O le tina e 31 tausaga le matua lea na ta’usala e le fa’amasinoga maualuga i le moliaga mama, o le taupulepule lea ma se isi tagata e faatino le solitulafono o le totogi tupe o se tagata tautua lautele, ina ia maua ai taui fa’a alatua, ua poloaina e le fa’amasinoga maualuga i le vaiaso na te’a nei, ina ia faafalepuipuia o ia mo le umi e 10 aso, o se tasi lea o tuutuuga o lana nofovaavaaia e 2 tausaga.

O le tuliina o le faasalaga a Matagi Lelili’o e pei ona poloaiga e le faamasinoga, o le taofia lea o ia i faaiuga o vaiaso e lima i le toese i Tafuna.

O isi tuutuuga sa tuuina atu e le faamasinoga ia Lelili’o, e aofia ai lona tuua o le teritori ma aumau ai i fafo atu mo le umi o lana nofovaavaaia, faapea ai lona tuliina o le tausaga atoa i le toese i Tafuna, peitai o ia tuutuuga o le a faamalumalu lona faataunuuina, fuafua lava i le usita’i o le ua molia i poloaiga ua tuuina atu e le faamasinoga ia te ia.

O Lelili’o na ulua’i tuuaia e le malo i moliaga mamafa o lona ofoina atu lea o ni taui fa’a alatua i se tagata faigaluega lautele.

Na molia faatasi Lelili’o ma le alii faigaluega o le Ofisa o Femalagaaiga ia Polone Savea, lea na ta’usala e le faamasinoga maualuga i le vaiaso na te’a nei, i le moliaga mamafa o lona faia lea o ni tusitusiga tau faasese.

I le tali ioe ai o Lelili’o i le moliaga e pei ona ta’usala ai o ia, sa ia tautino ai e faapea, i se taimi o le masina o Aokuso ma Setema 2011 i Amerika Samoa, sa ia ofo atu ai se taui tupe e $600 ia Savea, ina ia mafai ai ona ia faia ni I.D pepelo mo ni tamaitai mai Asia se to’alua sa ia manatu e fesoasoani i ai.

Na faatoese le ua molia i luma o le faamasinoga e tusa ai o lana solitulafono sa fai, ma ia talosagaina ai le faamasinoga ina ia faamagalo o ia.

Na taua e Lelili’o e faapea, ua aoga le mea sa tula’i mai ua ia aoaoina ai se lesona taua i lona olaga, sa ia ta’utino fo’i e le toe tula’i mai lea solitulafono i le lumana’i.

Na fesili le alii faamasino sili ia Michael Kruse ia Lelili’o pe la te faigaluega faatasi ma le tagata lea sa latou galulue faatasi i le mataupu lenei i le fale’aiga o le Taumafa Restaurant, na tali le ua molia - ioe.

Na taua fo’i e le ua molia e faapea, sa alu atu se tagata ia te ia ma fesili atu, pe mafai ona ia fesoasoani i se auala e maua ai ni I.D mo ni tamaitai se to’alua mai Asia, o lea na ia ofo atu ai loa lana fesoasoani i le auala e pei ona molia ai o ia i le tulafono.

Na finau le loia fautua a le ua molia o Joel Shiver i le faamasinoga, ina ia nofovaavaaia le ua molia ae aua nei tuuina atu o ia i le falepuipui. Na taua e Shiver e faapea, o le faalavelave e pei ona ta’usala ai Lelili’o, o se faalavelave e le i mafaufauina, ma o le taimi muamua fo’i lea ua molia ai o ia i se solitulafono.

Saunoa Kruse e faapea, o le ua molia, na soifua a’e i Samoa, ae na malaga mai o ia ma lona aiga a’o pepe lava o ia ma aumau i le teritori nei, ma o le taimi nei, o lo o nonofo o ia ma lona aiga i Aasu, sa faigaluega fo’i o ia i le tele o tausaga o lona tagata matua.

Na talitonu le faamasinoga i faafinauga a loia, o le ua molia o se tagata sa usita’i i tulafono a le malo mo le tele o tausaga o lona olaga, sei vagana ai le mataupu e pei ona molia ai o ia.

E tasi le tausaga i le falepuipui ma le salatupe e $1,000 le faasalaga na manatu le faamasinoga e faasala ai le ua molia, peitai o le a faamalumalu lona tuliina o le tausaga atoa i le toese, ae nofovaavaaia o ia mo le lua tausaga i lalo o poloaiga a le faamasinoga.

O nisi o poloaiga e aofia ai lona totogiina o le salatupe e $1,000, ma ia aua ne’i ona toe soliina se tulafono a le malo.

O se tasi o itu lelei na taua e le faamasinoga mo Lelili’o, sa tele lona fesoasoani i le malo i le taimi na su’esu’eina ai lenei mataupu, lea ua mafai ai ona maua e le malo ni isi o faamatalaga sa lilo e faatatau i lenei mataupu.