O le ali’i talavou lea na mana’o le Faifeau o lana Ekalesia e avea o ia ma Faifeau i le lumana’i, ua fa’asala e le fa’amasinoga maualuga e taofia i le falepuipui i Tafuna mo le 7 tausaga, ona o le fa’alavelave lea na la faiaiga ai ma se teineititi o le aulotu e 16 tausaga le matua.

Na fa’atoese le ali’i o Feliua’i Liu i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia sei fo’i atu ai i tua e tausi lona aiga. Sa ia fa’atoese i lona aiga i le mataga o le gaioiga sa ia faia, lea ua ta’uvalea ai le igoa ta’uleleia o si ona aiga aemaise ona matua.

Sa ia fa’atoese fo’i i le aiga o le tamaitai na a’afia ma ona matua, ina ia fa’amagalo lana solitulafono sa faia.

Na taua e le ali’i faifeau na molimau mo se itu lelei o Liu, o lenei ali’i talavou, sa vaai maualuga ai lava e avea ma Faifeau i le lumana’i, ona o le tele o taleni o lo o ia te ia, e pei o le mafai lea ona ia a’o faaevagelia fa’aleagaga atoa ai ma le mafai lea ona ia lauga le Tusi Paia.

Na taua e le faifeau i luma o le fa’amasinoga e fa’apea, o Liu, o se talavou na te talitonuina i le galuega fa’aleautalavou, o ia fo’i o se talavou e sogasoga ma naunau e fai mea lelei mo le mafutaga a Autalavou a le Ekalesia.

Na finau le loia a le ua molia i le fa’amasinoga mo se fa’asalaga mama mo ia, ina ia mafai ai ona maua le avanoa e toe fuata’i ai mea sese ua aafia ai lona olaga, lea fo’i na lagolagoina e le loia a le malo, peita’i na saunoa le alii faamasino sili ia Michael Kruse e fa’apea, ui i faafinauga a itu e lua e tusa ai o se fa’asalaga mama mo Liu, e le manatu le faamasinoga e faatuatuana’i le isi tulaga taua, o le laititi lea o tausaga o le tamaitai na a’afia i lenei mataupu.

Saunoa Kruse e fa’apea, afai e manaomia e le ua molia sana talosaga mo se avanoa e tatala ai o ia i tua e faigaluega, e mafai ona ia talosaga i le Komiti o le Palola mo se avanoa.

Ua poloaina fo’i Liu e le fa’amasinoga e lesitala lona igoa i le lisi o i latou ua ta’usala i le faia o amioga mataga i fanau teine laiti, atoa ai ma le faia o se suega i lona tino e suesue ai po o ia tauaveina le siama o le fa’ama’i o le HIV.