekalesia, ma fesoasoani fo’i e tausoa le galuega mo le fa’auluina atu o nisi Maligi Koa fou mai tatou aoga maualuluga i’inei. Le o lo’o fesoasoani ai o ia i le tama’ita’i o lo’o tofia mai mo lea faiva, Sgt Kuuipo Trepanier.

O 2nd Lt. Ernest Einstein T. Haleck o se atali’i e tupuga mai ia Mulipola Ernest Haleck ma le tofa Toapulu Fiasili Puni Haleck o Pago Pago ma le aiga Sa Galea’i i Leone ma Manu’a.

E fa’amanuia atu le Samoa News i au taumafaiga i le lumana’i!