E 16 tausaga lea ua fa’asala ai e le fa’amasinoga maualuga le ali’i o Joseph Iakopo e taofia ai i le toese i Tafuna, ina ua ta’usala o ia i moliaga eseese e aofia ai le talepe fale ma le gaoi, e afua mai i osofaiga eseese sa ia faia i ni faleoloa, fale o aiga, fale’aiga atoa ai ma se falesa.

Na fa’atoese le ua molia i luma o le fa’amasinoga e tusa ai o lana solitulafono sa fai, ma ia talosagaina ai se isi avanoa mo ia sei toe fo’i atu ai i lona aiga. Sa ia fa’atoese fo’i i aiga uma na a’afia i lana gaioiga sa fai, ina ia alolofa ma fa’amagalo o ia.

Na talosaga fo’i lana loia fautua ia Michael White i le fa’amasinoga mo se fa’asalaga mama mo ia, e ui i le matuia ma le mamafa o moliaga ua ta’usala ai o ia.

Ae na finau le loia a le malo ia Jessica Bargman i le fa’amasinoga ina ia fa’asala Iakopo i se fa’asalaga fa’a falepuipui, ona ua matuia tele solitulafono sa ia faia.

Na taua e Bargman e fa’apea, e le o se taimi muamua lenei ua ta’usala ai Iakopo i luma o le fa’amasinoga i ni solitulafono mamafa, e foliga mai fo’i na te le i a’oa’oina se lesona mai mataupu lea na ia gaioia mai ai ni oloa mai le fale oloa sa galue muamua ai.

O se tasi o mafua’aga taua na taua e le loia a le malo e tatau ai ona taofia Iakopo i le falepuipui mo se taimi umi, ina ia puipuia mai ai meatotino a tagata o le atunu’u mai le toe a’afia i ni isi ana gaioiga, e aofia ai lona osofaia o pisinisi, faleoloa atoa ai ma fale o aiga.

Na taua fo’i e Bargman i le fa’amasinoga le isi gaioiga matuia sa faia e Iakopo ina ua ia fa’atinoina solitulafono eseese nei, o lona gaioia lea o se ta’avale e la’u ai oloa ma meatotino sa ia gaoiina mai i faleoloa ma fale o aiga.

E tusa ai o fa’amaumauga a le fa’amasinoga e pei ona saunoa le ali’i fa’amasino sili lagolago ia Lyle L. Richmond, e 14 mataupu eseese tau talepe fale na fa’atinoina e Iakopo, ma mafua ai loa ona molia o ia e le malo i moliaga mamafa e 34.

Na taua e le malo e fa’apea, e 5 fale o aiga na osofa’i e le ua molia, lua fale’aiga, o se falesa atoa ai ma ni faleoloa se 6.

O moliaga eseese na molia ai e le malo ia Iakopo ina ua fa’atoa faila lenei mataupu, e aofia ai moliaga o le talepe fale i le tulaga muamua ma le lua, moliaga o le gaoi, taumafai e talepe fale o ni aiga, taumafai e gaioi ni oloa mai ni isi tagata, faapea ai ma moliaga o lona fa’aleagaina lea o meatotino a ni isi tagata i le tulaga muamua ma le lua.

I le amata o le tausaga ua te’a na tulai mai ai lenei mataupu faasaga ia Iakopo i lona osofaia o fale o aiga, fale oloa ma isi pisinisi. O se tasi o nofoaga sa osofaia e Iakopo o le maota o le Faifeau a le Ekalesia a Ierusalema Fou ma ia aveesea ai se vaega tupe mai le sefe a le au lotu.

Fa’atoa tuli le fa’asalaga fou a Iakopo ua tu’uina atu, pe afai e mae’a ona tuli lana fa’asalaga fa’afalepuipui o lo o tuliina i le taimi nei.